މަސްކުގެ ކުންފުނިން އީޖާދުކޮށްފައިވާ ނިއުރަލިންކްގެ ސިކުނޑީގެ ޗިޕް އެންމެ ފުރަތަމަ ލިބުނު ފަރާތް ކަމުގައިވާ ނޯލަންޑް އަރބޯ، ބުނަނީ މިއީ އޭނާއަށް އައު ދިރުމެއް ދިން ޗިޕެއް ކަމަށެވެ. އޭނާ މި ޗިޕް އިންދައިގެން އުޅޭތާ މިހާރު އަހަރު ދުވަސްވީއެވެ.
މި ޗިޕް އޭނާގެ ދިރިއުޅުމަށް ގެނެސްދިން ބަދަލުތަކާ ބެހޭ ގޮތުން ނިއުސްނޭޝަންގެ ޕްރޮގްރާމުގައި ވާހަކަ ދައްކަމުން އޭނާ ބުނީ، 2016 ވަނަ އަހަރު ފެތުމުގެ ހާދިސާއަކުން އޭނާގެ ގައިގައި އެއްކޮށް ވާގިނެތި ދިޔައީ ކަމަށެވެ. އެ ހާދިސާއަށް ފަހު އޭނާއަކީ އަބަދުވެސް ބަލަހައްޓަން ޖެހޭ މީހެއްގެ ގޮތުގައި އުޅެމުން ދިޔަ މީހެކެވެ. ނަމަވެސް، މިހާރު އޭނާގެ ވިސްނުމުން ހަރަކާތްތައް ކޮންޓްރޯލްކުރެވޭ ކަމަށާއި މިހާރު އޭނާއަށް އަމިއްލައަށް އޮންލައިން ކޮށް ރާޒުވާ ވެސް ކުޅެވޭ ކަމަށާއި އަދި އީމެއިލް ލިޔެ އަދި ފޮތް ކިޔައި ހެދޭ ކަމަށް ބުނެއެވެ.
އޭނާ ބޭނުން ކުރަނީ މަޖާޒީ ކީބޯޑެކެވެ. އެ ކީބޯޑުން އެއްވެސް އުނދަގުލެއް ނެތި ކްލިކްކޮށް އަދި ޓައިޕް ކޮށް ހެދެއެވެ. އަދި މިކަމުގެ ސަބަބުން ދުވަހުން ދުވަހަށް ކުރަންޖެހޭ ކަންކަމުގައި އަމިއްލަ އިޚްތިޔާރު އޭނާއަށް އަލުން ލިބިފައިވެއެވެ.
ކުރިން ގިނައިން ފޮތް ކިޔައި ހެއްޖަސް، އޭނާއަށް، މި ހާދިސާއަށްފަހު އޯޑިއޯ ފޮތްތައް އަޑުއެހުމުގައި ދަތިތަކާ ކުރިމަތިވިއެވެ. ނަމަވެސް، މިހާރު ފޮތް ކިޔުމަކީ އޭނާގެ އެންމެ މަގްބޫލު މުނިފޫހިފިލުވުމުގެ ހަރަކާތެވެ.
އަރބޯ ބުނަނީ ނިއުރަލިންކު އަދިވެސް ކާމިޔާބު ކުރުމަށް މިކަމުގައި އިތުރު ދިރާސާއަށް މީހުން ބައިވެރި ވާން ޖެހޭ ކަމަށެވެ.
މި ޓެކްނޮލޮޖީގައި މިވަގުތު ކުދިކުދި މައްސަލަތަކެއް ހުރި ނަމަވެސް، މި ޗިޕްގެ ސަބަބުން އޭނާގެ ދިރިއުޅުމުގެ ފެންވަރު ވަރަށް ބޮޑަށް ރަނގަޅުވެފައިވާ ކަމަށް ބުނެއެވެ.
މިކަމުން ދައްކުވައިދެނީ ހަށިގަނޑު ވާގި ނެތިފައިވާ މީހުންނަށް ބާރުވެރިކަން ހޯދައިދިނުމުގައި ނިއުރަލިންކަށް އެހީތެރި ވެވިދާނެ ކަމެވެ.
ސިކުނޑީގެ ޗިޕް އުފައްދާ އޮޕަރޭޝަން ޔޫއޭއީގައި ކުރިއަށް ގެންދަނީ
