ޕާކިސްތާނުގައި ކުޑަކުދިންޏާ ކައިވެނިކޮށްދޭ މައްސަލަ ހުއްޓުވުމަށް ޤާނޫނީ ގޮތުން މަސައްކަތްތަކެއް ކުރަމުންދާ ކަމަށް ޕްރޮވިންސްގެ ސަރުކާރުން ބުނެއެވެ. ނަމަވެސް، ދެކުނު ޕަންޖާބުގައި 15 އަހަރު ނުވާ އަންހެން ކުދިންނާ ކައިވެނި ކޮށްދިނުމުގެ މައްސަލަތައް އިތުރުވެ އެކަން ކޮންޓްރޯލު ނުކުރެވޭ ކަމަށް އެންޖީއޯތަކާއި ސަރުކާރުން ބުނެއެވެ.
2025 ވަނަ އަހަރުގެ މެއި މަހު ފާސްކުރި "ޗައިލްޑް މެރިޖް ރެސްޓްރެއިންޓް ބިލް" އިން ކައިވެނި ކުރެވޭނެ އެންމެ ހަގު އުމުރު ކަމުގައި ކަނޑައަޅާފައިވަނީ 18 އަހަރެވެ. އަދި މި ޤާނޫނާ ޚިލާފުވާ ފަރާތްތަކަށް ހަރުކަށި އަދަބު ކަނޑައެޅިފައިވެއެވެ. ނަމަވެސް، ޔުނިސެފްގެ ތަފާސްހިސާބުތަކުން ދައްކާ ގޮތުގައި ޕާކިސްތާނުގެ 29 ޕަސެންޓް އަންހެން ކުދިން 18 އަހަރު ނުވަނީސް މީހުންނާ ކައިވެނިކޮށް ދެއެވެ. އަދި 4 ޕަސެންޓް ކުދިން 15 އަހަރު ނުވަނީސް މީހުންނާ ދެވައެވެ.
ބެހަލް އަވަށުގައި ދިރިއުޅޭ 14 އަހަރުގެ ޒުނައިރާގެ ހާލަތަކީ މިކަމުގެ ހިތާމަވެރި މިސާލެކެވެ. ސައިންސް ޓީޗަރަކަށް ވުމުގެ ހުވަފެން ދެކެމުން އައި ޒުނައިރާ މިހާރު ވަނީ އޭނާގެ އުމުރުގެ ދެގުނަ ބޮޑު މީހަކާ އިންނަން މަޖުބޫރުވެފައެވެ. "އަހަރަމެންނަށް އިތުރު ޗޮއިސްއެއް ނެތް،" ޒުނައިރާގެ މަންމަ ރޮމުން ބުންޏެވެ.
ޑަބްލިއުއެޗްއޯގެ ތަފާސްހިސާބުތަކުން ދައްކާ ގޮތުގައި 18 އަހަރު ނުވާ އަންހެން ކުދިން މާބަނޑުވުމާ ގުޅިގެން މަރުވުމުގެ ފުރުސަތު 5 ގުނައަށް އިތުރުވެވެ. ދެކުނު ޕަންޖާބުގައި މައިންގެ މަރުވުމުގެ މައިގަނޑު އެއް ސަބަބަކީ ޅަ ފަތުގައި ބަލިވެ އިނުން ކަމަށްވެސް ދައްކައެވެ.
ސަރުކާރުން އަޅަމުންދާ ފިޔަވަޅުތަކަށް އުއްމީދީ ކުލަވަރެއްގެ ގޮތުން، ޓީޗަރުންނާއި، ދީނީ ޢިލްމުވެރިންނާއި، ބެލެނިވެރިން މިހާރު ދަނީ މި އާދަކާދައާ ދެކޮޅަށް ފާޅުގައި މަސައްކަތް ކުރަމުންނެވެ. ހުކުރު ޚުތުބާއެއްގައި އިމާމް އަލީ ނޫރު ދިން ޚުޠުބާއަކުން ހިތްވަރު ލިބިގެން އެއް މަންމައަކު އޭނާގެ ދަރިފުޅުގެ ކައިވެނި ހުއްޓުވިއެވެ. އަދި އެހެން ސްކޫލެއްގެ ޓީޗަރެއްގެ އެހީގައި އެހެން ކުއްޖެއްގެ ކައިވެނި ފަސްކޮށް، އެ ކުއްޖާއަށް ސްކޫލް ނިންމުމަށް ފުރުސަތު ހޯދައި ދިނެވެ.
ޕާކިސްތާނަކީ ޖެންޑަރ އިންޑެކްސްގައި 139 ގައުމުގެ ތެރެއިން 137 ވަނައިގައި އޮތް ގައުމެކެވެ. އެކްޓިވިސްޓުން ބުނަމުން ދަނީ ކުޑަކުދިންނާ ކައިވެނި ކުރުމަކީ ހަމައެކަނި ސަގާފީ މައްސަލައެއް ނޫން ކަމަށެވެ. މިއީ ނިޒާމީ މައްސަލައެކެވެ. ޤާނޫނުތައް ތަންފީޒުކުރުމާއެކު، މުޖުތަމަޢުގެ ފެންވަރުގައި ހާލަތަށް ބަދަލު ގެނައުމަށް މަސައްކަތް ނުކުރެވޭހާ ހިނދަކު، ޒުނައިރާ ފަދަ މީހުން ބުނާ މައްސަލަތައް އިތުރުވަމުންދާނެއެވެ.
