ޕާކިސްތާނުގެ ސިންދު ސަރަހައްދުގެ ޝިކާރްޕޫރު ޑިސްޓްރިކްޓްގެ ސުލްތާން ކޯޓް ރޭލްވޭ ސްޓޭޝަން ކައިރީގައި އަންގާރަ ދުވަހު ހެނދުނު ބޮމެއް ގޮއްވާލައިފިއެވެ. މި ބޮން ގޮއްވާލުމުގެ ސަބަބުން ޖާފަރު އެކްސްޕްރެސްގެ 4 ބޮގީ ރޭލުން ނެއްޓި، 7 ފަސިންޖަރުންނަށް އަނިޔާވެއްޖެއެވެ.
މި ހާދިސާ ހިނގީ ހެނދުނު 8:15 ގައި، ކުއެޓާއާއި ޖެކޮބްއާބާދު ދެމެދު ދަތުރުކުރާ ރޭލު މަގުގައެވެ. އަނިޔާވި މީހުންގެ ތެރެއިން 4 މީހުންނަށް ފަރުވާ ދެވުނީ ކޮމްބައިންޑް މިލިޓަރީ ހޮސްޕިޓަލުގައެވެ. އަދި 3 މީހުންނަށް ފަރުވާ ދެވުނީ ޝިކާރްޕޫރު ސިވިލް ހޮސްޕިޓަލުގައެވެ. ގެއްލުން ލިބުނު ބޮގީތައް އަލުން ރޭލަށް އެރުވުމަށް ކްރޭން ބޭނުން ކުރަން ޖެހުނެވެ.
ސިންދު ސަރަހައްދުގެ ޗީފް މިނިސްޓަރ މުރާދު އަލީ ޝާހް މި ހަމަލާ ކުށްވެރި ކުރައްވަމުން އަނިޔާވި މީހުންނަށް ބޭސްފަރުވާގެ އެހީތެރިކަން ފޯރުކޮށްދިނުމަށް މަސްއޫލުވެރިންނަށް އެންގެވިއެވެ. އަދި ޕޮލިސް އޮފިޝަލުންނަށް މި ހާދިސާއާ ގުޅޭ ތަފްސީލީ ރިޕޯޓެއް ހުށަހެޅުމަށް އަންގަވާފައިވެއެވެ.
މިއީ ޕާކިސްތާނުގެ ރޭލްވޭ އިންފްރާސްޓްރަކްޗަރއަށް އަމާޒުކޮށް ދޭތެރެ ދޭތެރެއިން ދެވޭ ޓެރަރިސްޓް ހަމަލާތަކުގެ ތެރެއިން އެންމެ ފަހުގެ ހަމަލާއެވެ. މީގެ ކުރިން އޯގަސްޓް މަހު ބަލޮޗިސްތާނުގެ މަސްތުންގް ޑިސްޓްރިކްޓްގައި ހިނގި މިފަދަ ހާދިސާއެއްގައި ހަމަ މި ރޭލުގެ 6 ބޮގީ ރޭލުން ނެއްޓުނު ނަމަވެސް އެއްވެސް މީހަކަށް އަނިޔާއެއް ނުވެއެވެ.
