ބަންގްލަދޭޝްގެ އިންސާނީ ހައްގުތަކުގެ ހާލަތު ވަރަށް ބޮޑަށް ގޯސްވަމުންދާކަމުގެ އިންޒާރު އިންޓަނޭޝަނަލް ސޮސައިޓީ ފޯ ހިއުމަން ރައިޓްސް (އައި.އެސް.އެޗް.އާރު) އިން ދީފިއެވެ. އެ ޖަމިއްޔާއިން ފާހަގަކޮށްފައިވާ ގޮތުގައި، ސިޔާސީ ހަމަނުޖެހުންތަކާއި، ނޫސްވެރިންނަށް ކުރާ އަނިޔާތަކާއި، އަންހެނުންނާއި ކުޑަކުދިންނަށް ކުރާ ގޯނާތަކުގެ އިތުރުން މަދު ދީންތަކުގެ މީހުންނަށް ކުރިމަތިވާ ފިއްތުންތައް ވަނީ ވަރަށް ބޮޑަށް އިތުރުވެފައެވެ.
ހިއުމަން ރައިޓްސް ސަޕޯޓް ސޮސައިޓީ (އެޗް.އާރު.އެސް.އެސް) އިން ފެބްރުއަރީ މަހު ނެރުނު ރިޕޯޓަކާ ހަވާލާދީ އައި.އެސް.އެޗް.އާރުން ބުނީ، އެ މަހުގެ ތެރޭގައި ސިޔާސީ ހަމަނުޖެހުންތަކުގެ 346 ހާދިސާއެއް ހިނގާފައިވާ ކަމަށެވެ. މި ހާދިސާތަކުގައި 10 މީހުން މަރުވެ، ގާތްގަނޑަކަށް 2،000 މީހުންނަށް އެކިވަރުގެ އަނިޔާތައް ލިބިފައިވާ ކަމަށް އެ ރިޕޯޓުގައި ބަޔާންކޮށްފައިވެއެވެ. މީގެ ތެރޭގައި އިންތިޚާބާ ގުޅުންހުރި ހަމަނުޖެހުންތަކާއި، ސިޔާސީ ޕާޓީތަކުގެ އެތެރޭގެ ކޯޅުންތައް ހިމެނެއެވެ.
ބަންގްލަދޭޝްގެ ނޫސްވެރިންނަށް ތަފާތު ބިރުދެއްކުންތަކާއި، ޖިސްމާނީ ހަމަލާތަކާއި، ގާނޫނީ ގޮތުން ކުރިމަތިވާ ގޮންޖެހުންތައް އިތުރުވަމުންދާކަން އައި.އެސް.އެޗް.އާރުން ފާހަގަކުރެއެވެ. "ނޫސްވެރިންނަށް ބިރުދެއްކުމަކީ ދެފުށް ފެންނަ ނިޒާމެއް ހިންގުމަށް އޮތް ހުރަހެއް އަދި މިއީ ޑިމޮކްރެޓިކް ޒިންމާދާރުކަން ކުޑަވާ ކަމެއް" ކަމަށް އެ ޖަމިއްޔާއިން ބުނެފައިވެއެވެ.
މީގެ އިތުރުން، ހަވަރުއެއްވުމާއި އާންމުން އަމިއްލައަށް އަދަބު ދިނުމުގެ ހާދިސާތައް އިތުރުވަމުންދާކަމީ، ގައުމުގެ އަދުލު އިންސާފުގެ ނިޒާމަށް އޮތް އިތުބާރު ކުޑަވެފައިވާ މިންވަރު ހާމަކޮށްދޭ ކަމެއް ކަމަށްވެސް ރިޕޯޓުގައިވެއެވެ. އިންތިޚާބާ ގުޅިގެން ހިނގާ ހަމަނުޖެހުންތަކުގެ ސަބަބުން ޑިމޮކްރެޓިކް މުއައްސަސާތަކުގެ އިތުބާރު ގެއްލުމުގެ ބިރު އޮތް ކަމަށް މުހައްލިލުން އިންޒާރު ދެއެވެ.
އަންހެނުންނާއި ކުޑަކުދިންނަށް ކުރާ ޖިންސީ އަދި ޖިސްމާނީ އަނިޔާތައް ކަންބޮޑުވާ މިންވަރަށް އިތުރުވަމުންދާއިރު، ދީނީ ގޮތުން މަދު މީހުން އުޅޭ ސަރަހައްދުތަކާއި އަޅުކަންކުރާ ތަންތަނަށް ދޭ ހަމަލާތައް ވެސް ވަނީ އިތުރުވެފައެވެ. ހަމައެއާއެކު، އިންޑިއާ އަދި މިޔަންމާ ބޯޑަރު ސަރަހައްދުގައި ހިނގާ މީހުންގެ މަރުގެ ހާދިސާތަކާއި، ފުލުހުންގެ ބަންދުގައި ތިއްބާ މީހުން މަރުވާ މައްސަލަތަކަށް މިނިވަން ތަހުގީގެއް ހިންގުމަށް ބައިނަލްއަގުވާމީ ފަރާތްތަކުން ދަނީ ގޮވާލަމުންނެވެ.
އިގްތިސާދީ ގޮތުން ބަންގްލަދޭޝް ކުރިއެރުންތަކެއް ހޯދަމުން ދިޔަ ނަމަވެސް، މަސައްކަތްތެރިންގެ ރައްކާތެރިކަން ކަށަވަރުކޮށްދިނުމުގައި އަދިވެސް ބޮޑެތި އިހުމާލުތަކެއް ހުރިކަން އައި.އެސް.އެޗް.އާރުން ފާހަގަކުރެއެވެ. ޚާއްސަކޮށް ގާމެންޓް ފެކްޓްރީތަކުގައި މަސައްކަތްކުރާ މީހުންގެ ސަލާމަތީ ކަންކަން ދަށްވުމުގެ ސަބަބުން، ހުއްޓުވިދާނެ ފަދަ ހާދިސާތަކުގައި މީހުން މަރުވަމުންދާކަން އެ ޖަމިއްޔާއިން ވަނީ ފާހަގަކޮށްފައެވެ.
