އިންޑިއާގެ ކަރްނާޓަކާގެ މަންގަލޫރުގައި ކުރިއަށްދާ ނޭޝަނަލް ސާފިން ސީރީޒްގެ މުހިންމު މުބާރާތެއް ކަމަށްވާ "އެންއެމްޕީއޭ އިންޑިއަން އޯޕަން އޮފް ސާފިން 2026″ ގެ ފުރަތަމަ ދުވަހުގެ ފޯރިގަދަ ހީޓްތަކަށް ފަހު، އަންހެނުންގެ އޯޕަން ކެޓަގަރީން ކަމާލީ މޫރްތީ، ސުގަރ ޝާންތީ ބަނާރްސޭ އަދި އިޝިތާ މަލާވިޔާ ސެމީ ފައިނަލުގެ ޖާގަތައް ކަށަވަރުކޮށްފިއެވެ.
މި އަހަރުގެ އެޭޝިއަން ގޭމްސްއަށް އިންޑިއާގެ ގައުމީ ސާފިން ޓީމު ހޮވުމުގައި ބޮޑު ދައުރެއް އަދާކުރާނެ މި މުބާރާތުގެ ފުރަތަމަ ދުވަހު ފިރިހެނުންގެ އޯޕަން، އަންހެނުންގެ އޯޕަންގެ އިތުރުން 18 އަހަރުން ދަށުގެ އަދި 14 އަހަރުން ދަށުގެ ފިރިހެން ކުދިންގެ ކެޓަގަރީގެ ވާދަވެރި ހަރަކާތްތައް ވަނީ ފެނިގެންގޮސްފައެވެ.
މުބާރާތުގެ ފުރަތަމަ ދުވަހުގެ މުހިންމު ތަފްސީލުތައް:
-
އަންހެނުންގެ އޯޕަން ކެޓަގަރީ: ތަމިލްނާޑޫގެ ކަމާލީ މޫރްތީ ވަނީ 13.83 ގެ މޮޅު ސްކޯއަކާއެކު ފުރަތަމަ ދުވަހުގެ ހުރިހާ ކެޓަގަރީއަކުންވެސް އެންމެ މަތީ ސްކޯ ހޯދި އެތުލީޓަށް ވެފައެވެ. ގޯއާގެ ސުގަރ ޝާންތީ ބަނާރްސޭ 11.00 ގެ ސްކޯއަކާއެކު ގާތުން ވާދަކުރިއިރު، އިޝިތާ މަލާވިޔާ (6.40)، ދޭވީ ރާމަނާތަން (5.90)، ސާންވީ ހެގްޅޭ (5.37)، އަދި ޝްރިޝްތީ ސެލްވަމް (5.33) ވެސް ވަނީ ސެމީ ފައިނަލަށް ދަތުރުކޮށްފައެވެ.
-
ފިރިހެނުންގެ އޯޕަން ކެޓަގަރީ: ޖުމްލަ 45 ސާފަރުން 12 ހީޓެއްގައި ވާދަކުރިއިރު، ކޮންމެ ހީޓަކުން އެންމެ މަތިން ސްކޯ ހޯދި ދެ ސާފަރުން ވަނީ ދެވަނަ ބުރަށް ހޮވިފައެވެ. އޭގެ ތެރޭގައި ފާހަގަކޮށްލެވޭ ކިޝޯރް ކުމާރު (12.90) އަދި ރަމޭޝް ބުދިހާލް (12.57) ހިމެނެއެވެ.
-
ޖޫނިއާ ކެޓަގަރީތައް: 18 އަހަރުން ދަށުގެ ފިރިހެން ކުދިންގެ ބައިގައި 19 ސާފަރުން ވާދަކުރިއިރު، ހަރީޝް ޕީ (12.67) އާއި ތާއިން އަރޫން (10.33) ހިމެނޭހެން 12 ކުދިން ވަނީ ކުއާޓާ ފައިނަލަށް ހޮވިފައެވެ. އަދި އަލަށް ތައާރަފުކުރި 14 އަހަރުން ދަށުގެ ކެޓަގަރީންވެސް 8 ކުދިން ވަނީ ސެމީ ފައިނަލުގެ ޖާގަ ހޯދާފައެވެ.
މަންތުރާ ސާފް ކްލަބާއި ސާފިން ސުވާމީ ފައުންޑޭޝަން ގުޅިގެން، ސާފިން ފެޑެރޭޝަން އޮފް އިންޑިއާގެ ބެލުމުގެ ދަށުން ބާއްވާ މި މުބާރާތް ކުރިއަށްދަނީ މަންގަލޫރުގެ ބްލޫ ބޭ ތަންނީރްބާވީ އިކޯ ބީޗްގައެވެ.
