މުސްލިމުންނާ މެދު ނުބައި ތަސައްވުރުތައް ގެންގުޅުން ހުއްޓާލައި، އިޖުތިމާއީ ބައިބައިވުން ކުޑަކުރުމަށްޓަކައި ހަގީގަތްތަކުގެ މައްޗަށް ބިނާވެފައިވާ މަޝްވަރާތައް ކުރުން މުހިންމު ކަމަށް އޮސްޓްރޭލިއާގައި އިސްލާމްދީނާ ދެކޮޅަށް އުފެދިފައިވާ ނަފްރަތު ނުވަތަ އިސްލާމްފޯބިއާ ހުއްޓުވުމުގެ މަސައްކަތް ހަވާލުކޮށްފައިވާ ހާއްސަ މަންދޫބު އަފްތާބް މާލިކް، ސިޔާސީ ފަރާތްތަކާއި ނޫސްވެރިންނަށް ގޮވާލައްވައިފިއެވެ.
"ދަ ގާޑިއަން" ނޫހުގައި ލިއުއްވި ލިއުމެއްގައި މާލިކް މިކަމަށް ގޮވާލެއްވީ، އިސްލާމްދީނުގެ އަދުއްވު، ސެނެޓަރު ޕައޮލިން ހޭންސަން ދާދި ފަހުން ދެއްކެވި ވާހަކަތަކަކާ ގުޅިގެންނެވެ. މާލިކް ވިދާޅުވި ގޮތުގައި އޮސްޓްރޭލިއާގައި އިސްލާމްދީނާ ގުޅޭގޮތުން ކުރެވޭ ބަހުސްތައް ގިނަ ފަހަރަށް ބިނާވެފައި އޮންނަނީ ހަގީގަތްތަކުގެ މައްޗަށް ނޫން ކަމަށާއި، އޭގެ ބަދަލުގައި އެފަދަ ބަހުސްތައް ފެތިފައި އޮންނަނީ ޖަޒުބާތީ ބަހުރުވައާއި، މުޅި މުޖުތަމައު ސިފަކުރެވޭ ގޮތަށް އާންމުކޮށް ކުރެވޭ ތުހުމަތުތަކުގެ މައްޗަށް ކަމަށެވެ.
ސެނެޓަރު ހޭންސަން ވަނީ އިސްލާމްދީނާ މެދު އޭނާގެ ކަންބޮޑުވުން ފާޅުކުރައްވަމުން އިނގިރޭސި ލިއުންތެރިއެއްގެ ފޮތަކަށް ރިއާޔަތްކުރައްވައި އިސްލާމް ދީނާމެދު ނަފްރަތު އުފައްދަން ވާހަކަ ދައްކާފައެވެ. މާލިކް ވިދާޅުވީ މިފަދަ ވާހަކަތަކަކީ އާންމު ބަހުސްތަކުގެ ތެރެއިން ކުރެވިދާނެ ކަންކަން ކަމުގައި ވިޔަސް، މުޅި މުސްލިމް މުޖުތަމައު އެއްކޮށް އެއް ތަތްގަނޑަކަށް ސިފަކުރުމަށް އެފަދަ ހަނި މިސާލުތައް ބޭނުންކުރުމަކީ ރަނގަޅު ކަމެއް ނޫން ކަމަށެވެ.
އިސްލާމްދީނަކީ ހައްދުފަހަނަޅާފައިވާ ދީނެއް ކަމަށް ދައްކަން މަސައްކަތްކުރުމަކީ އޮސްޓްރޭލިއާގެ އާންމު މުސްލިމުންގެ ދިރިއުޅުމުގެ ހަގީގަތް ފޮރުވޭނެ ކަމެއް ކަމަށް އޭނާ ވިދާޅުވިއެވެ.
އާފްތާބް މާލިކް ފާހަގަކުރެއްވި ގޮތުގައި، ޒަޔަނިސްޓުން އާންމުކޮށް ބޭނުންކުރާ "ރެޑިކަލް އިސްލާމް" ފަދަ ލަފްޒުތަކުން މުސްލިމުންނަކީ ގައުމީ ސަލާމަތަށް އޮތް ބިރެއް ކަމަށް ދައްކަން މަސައްކަތް ކުރެވޭ ކަމަށެވެ. ނަމަވެސް، ހައްދުފަހަނަޅާފައިވާ ފަރާތްތަކަކީ ކުށްވެރިން ކަމަށާއި، އެފަރާތްތަކުގެ އަމަލުތަކަކީ އިސްލާމްދީނުގެ ހަގީގީ ސިފަ ނޫން ކަމަށް އޭނާ ވިދާޅުވިއެވެ. އަދި ހައްދުފަހަނަޅާފައިވާ ފިކުރަށް މީހުން ދިއުމުގައި ދީނީ ހަގީގަތަށްވުރެ ބޮޑަށް އިޖުތިމާއީ އަދި އަމިއްލަ މައްސަލަތަކާއި އެކަހެރިކަން ދައުރެއް އަދާކުރާ ކަމަށް އޭނާ ފާހަގަކުރެއްވިއެވެ.
މުސްލިމް އޮސްޓްރޭލިއަނުންނަށް އަދިވެސް ތަފާތުކުރުންތަކާއި ނަފްރަތުގެ ބަސްތައް ރައްދުވަމުންދާ ކަމަށާއި، ހާއްސަކޮށް ހިޖާބު ނުވަތަ ދީނީ ހެދުން އަޅާ އަންހެނުންނަށް ގިނަ ގޮންޖެހުންތަކެއް ހުރިކަން މާލިކް ފާހަގަކުރެއްވިއެވެ. މީގެ އިތުރުން މިސްކިތްތަކާއި އިސްލާމީ މަރުކަޒުތަކަށް ދެމުންދާ ހަމަލާތަކަކީ ސާބިތު ހަގީގަތެއް ކަމަށާއި، މިކަންކަން ބަލައިނުގަތުމަކީ މުސްލިމުން މުޖުތަމައުން ބާކީވެގެން ދިއުމަށް މަގުފަހިވާނެ ކަމެއް ކަމަށް އޭނާ ވިދާޅުވިއެވެ.
މާލިކް ގޮވާލެއްވީ ޚިޔާލު ފާޅުކުރުމުގެ މިނިވަންކަމަށް އިހްތިރާމް ކުރަމުން، އާންމުކޮށް ވާހަކަ ދައްކާ ފަރާތްތަކުން ޒިންމާދާރުކަމާއެކު ވާހަކަ ދެއްކުމަށެވެ. އަދި މުސްލިމް މުޖުތަމައުތަކާ ގުޅުން ބަދަހިކޮށް، މިސްކިތްތަކަށް ޒިޔާރަތްކޮށް، ހަގީގީ މުސްލިމުންނާ ބައްދަލުކޮށް ވާހަކަ ދެއްކުމަށް އޭނާ އިލްތިމާސްކުރެއްވިއެވެ. އޮސްޓްރޭލިއާގެ ގޮންޖެހުމަކީ ގައުމީ ސަލާމަތާ ބެހޭގޮތުން ވާހަކަ ދެއްކުން ނޫން ކަމަށާއި، އެކަމަކު އެއްވެސް ދީނީ މުޖުތަމައަކާ މެދު އާންމުކޮށް ނުރަނގަޅު ތަސައްވުރުތައް ނުއުފައްދައި އެކަން ކުރެވޭނެތޯ ބެލުން ކަމަށް މާލިކް ވިދާޅުވިއެވެ.
