ހުރްމުޒް ކަނޑުއޮޅިން ދަތުރުކުރަމުންދިޔަ ތިން އާގުބޯޓަކަށް އީރާނުން ހަމަލާދިން ކަމަށް ތުހުމަތުކޮށް، އެމެރިކާގެ ސިފައިން ބުދަ ދުވަހުގެ ހެނދުނުގެ ވަގުތެއްގައި އީރާނުގެ ދެކުނުގެ ސަރަހައްދުތަކަށް ވަރުގަދަ ވައިގެ ހަމަލާތަކެއް ދޭން ފަށައިފިއެވެ. މި ހަމަލާތަކާއެކު އީރާނުގެ ދެކުނުގެ ސިޓީތަކުން ބާރުގަދަ ގޮވުންތަކެއްގެ އަޑު އިވިފައިވާ ކަމަށް އީރާނުގެ ދައުލަތުގެ މީޑިއާ ރިޕޯޓްކޮށްފައިވެއެވެ.
އެމެރިކާގެ މެދުއިރުމަތީގެ އަސްކަރީ ކޮމާންޑް އިން ސޯޝަލް މީޑިއާ އެކްސްގައި އާންމުކުރި ބަޔާނެއްގައި ބުނެފައިވަނީ، އީރާނުން ބައިނަލްއަގުވާމީ ކަނޑުގެ ދަތުރުފަތުރަށް ހުރަސްއަޅައި ދިން ހަމަލާތަކުގެ ބަދަލުހިފުމުގެ ގޮތުން "އީރާނަށް އަމާޒުކޮށް ވަރުގަދަ ހަމަލާތަކެއް ދޭން ފަށާފައިވާ" ކަމަށެވެ.
އެމެރިކާގެ އޮފިޝަލަކު ރޮއިޓާސްއަށް ކިޔައިދިން ގޮތުގައި، މި ހަމަލާތަކުގައި މައިގަނޑު ގޮތެއްގައި އަމާޒުކޮށްފައިވަނީ އީރާނުގެ ވައިގެ ދިފާއީ ނިޒާމުތަކަށާއި، އައްސޭރިފަށުގެ ފާރަވެރިވާ ސިސްޓަމްތަކަށާއި، ބެލިސްޓިކް މިސައިލް އަދި އެންޓި-ޝިޕް ކްރޫޒް މިސައިލް ފޮނުވާލާ ތަންތަނުގެ އިތުރުން ޑްރޯން ލޯންޗުކުރާ މަރުކަޒުތަކަށެވެ.
އީރާނުގެ ދައުލަތުގެ މީޑިއާ ރިޕޯޓްކުރި ގޮތުގައި، ދެކުނުގެ ބަނދަރުމަތީ ސިޓީއެއް ކަމަށްވާ ސިރިކް އިން ހަތް ގޮވުމެއްގެ އަޑު އިވިފައިވެއެވެ. އަދި އެ ސިޓީގެ ވިޔަފާރި ބަނދަރަށް "ދުޝްމަނުންގެ މިސައިލް" ތަކެއް އެރުމުގެ ސަބަބުން ބައެއް މީހުންނަށް ވަނީ އެކިވަރުގެ އަނިޔާތައް ވެފައެވެ. މީގެއިތުރުން ބަންދަރު އައްބާސް އަދި ގޭޝްމް އައިލެންޑް އަށްވެސް ހަމަލާތަކުގެ އަސަރުކޮށްފައިވެއެވެ.
މި ހަމަލާތަކާ ގުޅިގެން، ޢިރާގަށް ރަސްމީ ދަތުރުފުޅެއްގައި ވަޑައިގެން އުޅުއްވި އީރާނުގެ ރައީސް މަސްއޫދު ޕެޒެޝްކިއަން ވަނީ ކުއްލި ގޮތަކަށް ދަތުރުފުޅު ކުރުކޮށްލެއްވުމަށްފަހު އެނބުރި ގައުމަށް ވަޑައިގެންފައެވެ.
އިނގިރޭސި ސިފައިން ހާމަކުރި ގޮތުގައި އީރާނުން އަންގާރަ ދުވަހު ވަނީ ހުރްމުޒް ކަނޑުއޮޅިން ދަތުރުކުރި ތިން ތެޔޮ ޓޭންކަރަކަށް މިސައިލް ހަމަލާތަކެއް ދީފައެވެ. އޭގެ ތެރެއިން ގޭސް އުފުލާ ބޮޑު ބޯޓެއްގައި އަލިފާން ރޯވިއެވެ. މިއީ މިއަހަރުގެ އެޕްރީލް މަހުގެ ފަހުން އެއް ދުވަހެއްގެ ތެރޭގައި ކަނޑުމަތީގައި ބޯޓުފަހަރަށް ދެވުނު އެންމެ ގިނަ ހަމަލާތަކެވެ.
މި ހަމަލާތަކާ ގުޅިގެން އެމެރިކާއިން ވަނީ އީރާނުގެ ތެލުގެ ވިޔަފާރިއަށް ދީފައިވާ 60 ދުވަހުގެ ހާއްސަ ހުއްދައެއް ވަގުތުން ބާތިލުކޮށް، އަލުން ދަތިކުރުމުގެ ފިޔަވަޅުތައް އަޅާފައެވެ. އާންމު ހާލަތްތަކުގައި ދުނިޔޭގައި ބާޒާރުކުރާ ތެލާއި ގޭހުގެ ފަސްބައިކުޅަ އެއްބައި ދަތުރުކުރަނީ މި ހުރްމުޒް ކަނޑުއޮޅި މެދުވެރިކޮށެވެ.
މި ސަރަހައްދުގެ މަސްރަހު ހޫނުވެފައި މިވަނީ، އެމެރިކާ އާއި އީރާނާ ދެމެދު ކުރިއަށްދިޔަ ނިއުކްލިއާ ވާހަކަތަކާއި، ސަރަހައްދީ ހަނގުރާމަ ހުއްޓާލުމުގެ މަޝްވަރާތައް މެދުކެނޑިފައިވާ ދަނޑިވަޅެއްގައެވެ.
