އެމެރިކާގެ ރައީސް ޑޮނަލްޑް ޓްރަމްޕްގެ ސީދާ އަމުރަށް، އީރާނުގެ އަސްކަރީ މުހިންމު އަމާޒުތަކަށް އެމެރިކާގެ ސިފައިން ވަރުގަދަ ހަމަލާތަކެއް ދޭން ފަށައިފިއެވެ. އީރާނުގެ މީޑިއާ ރިޕޯޓުކުރާ ގޮތުގައި، ދެކުނާއި ދެކުނު-އިރުމަތީ އީރާނުގެ ޖަބާހަރު، އީރާންޝަހަރު، ސީރިކް، ލަވާން އަދި ބަންދަރު އައްބާސް ފަދަ މުހިންމު ސަރަހައްދުތަކުގައި ބާރުގަދަ ގޮވުންތަކެއްގެ އަޑު ވަނީ އިވިފައެވެ. ޚާއްސަކޮށް ޖަބާހަރު ބަނދަރުގެ މުވާސަލާތީ ޓަވަރަކަށާއި ގުދަނަކަށް ހަމަލާތައް އަމާޒުވެފައިވާއިރު، އީރާންޝަހަރުގެ އެއާޕޯޓަށް ދިން ހަމަލާއެއްގައި އެކަކު މަރުވެފައިވާ ކަމަށް ޚަބަރު ލިބެއެވެ. ޖަބާހަރުގެ ކަރަންޓުގެ ޚިދުމަތަށް ބުރޫއަރާފައިވާ ކަމަށްވެސް އީރާނުގެ "އިސްނާ" ނިއުސް އެޖެންސީން ބުނެއެވެ.
ޓްރަމްޕް ވަނީ ސޯޝަލް މީޑިއާގައި މި ހަމަލާތައް ދިފާއު ކުރައްވައި އީރާނަށް ވަރުގަދަ އިންޒާރެއް ދެއްވާފައެވެ. "އެމެރިކާގެ ހަމަލާތަކަކީ އީރާނުން އުޅަނދުތަކަށް ދިން ހަމަލާތަކަށް ދިން ރައްދެއް. އެކަން ތަކުރާރުވެއްޖެނަމަ، ދެން ވާނެ ގޮތް މިއަށްވުރެ މާ ގޯސްވާނެ،" ޓްރަމްޕް ވިދާޅުވިއެވެ.
އީރާނުގެ ރިވޮލިއުޝަނަރީ ގާޑްސްއިން ވަނީ މި ހަމަލާތަކަށް ވަރުގަދަ ރައްދެއް ދޭނެ ކަމަށް ބުނެ އިންޒާރު ދީފައެވެ. އީރާނުގެ ފޮރިން މިނިސްޓްރީގެ އޮފިޝަލުން ވިދާޅުވާ ގޮތުގައި ޓްރަމްޕަށް ވިސްނޭނީ ހަމައެކަނި ބާރުގެ ބަހުރުވައެވެ. އަދި ހުރްމޫޒް ކަނޑުއޮޅި ބަންދުކޮށް، އެމެރިކާގެ އަމާޒުތަކަށް ދެގުނަ ވަރުގަދަ ރައްދެއް ދޭނެ ކަމުގެ އިންޒާރު އީރާނުން ދެއެވެ.
ނަމަވެސް، އެމެރިކާގެ ނައިބު ރައީސް ޖޭ.ޑީ. ވެންސް ވިދާޅުވީ، ޓްރަމްޕް ބޭނުންފުޅުވަނީ ހުރްމޫޒް ކަނޑުއޮޅި ހުޅުވިފައި ބޭއްވުމަށް ކަމަށެވެ. "އެމީހުންނަށް ދެ ގޮތެއް އެބައޮތް: އެއްބަސްވުމަށް އަމަލުކުރުން، ނުވަތަ މިހާރު މި ފެންނަފަދަ ހަމަލާތަކާ ކުރިމަތިލުން،" ވެންސް ވިދާޅުވިއެވެ.
މި ހަމަނުޖެހުންތަކުގެ ސަބަބުން ދުނިޔޭގެ ތެލުގެ ބާޒާރަށް ވަނީ ބޮޑެތި އަސަރުތަކެއް ކޮށްފައެވެ. އެމެރިކާގެ ހަކަތައާ ބެހޭ އިދާރާއިން ހާމަކުރި ގޮތުގައި، އެމެރިކާގެ ތެލުގެ ރިޒާވް 3 މިލިއަން ފީފާއަށް އިތުރުވެފައިވީ ނަމަވެސް، މެދުއިރުމަތީގެ ނުތަނަވަސްކަމާއެކު ދުނިޔޭގެ ތެލުގެ ސަޕްލައިއަށް އޮތް ބިރު ވަނީ ބޮޑުވެފައެވެ.
ހަމަލާތައް ކުރިއަށްދާއިރު، އެމެރިކާގެ 20 އަށްވުރެ ގިނަ ހަނގުރާމަމަތީ އުޅަނދު މިހާރުވެސް ދަނީ މެދުއިރުމަތީގެ ކަނޑުގެ ސަރަހައްދުތަކުގައި ހަރަކާތްތެރިވަމުންނެވެ. މި ހާލަތު އިތުރަށް ގޯސްވެ، ފުޅާ ދާއިރާއެއްގެ ހަނގުރާމައަކަށް ބަދަލުވެދާނެ ކަމުގެ ބިރު ވަނީ އުފެދިފައެވެ.
