އުމުރުން 16 އަހަރުގެ އަންހެން ކުއްޖެއްގެ ކަކުލުގެ އޮޕަރޭޝަނެއް ކުރަން ހަމަޖެހިފައި އޮތް ނަމަވެސް، އެކަން ނިމުނީ މުޅި ފްރާންސް ސިއްސުވާލި ބިރުވެރި ސިއްހީ ގޯހަކުންނެވެ. މި ހާދިސާއާ ގުޅިގެން އެ ކުއްޖާގެ އާއިލާއިން ދަނީ އިންސާފު ހޯދުމަށް ގޮވާލަމުންނެވެ.
އައިޑެންޓިޓީ ސިއްރުކޮށްފައިވާ އެ ކުއްޖާ ފްރާންސްގެ އުތުރުގެ ސަހަރެއް ކަމަށްވާ ލޫ ޓޫކޭގެ އަމިއްލަ ކްލިނިކަކަށް ދިޔައީ، ކަކުލަށް ލިބިފައިވާ އަނިޔާއަކަށް ފަރުވާ ހޯދުމަށެވެ. ނަމަވެސް އޮޕަރޭޝަން ތިއޭޓަރުން އޭނާ ނުކުތީ، ކަކުލުގެ އޮޕަރޭޝަން ނުކުރެވި، އަދި އެއްވެސް ބައްޔެއް ނެތް އޭނާގެ ކޮލުގެ 4 ދަޅު މަދުކޮށްފައިވާ ހާލަތެއްގައެވެ.
މިއީ އާދައިގެ އޮތޯޕީޑިކް ފަރުވާއަކަށް ވާންޖެހޭ ކަމެކެވެ. ނަމަވެސް، ކްލިނިކުގެ އިދާރީ ފެއިލިއާގެ ސަބަބުން މުޅި ކަންތައް ބަދަލުވީ ބިރުވެރި ހާދިސާއަކަށެވެ. އާއިލާއިން ބުނާ ގޮތުގައި، ކުއްޖާ ހޭނައްތައިގެން އޮޕަރޭޝަން ކުރަން ފެށިއިރު، ސާޖިކަލް ޓީމުން މަސައްކަތް ފެށީ އެހެން ކުއްޖެއްގެ ފައިލު ބަލައިގެންނެވެ.
ކުއްޖާއަށް ހޭއެރިއިރު ކަކުލަށް ލިބެންޖެހޭ ތަދުގެ ބަދަލުގައި އިހުސާސް ކުރެވުނީ އަނގައިގެ ތަދެވެ. ވަގުތުން އޭނާއަށް އެނގުނު ގޮތުގައި، އޭނާ ހޭނައްތާފައި އޮއްވައި ޑޮކްޓަރުން ވަނީ އޭނާގެ ހަތަރު ދަޅު އުފުރާލާފައެވެ.
"ދިޔައީ ފައިގެ ފަރުވާއަކަށް. ނަމަވެސް ތިއޭޓަރުން ނުކުތީ ކޮލުން 4 ދަޅު އުފުރާލައިގެން،" އެ ކުއްޖާގެ މަންމަ މީޑިއާއަށް ކިޔައިދިނެވެ.
ކްލިނިކުން މި ކުށް ގަބޫލުކޮށްފައިވާއިރު، އެތަނުން ބުނާނީ މިކަން ހިނގީ ދެ ބަލިމީހުންގެ ނަން އެއްގޮތް ވުމުގެ ސަބަބުން ފައިލު އޮޅިގެން ކަމަށެވެ. ސިއްހީ ފަރުވާ ދޭ ތަންތަނުގައި މިފަދަ "އެކްސިޑެންޓްތައް" މަދުން ހިނގި ނަމަވެސް، މިއީ އެތަނުގެ ސިސްޓަމްގައި ހުރި ބޮޑެތި މައްސަލަތަކެއް ފެންމަތިވި ކަމެކެވެ.
މި ކުއްޖާއަށް ލިބުނު ގެއްލުން ހަމައެކަނި ޖިސްމާނީއެއް ނޫނެވެ. އޭނާގެ ކަކުލަށް ބޭނުންވާ ފަރުވާ ނުލިބި ލަސްވުމުގެ ސަބަބުން އިތުރު ތަދާއި ވޭން އޭނާއަށް އުފުލަން ޖެހިފައިވާއިރު، ނަފްސާނީ ގޮތުން ވެސް ބޮޑެތި އަސަރުތަކެއް ވަނީ ކޮށްފައެވެ.
ކްލިނިކުން ވަނީ މިކަމަށް ރަސްމީކޮށް މާފަށް އެދި، އެތެރޭގެ ތަހުގީގެއް ފަށާފައެވެ. އަދި މިފަދަ ކަމެއް ދެވަނަ ފަހަރަށް ނުވާނެކަމުގެ ޔަގީންކަން އެތަނުން ދެއެވެ.
ނަމަވެސް، އާއިލާއިން ގަބޫލުކުރާ ގޮތުގައި މާފުކުރުމަކުން ފުދޭކަށެއް ނެތެވެ. އެ މީހުން މިހާރު ވަނީ ކްލިނިކާ ދެކޮޅަށް ގާނޫނީ ފިޔަވަޅު އަޅަން ނިންމައި، ކޯޓަށް ދިއުމަށް ތައްޔާރުވެފައެވެ. މި ދައުވާގެ ބޭނުމަކީ ކުށުގެ ޒިންމާ ނަގަންޖެހޭ ފަރާތްތައް ޖަވާބުދާރީ ކުރުވުމާއި، ލިބުނު ގެއްލުމުގެ ބަދަލު ހޯދުމެވެ.
