ތުރުކީގެ މީޑިއާ ރިޕޯޓްތަކުން ބުނާ ގޮތުގައި، މި ނިމުނު ޖޫން އަދި ޖުލައި މަހުގެ ތެރޭގައި އޭޖީއަން ކަނޑުގެ ރިސޯޓު ސަރަހައްދު ވަނީ ދުނިޔޭގެ އެންމެ މުއްސަނދި ފަރާތްތަކުގެ މެދުގައި ހޫނުމޫސުމުގެ އެންމެ މަގްބޫލު އެއް މަންޒިލަށް ވެފައެވެ. މި ދެ މަސްދުވަހުގެ ތެރޭގައި 4,200 އާ ގާތްކުރާ އަދަދަކަށް ޕްރައިވެޓް ޖެޓް ވަނީ މިލާސް-ބޮޑްރޫމް އެއާޕޯޓަށް ޖައްސާފައެވެ.
ތުރުކީގެ ނޫހެއް ކަމަށްވާ "ސަބާހް" އިން ރިޕޯޓުކޮށްފައިވާ ގޮތުގައި، ވޭތުވެދިޔަ ދެ މަސްދުވަހުގެ ތެރޭގައި އެއާޕޯޓުގެ ޖެނެރަލް އޭވިއޭޝަން ޓާމިނަލަށް ވަނީ ޕްރައިވެޓް މަތިންދާބޯޓުތައް އައުން ވަރަށް ބޮޑަށް އިތުރުވެފައެވެ. މި ސަރަހައްދަށް ޒިޔާރަތްކުރި މީހުންގެ ތެރޭގައި އެންމެ ގިނައީ ރަޝިޔާގެ މުއްސަނދި ވިޔަފާރިވެރިނެވެ. ދެން އެންމެ ގިނައިން އައިސްފައިވަނީ ފްރާންސް، ގްރީސް، ޔުނައިޓެޑް ކިންގްޑަމް، އިޓަލީ އަދި އެކުވެރި އަރަބި އިމާރާތް ގެ ބިލިއަނަރުންނާއި މުއްސަނދިންނެވެ.
އެ ސަރަހައްދުގެ އޮފިޝަލުންނާއި އޭވިއޭޝަން ދާއިރާގެ ތަޖުރިބާކާރުން ލަފާކުރާ ގޮތުގައި، ހޫނުމޫސުމުގެ ސީޒަން ނިމޭއިރު ޕްރައިވެޓް ޖެޓްތައް އަންނަ އަދަދު 10،000 އަށް އަރާނެއެވެ. އެއާޕޯޓުގެ ފްލައިޓްތައް ގިނަވުމުގެ ސަބަބުން، މިއީ އެންމެ ތޮއްޖެހޭ މަސްތަކުގައި މެދުކެނޑުމެއްނެތި ޕްރައިވެޓް އޭވިއޭޝަންގެ ޚިދުމަތްދޭ މަރުކަޒަކަށް ވަނީ ބަދަލުވެފައެވެ.
ތުރުކީގެ ދެކުނު-ހުޅަނގު އައްސޭރިފަށުގައި އޮންނަ ބޮޑްރޫމަކީ، އެތަނުގެ ފުރިހަމަ މެރީނާތަކާއި، ޚާއްޞަ ބީޗް ކްލަބްތަކާއި، އަދި މަތީ ފެންވަރުގެ ރިސޯޓުތަކަށް ދުވަސްވީ މަޝްހޫރުކަމެއް ލިބިފައިވާ، ދުނިޔޭގެ މުއްސަނދިންގެ މެދުގައި މަގުބޫލު މަންޒިލެކެވެ. މެޑިޓަރޭނިއަންގެ ނުފޫޒުގަދަ ރިސޯޓް އޭރިއާތަކުން ވާދަކުރަމުންދިޔަ ނަމަވެސް، މިފަދަ ގިނަ އަދަދެއްގެ މުއްސަނދިން ތުރުކީގެ ރިވިއޭރާއަށް ޒިޔާރަތްކުރުމަކީ އެ ސަރަހައްދުގެ މަގުބޫލުކަން އަދިވެސް ދެމިއޮތްކަން ހާމަކޮށްދޭ ކަމެކެވެ.
މި އަދަދުތަކުން އަންގައިދެނީ އެ ސަރަހައްދުގައި ޕްރައިވެޓް އޭވިއޭޝަނަށް އޮތް ބޮޑު ތަރުހީބެވެ.
