ޔުނައިޓެޑް އަރަބް އެމިރޭޓްސް (ޔޫއޭއީ) ގެ ދުބާއީން އިސްރާއީލުގެ ތެލް އަވީވަށް ދަތުރުކުރި ފްލައިޑުބާއީގެ މަތިންދާބޯޓެއްގެ ކޮކްޕިޓް ތެރޭގައި ހިނގި ނުރައްކާތެރި ހަމަނުޖެހުމަކާއި ގުޅިގެން، އެ ބޯޓު ކުއްލި ހާލަތުގައި ސައުދީ އަރަބިއްޔާގެ ތަބޫކް އެއާޕޯޓަށް ޖައްސައިފިއެވެ.
ފްލައިޓް ނަންބަރު އެފްޑީބީ1073 (ބޯއިންގް 737 މެކްސް) ގެ މި މަތިންދާބޯޓުގައި 180 އަށްވުރެ ގިނަ ފަސިންޖަރުން ތިބިއިރު، އޭގެ ތެރޭގައި އިސްރާއީލުގެ ގިނަ އަދަދެއްގެ ރައްޔިތުންވެސް ހިމެނެއެވެ. މި ހާދިސާ ހިނގާފައިވަނީ ބޯޓު އުރުދުންއާއި ސައުދީ އަރަބިއްޔާގެ އިންވަކިކުރާ ސަރަހައްދުގެ މަތިން ދަތުރުކުރަމުންދަނިކޮށެވެ.
ފްލައިޓް ރާޑަރުގެ މައުލޫމާތުތަކުން ދައްކާ ގޮތުގައި، ދަތުރަށް ދެ ގަޑިއިރާއި 15 މިނެޓު ވެފައިވަނިކޮށް، 34،000 ފޫޓު އުސްމިނުން ދަތުރުކުރަމުންދިޔަ ބޯޓު ވަނީ އެއް މިނެޓަށްވުރެ ކުރު މުއްދަތެއްގެ ތެރޭގައި 17،000 ފޫޓަށް ތިރިއަށް ވައްޓާލާފައެވެ. އެއަށްފަހު ބޯޓުގެ އުދުހުން އެކި ވަރުން ބަދަލުވަމުން ގޮސްފައިވާއިރު، މިއީ އޮޓޯޕައިލެޓް ނިވާލުމަށްފަހު އަތުން ބޯޓު ކޮންޓްރޯލް ކުރަމުންދިޔަކަމުގެ ނިޝާނެކެވެ. މީގެ އިތުރުން، ބޯޓުން ވަނީ ކުއްލި ނުރައްކަލުގެ ސިގްނަލެއް ކަމަށްވާ "7700″ ގެ އިތުރުން، ހައިޖެކްކުރުން ނުވަތަ ގާނޫނާ ހިލާފަށް ބޯޓުގެ ކޮންޓްރޯލް އަތުލުމުން ފޮނުވާ "7500″ ސިގްނަލްވެސް ފޮނުވާފައެވެ.
މި ކުއްލި ހާދިސާއާ ގުޅިގެން އިސްރާއީލުގެ ކަމާބެހޭ އިދާރާތަކަށް ބޯޓާ ގުޅުން މެދުކެނޑުމުން، ހައިޖެކްކޮށްފާނެކަމުގެ ބިރު ބޮޑުވެ، އިސްރާއީލުގެ ސިފައިންގެ ޖެޓްތައް ވަނީ ވައިގެ ތެރެއަށް ރުކުރުވާލާފައެވެ. އަދި އިސްރާއީލުގެ ބޮޑުވަޒީރު ބެންޖަމިން ނަތަންޔާހޫއާއި ސިފައިންގެ މަތީ ވެރިން ވަނީ ކުއްލި ބައްދަލުވުމެއް ބާއްވާފައެވެ.
ޔަގީން ނުވާ ރިޕޯޓުތަކާއި ބޯޓުން ދަތުރުކުރި ފްލެންސެންޖަރުންގެ މައުލޫމާތަށް ހަވާލާދީ މީޑިއާ ރިޕޯޓުކުރާ ގޮތުގައި، މި ހާދިސާ ހިނގަން މެދުވެރިވީ ކޮކްޕިޓް ތެރޭގައި ޕައިލެޓުންގެ ދެމެދުގައި ހިނގި ޒުވާބަކާ ގުޅިގެންނެވެ. އެގޮތުން އެކަކު ބޯޓު ވައްޓާލަން މަސައްކަތްކުރުމުން، ދެވަނަ ޕައިލެޓާއި ބައެއް ފަސިންޖަރުން ގުޅިގެން އޭނާ ހުއްޓުވީއެވެ. ފަސިންޖަރުން ބުނެފައިވަނީ ކޮކްޕިޓް ތެރޭގައި ލޭ ހުރި ކަމަށާއި، ޕައިލެޓަކަށް ހަމަލާދީ ޒަޚަމްކޮށްލާފައިވާ ކަމަށެވެ. މީސް މީޑިއާ ގައި އާންމުވެފައިވާ ފޮޓޯތަކުންވެސް ފަސިންޖަރެއްގެ ގަމީހުގައި ލޭ ހުރި ތަން ފެނެއެވެ.
ފްލައިޑުބާއީއިން ވަނީ އެ ކުންފުނީގެ ފްލައިޓުގައި ހާދިސާއެއް ހިނގިކަން ކަށަވަރުކޮށްދީފައެވެ. އަދި ބޯޓުން ދަތުރުކުރި އެންމެން ސައުދީ އަރަބިއްޔާގެ ތަބޫކް އެއާޕޯޓަށް ސަލާމަތްތެރިކަމާއެކު ޖައްސާފައިވާ ކަމަށާއި، އެންމެންގެ ހާލުވެސް ރަނގަޅު ކަމަށް އެ ކުންފުނިން ބުނެއެވެ.
ފްލައިޑުބާއީއިން އިތުރަށް މަޢުލޫމާތު ދޭ ގޮތުގައި، ތަބޫކް އެއާޕޯޓުގައި ތިބި ފްލެންސެންޖަރުން އެމީހުން ދާންބޭނުންވި މަންޒިލް ކަމަށްވާ ތެލް އަވީވަށް ގެންގޮސްދިނުމަށްޓަކައި ދެވަނަ މަތިންދާބޯޓެއް ސައުދީ އަރަބިއްޔާއަށް ފޮނުވުމުގެ މަސައްކަތް މިހާރު ދަނީ ކުރަމުންނެވެ.
