އިންޑިއާއާއި އެމެރިކާއާ ދެމެދު އޮތް ސްޓްރެޓީޖިކް ބައިވެރިވުން އިތުރަށް ކުރިއަރުވައި ވަރުގަދަކުރުމަށްޓަކައި ބަދަހި ގުޅުމެއް ބޭއްވުމަށް އިންޑިއާގެ ބޮޑުވަޒީރު ނަރެންދުރަ މޯދީއާއި އެމެރިކާގެ ރައީސް ޑޮނަލްޑް ޓްރަންޕް އެއްބަސްވެވަޑައިގެންފިކަމަށް ނިއު ދިއްލީން ހާމަކޮށްފިއެވެ. މިއީ ވަގުތީ ވިޔަފާރީގެ އެއްބަސްވުމެއްގައި ސޮއިކުރުމަށް އިންޑިއާގެ ޓްރޭޑް މިނިސްޓަރު އެމެރިކާގައި މަޝްވަރާތައް ކުރިއަށްގެންދަވާ ދަނޑިވަޅެއްގައި އައިސްފައިވާ ބަޔާނެކެވެ.
ފޯނުން ކުރެއްވި މަޝްވަރާއެއްގައި މޯދީއާއި ޓްރަމްޕް ވަނީ ވިޔަފާރިއާއި، ދިފާއީ ދާއިރާއާއި، ހަކަތައާއި އަދި މުހިންމު ޓެކްނޮލޮޖީގެ ދާއިރާތަކުން ދެގައުމުގެ މެދުގައި އޮތް ގުޅުންތަކާ މެދު މަޝްވަރާކުރައްވާފައި ކަމަށް މޯދީ 'އެކްސް' ގައި ކުރެއްވި ޕޯސްޓެއްގައި ވިދާޅުވިއެވެ.
"އަޅުގަނޑުމެންގެ 'ކޮމްޕްރެހެންސިވް ގްލޯބަލް ސްޓްރެޓީޖިކް ޕާޓްނަޝިޕް' ކުރިއަށްގެންދިއުމަށްޓަކައި ގާތް ގުޅުމެއް ބެހެއްޓެވުމަށް އެއްބަސްވިން," މޯދީ ލިޔުއްވާފައިވެއެވެ. "އޭގެ އިތުރުން ސަރަޙައްދީ އަދި ބައިނަލްއަޤްވާމީ މައްސަލަތަކާއި، ދުނިޔޭގެ ސުލްޙައާއި ސަލާމަތްތެރިކަން ޤާއިމުކުރުމަށް ކުރެވޭ މަސައްކަތްތަކާ މެދުވެސް ޚިޔާލު ބަދަލުކުރެވުނު." ކަމަށްވެސް ވިދާޅުވިއެވެ.
އިންޑިއާގެ ޓްރޭޑް މިނިސްޓަރު ޕިޔޫޝް ގޯޔަލް ސެޕްޓެމްބަރު 29 އިން އޮކްޓޫބަރު 5 އަށް އެމެރިކާއަށް ކުރައްވަމުންދާ ދަތުރުފުޅަކީ ދެގައުމުގެ މެދުގައި ވެވޭ ވިޔަފާރީގެ އެއްބަސްވުމަކާއި ވަގުތީ އިންތިޒާމަކާ މެދު މަޝްވަރާކުރެއްވުމަށް ކުރައްވާ ދަތުރުފުޅެކެވެ.
"ހަމަހަމަ އަދި ދެގައުމަށްވެސް ފައިދާހުރި" އިންޑިއާ-އެމެރިކާ ވިޔަފާރި އެއްބަސްވުމެއް އެކުލަވާލުމުގެ މަސައްކަތުގެ ތެރެއިން ގޯޔަލް އެމެރިކާގެ މަސްއޫލުވެރިންނާ ބައްދަލުކުރެއްވުމަށް ހަމަޖެހިފައިވާ ކަމަށް އިންޑިއާގެ ޚާރިޖިއްޔާއިން މި ހަފުތާގެ ކުރީކޮޅު ވަނީ ބުނެފައެވެ.
އަންގާރަ ދުވަހު މިލްވޯކީއަށް ވަޑައިގެން ގޯޔަލް ވަނީ ޖީ20 ގެ ވިޔަފާރިއާ ބެހޭ ވަޒީރުންގެ ބައްދަލުވުމެއްގައި ބައިވެރިވެވަޑައިގެން، ނެޝަނަލް އެސޯސިއޭޝަން އޮފް މެނުފެކްޗަރާސްއިން އިންތިޒާމުކުރި ބައްދަލުވުމެއްގައި އެމެރިކާގެ އުފެއްދުންތެރިކަމާއި ޓެކްނޮލޮޖީ ކުންފުނިތަކުގެ އިސްވެރިންނާ ބައްދަލުކުރައްވާފައި ކަމަށް އިންޑިއާގެ ޓްރޭޑް މިނިސްޓްރީން ބުނެއެވެ.
އޭގެ އިތުރުން، އެމެރިކާގެ ޓްރޭޑް ރެޕްރެޒެންޓެޓިވް ޖޭމިސަން ގްރިއާގެ ދަޢުވަތަކަށް ވިސްކޮންސިންގައި އޮންނަ ޖީ20 ވިޔަފާރި ވަޒީރުންގެ ބައްދަލުވުމެއްގައި ބައިވެރިވެވަޑައިގަތުމަށްވެސް ހަމަޖެހިފައިވެއެވެ.
އެމެރިކާއާއި އިންޑިއާ އާ ދެމެދު މަސްތަކެއް ވަންދެން މަޝްވަރާތައް ކުރިއަށްދިޔަ ނަމަވެސް، އިންޑިއާއާއި އެމެރިކާގެ ވިޔަފަރި އެއްބަސްވުން އަދިވެސް ނަތީޖާއާ ހަމަކައަށް އާދެވިފައެއް ނުވެއެވެ. އިންޑިއާއިން ދަނީ ހުށަހެޅިފައިވާ އެއްބަސްވުމުގައި ނިއުދިއްލީއަށް ލުއި ގޮތްތަކެއް ހޯދުމަށް މަސައްކަތްކުރަމުންނެވެ.
މި މަހުގެ ކުރީކޮޅު އިންޑިއާއިން ވަނީ، ރަޝިޔާއިން ތެޔޮ ގަތުމާ ގުޅުވައިގެން އެމެރިކާއިން ނަގަން އުޅޭ އާ ޓެރިފްތަކުގެ ސަބަބުން ދެގައުމުގެ ގުޅުމަށް އަސަރުކޮށްފާނެ ކަމަށް ބުނެ ވޮޝިންގޓަނަށް އިންޒާރު ދީފައެވެ.
