ޕާކިސްތާނުގެ ޕަންޖާބު ޕްރޮވިންސްގެ ވެރިރަށް ލާހޯރުގެ ވައިގެ ފެންވަރު އިންތިހާއަށް ނުސާފުވެ ދުނިޔޭގެ އެންމެ ތަޣައްޔަރު ސިޓީތަކުގެ ލިސްޓުގެ އެންމެ ކުރިއަށް އަލުން އެ ސިޓީ އަރައިފިއެވެ. ވައިގެ ފެންވަރު މޮނިޓަރުކުރާ ބައިނަލްއަގުވާމީ މަންސަ "އައިކިއުއެއާ" ގެ އެންމެ ފަހުގެ މައުލޫމާތުތައް ދައްކާ ގޮތުން، ލާހޯރުގެ ވައިގެ ފެންވަރު ދަރަޖަކުރެވިފައިވަނީ އާންމު ސިއްހަތަށް "ނުރައްކާތެރި" ނުވަތަ ސިއްހަތަށް ގެއްލުން. ހުރި "އަންހެލްތީ" ފެންވަރުގައެވެ.
ފާއިތުވި ކުރު މުއްދަތުގެ ތެރޭގައި ތިމާވެއްށާއި އާންމު ސިއްހަތަށް ކުރިމަތިވެފައިވާ އެންމެ ބޮޑު ގޮންޖެހުމަކަށް ޕާކިސްތާނުގައި ވައި ތަޣައްޔަރުވުމުގެ މައްސަލަ ބަދަލުވެފައިވާއިރު، ޚާއްސަކޮށް ފިނިމޫސުމުގެ ދުވަސްވަރު ލާހޯރު ފަދަ ބޮޑެތި ސިޓީތަކަށް ބޯ ދުމުގެ އަސަރު ވަރަށް ބޮޑަށް ކުރެއެވެ. މިކަން މެދުވެރިވާ މައިގަނޑު ސަބަބުތަކުގެ ތެރޭގައި ކާރުޚާނާތަކުން ބޭރުކުރާ ދުމާއި، ދުއްވާ އުޅަނދުފަހަރުގެ ދުމާއި، ދަނޑުވެރިކަމުގެ ބާކީބައިތައް އެންދުމުގެ އިތުރުން ވައިގެ ދައުރުވުން މަޑުޖެހުން ހިމެނެއެވެ.
އައިކިއުއެއާގެ ލައިވް ޓްރެކަރުގެ ހިސާބުތަކުން ދައްކާ ގޮތުގައި، ހުކުރު ދުވަހުގެ ހެނދުނުގެ ވަގުތެއްގައި ލާހޯރުގެ އެއާ ކޮލިޓީ އިންޑެކްސް (އޭކިއުއައި) އުޅުނީ 167 ގައެވެ. މިއީ ދުނިޔޭގެ އެންމެ ތަޣައްޔަރު ސިޓީތަކުގެ އެންމެ ކުރިއެވެ. މިއާ ޖެހިގެން ދެވަނައިގައި ބަންގްލާދޭޝްގެ ޑާކާ 164 ގެ އޭކިއުއައިއާއެކު އޮތްއިރު، މިސްރުގެ ޤާހިރާ އޮތީ 158 ގެ އޭކިއުއައިއާއެކު ތިންވަނައިގައެވެ. ނަމަވެސް މެންދުރުފަހު 2:00 ޖެހިއިރު ލާހޯރުގެ އޭކިއުއައި 149 އަށް ތިރިވެ، ލިސްޓުގެ 10 ވަނައަށް ވަނީ ބަދަލުވެފައެވެ.
ހުކުރު ދުވަހުގެ ހެނދުނު ދުނިޔޭގެ އެންމެ ތަޣައްޔަރު 30 ސިޓީގެ ތެރޭގައި ހިމެނުނު ޕާކިސްތާނުގެ އެކަނި ސިޓީއަކީ ލާހޯރެވެ. އެ މަންސައިގެ 125 ސިޓީގެ ލިސްޓުގައި ހިމެނޭ ދެވަނަ ސިޓީ ކަމަށްވާ ކަރާޗީ ހެނދުނު އޮތީ 69 ގެ އޭކިއުއައިއާއެކު 34 ވަނައިގައެވެ. ނަމަވެސް މެންދުރުފަހު އޭކިއުއައި 75 އަށް މަތިވެ، ކަރާޗީ ވަނީ 23 ވަނައަށް ޖެހިލާފައެވެ.
އައިކިއުއެއާގެ ރިޕޯޓުގައިވާ ގޮތުން، ލާހޯރުގެ ވައިގެ ތެރޭގައި ނޭވާލާ ނިޒާމަށް ނުރައްކާތެރި "ޕީއެމް 2.5″ ސައިޒުގެ ކުދި މާއްދާތައް ހުރި މިންވަރު ވަނީ ދުނިޔޭގެ ސިއްހަތު ޖާމިއްޔާ (ޑަބްލިއުއެޗްއޯ) އިން ކަނޑައަޅާފައިވާ އަހަރީ ރައްކާތެރި މިންގަނޑަށްވުރެ 15.2 ގުނަ މަތީގައެވެ.
ޕީއެމް 2.5 އަކީ އާންމުކޮށް 2.5 މައިކްރޯމީޓަރަށްވުރެ ކުދި، ނޭވާލާ އިރު ހަށިގަނޑުގެ ތެރެއަށް ފަސޭހައިން ވަންނަ މާއްދާތަކެކެވެ. މިއީ ވައި ތަޣައްޔަރުވުމުގެ މިންގަނޑުތަކުގެ ތެރެއިން ސިއްހަތަށް އެންމެ ބޮޑު ނުރައްކަލެއް ކުރިމަތިކުރުވާ މާއްދާއެވެ.
މިފަދަ ކުދި މާއްދާތައް ހަށިގަނޑުގެ ލޭދައުރުކުރާ ނިޒާމުގެ ތެރެއަށް އަދި ސިކުނޑިއަށް ވާސިލުވުމުގެ ފުރުސަތު އޮންނައިރު، ގިނަ ދުވަސްތަކެއް ވަންދެން މިފަދަ ވައިގެ ތެރޭގައި އުޅެންޖެހުމަކީ ސިއްހީ ބޮޑެތި ނުރައްކާތަކެއް ކުރިމަތިވާނެ ކަމެކެވެ. އެހެންކަމުން ލާހޯރުގައި އުޅޭ އާންމުން ބޭރުގައި ކަސްރަތުކުރުން ހުއްޓާލުމަށާއި، ގޭގޭގެ ކުޑަދޮރުތައް ބަންދުކޮށްގެން ތިބުމަށާއި، ބޭރަށް ނުކުންނައިރު މާސްކު އެޅުމުގެ އިތުރުން ގޭގެ ތެރޭގައި އެއާ ޕިއުރިފަޔާ ބޭނުންކުރުމަށް އައިކިއުއެއާއިން ވަނީ އިރުޝާދު ދީފައެވެ.
މި ކަމާ ގުޅިގެން ޕަންޖާބުގެ ޗީފް މިނިސްޓަރު މަރިޔަމް ނަވާޒް، ލާހޯރުގެ ސީނިއާ އޮފިޝަލުންނާ މުޚާތަބުކުރައްވައި ދެއްކެވި ވާހަކަފުޅުގައި ވިދާޅުވީ، ތިމާވެށީގެ މައްސަލަތައް ހައްލުކުރުމަށް ޕްރޮވިންސް ސަރުކާރުން ބޮޑެތި މަސައްކަތްތަކެއް ކުރަމުންދާ ކަމަށެވެ. ފާއިތުވި އަށް އަހަރު ދުވަހުގެ ތެރޭގައި ސެޕްޓެމްބަރު އަދި އޮކްޓޯބަރު މަހު ލާހޯރާއި ޕަންޖާބުގެ ބައެއް ސަރަހައްދުތަކަށް "ސްމޮގް ޝަޓްޑައުން" އަންނަކަން އޭނާ ފާހަގަކުރެއްވިއެވެ.
"ފާއިތުވި ތިން އަހަރަށް ބަލާއިރު، ސްމޮގް މުޅިން ނެތެކޭ ނުބުނާނަން، ނަމަވެސް ކުރިއަށްވުރެ ސްމޮގްގެ އަސަރު ވަނީ ކުޑަކުރެވިފައި،" މަރިޔަމް ނަވާޒް ވިދާޅުވިއެވެ.
މިއަހަރުގެ ޖަނަވަރީ މަހުގެ ތެރޭގައިވެސް ލާހޯރު ވަނީ 452 ގެ އޭކިއުއައިއާއެކު ދުނިޔޭގެ އެންމެ ތަޣައްޔަރު ސިޓީގެ ގޮތުގައި ރެކޯޑުކުރެވިފައެވެ. އަދި މި ހަފުތާގެ ކުރީކޮޅު ޔޫރަޕިއަން ޔޫނިއަންގެ ކޮޕަރނިކަސް ކްލައިމެޓް އެޓްމޮސްފިއާ މޮނިޓަރިންގް ސާވިސް (ސީއޭއެމްއެސް) އިން ނެރުނު ދިރާސާއެއްގައިވެސް ލާހޯރު ހިމެނިފައިވަނީ އޯޒޯން ލެވެލް އިންތިހާއަށް ދަށަށްގޮސްފައިވާ ސިޓީތަކުގެ ތެރޭގައެވެ.
