އިނގިރޭސިވިލާތުގެ ވެރިރަށް ލަންޑަންގެ ބެޓަރސީ ޕަވަރ ސްޓޭޝަންގެ "ނިއޯން" ގައި މިހާރު ކުރިއަށްދާ ގަދީމީ މިޞްރުގެ ފިރުއައުނު ރާމްސީސް ދެވަނައަށް ހާއްސަކޮށްފައިވާ އާސާރީ މައުރަޒަށް ބޮޑު ތަރުހީބެއް ލިބެމުންދާތީ، އެ މައުރަޒު ބާއްވާ މުއްދަތު އިތުރުކުރުމަށް ނިންމައިފިއެވެ.
މި މައުރަޒު ކުރިން ނިންމާލުމަށް ތާވަލުކޮށްފައި އޮތީ 30 އޮގަސްޓު 2026 އަށެވެ. ނަމަވެސް އިންތިޒާމުކުރާ ފަރާތްތަކުގެ އެދުމުގެ މަތިން އިނގިރޭސިވިލާތުގައި މައުރަޒު ކުރިއަށްދާ މުއްދަތު އިތުރުކުރުމަށް މިޞްރުގެ ކެބިނެޓުން ވަނީ ހުއްދަދީފައެވެ. ފެބްރުއަރީ މަހު މައުރަޒު ހުޅުވިފަހުން ސެޕްޓެމްބަރު 10 އާ ހަމައަށް 140،000 އަށްވުރެ ގިނަ މީހުން ވަނީ މި މައުރަޒަށް ޒިޔާރަތްކޮށްފައެވެ.
"ރާމްސީސް އެންޑް ދަ ގޯލްޑް އޮފް ދަ ފޭރޯސް" ގެ ނަމުގައި ކުރިއަށްދާ މި މައުރަޒު ލަންޑަންގައި އާންމުންނަށް ހުޅުވާލާފައިވަނީ މިއަހަރުގެ ފެބްރުއަރީ 28 ގައެވެ. މި މައުރަޒުގައި ގަދީމީ މިޞްރުގެ ތާރީޚާ ގުޅޭ 180 އަށްވުރެ ގިނަ އަގުހުރި އާސާރީ އައިޓަމް ދައްކާލުމަށް ބަހައްޓާފައިވެއެވެ.
މި މައުރަޒުގެ އެންމެ މުހިންމު އަދި އެންމެ ހާއްސަ އައިޓަމަކީ ނެޝަނަލް މިއުޒިއަމް އޮފް އީޖިޕްޝަން ސިވިލައިޒޭޝަންއިން ކުއްޔަށް ނަގާފައިވާ ރަމްސީސް ދެވަނަ ވަޅުލާފައިވާ ފޮއްޓެވެ. މީގެއިތުރުން ތަހުރީރު މިއުޒިއަމްއާއި، ސައްޤާރާގެ ގަބަރުސްތާނުން ފެނިފައިވާ އާސާރުތަކުގެ އިތުރުން މިޞްރުގެ އެކި މިއުޒިއަމްތަކުން ގެނެސްފައިވާ ތަކެތި ހިމެނެއެވެ. މީގެ ތެރޭގައި މެދު ޒަމާނުން ފެށިގެން ފަހުގެ ޒަމާންތަކަށް ނިސްބަތްވާ ބުދުތަކާއި، ގަހަނާއާއި، ސާމާނާއި، ގަލުގައި ކަނޑައިނަގާފައިވާ ލިޔުންތަކުގެ އިތުރުން ކުލަޖައްސާފައިވާ ސަންދޯއްތައް ހިމެނެއެވެ.
މި މައުރަޒު ބަލާލުމަށް ސްކޫލް ކުދިންނަށާއި އާއިލާތަކަށް ހާއްސަ ފުރުސަތުތަކެއް ވަނީ ހުޅުވާލާފައެވެ. އެގޮތުން ލަންޑަންގެ ކައިރި ސްކޫލްތަކަށް 5،000 ހިލޭ ޓިކެޓު ދިނުމުގެ އިތުރުން، އެހެން ވަގުތުތަކުގައި 15 ޕައުންޑަށް 10،000 ޓިކެޓު ވިއްކުމަށް ވަނީ ހަމަޖައްސާފައެވެ. މި މައުރަޒުން ލިބޭ އާމްދަނީ ބޭނުންކުރުމަށް ހަމަޖެހިފައިވަނީ މިޞްރުގެ އާސާރީ ހޯދުންތަކަށާއި، ކޮންސަވޭޝަން މަސައްކަތްތަކަށެވެ.
މިއީ ނޮވެމްބަރު 2021 ގައި އެމެރިކާގެ ހިއުސްޓަންއިން ފެށި ބައިނަލްއަގުވާމީ ދަތުރުގެ ހަތްވަނަ މަންޒިލެވެ. ލަންޑަންގެ ކުރިން މި މައުރަޒު ވަނީ ސަން ފްރެންސިސްކޯ، ޕެރިސް، ސިޑްނީ، ކޯލޯން އަދި ޓޯކިއޯގައި ބާއްވާފައެވެ. ޕެރިސްގައި ބޭއްވި މައުރަޒަށް 817،000 މީހުން ޒިޔާރަތްކުރިއިރު، ސިޑްނީގައި 500،000 މީހުން އަދި ޓޯކިއޯގައި 350،000 އަށްވުރެ ގިނަ މީހުން ވަނީ މި މައުރަޒު ބަލާލާފައެވެ.
—
