ދިވެހިން އާންމުކޮށް ބޭސްފަރުވާއަށް ގޮސްއުޅޭ ގައުމުތަކަށް އެކަނި، ސަރުކާރުގެ އާސަންދަ ނިޒާމުގެ ދަށުންނާއި އަމިއްލަ ޚަރަދުގައި ބޭސްފަރުވާއަށްދާ ދިވެހިންނަށް ދޫކުރާ 1000 އެމެރިކާ ޑޮލަރުގެ ކޯޓާ ބޭންކުތައް މެދުވެރިކޮށް ދޫކުރުމަށް ސަރުކާރުން ނިންމައިފިއެވެ.
ސަރުކާރުން އެކުލަވާލި މި އުސޫލުގެ މައިގަނޑު ބޭނުމަކީ ބޭރު ފައިސާ ދޫކުރުން ހަރުދަނާކޮށް، ހަގީގީ ބޭސްފަރުވާއަށް ބޭރު ގައުމުތަކަށް ދާ ދިވެހި ރައްޔިތުންނަށް އެހީތެރިކަން ފޯރުކޮށްދިނުމެވެ. އެގޮތުން، ދިވެހިން އެންމެ ގިނައިން ބޭސްފަރުވާއަށް ދާ އިންޑިއާ، ސްރީލަންކާ، އަދި ތައިލެންޑް ފަދަ ގައުމުތަކަށް ދަތުރުކުރާ މީހުންނަށް މި ކޯޓާގެ ދަށުން ފައިސާ ދޫކުރުމުގައި އިސްކަންދެވޭނެއެވެ.
ބޭސްފަރުވާއަށްދާ ފަރާތްތަކުން 1000 ޑޮލަރު ހޯދުމަށްޓަކައި ހުށަހަޅަންޖެހޭ މެޑިކަލް ލިޔެކިޔުންތަކާއި ޑޮކްޓަރުގެ ލަފާތައް ބޭންކުތަކަށް ހުށަހެޅުމުން ފައިސާ ދޫކުރުމުގެ އިންތިޒާމުތައް ވަނީ ހަމަޖައްސާފައެވެ.
