ކުޑަކުދިންނަށް ކުރާ ހުރިހާ ބާވަތެއްގެ އަނިޔާތައް ހުއްޓުވުމަށާއި، ކުޑަކުދިންގެ ހައްގުތައް ހިމާޔަތްކުރުމަށް އެކުލަވާލާފައިވާ ގައުމީ ނިޒާމުތައް އިތުރަށް ވަރުގަދަކުރުމުގެ މަގުސަދުގައި ތައްޔާރުކޮށްފައިވާ ބައިނަލްއަގުވާމީ "ބޮގޯޓާ ކޯލް ޓު އެކްޝަން" ގަރާރުގައި ދިވެހިރާއްޖެއިން ރަސްމީކޮށް ސޮއިކޮށްފި އެވެ.
ދިވެހިރާއްޖޭގެ ފަރާތުން މި ބައިނަލްއަގުވާމީ ގަރާރުގައި ސޮއިކުރެއްވީ އިޖުތިމާއީ އަދި އާއިލީ ތަރައްގީއާ ބެހޭ ވުޒާރާގެ ވަޒީރު ގީލާ އަލީ އެވެ. މި ގަރާރުގެ މައިގަނޑު އަމާޒަކީ ކުޑަކުދިންނަށް ލިބޭ އަނިޔާތަކާއި، އެކުދިންގެ ހައްގުތައް ގެއްލެމުންދާ މައްސަލަތަކަށް ގައުމީ ފެންވަރުގައާއި ބައިނަލްއަގުވާމީ މައިދާނުގައި ފޯރުކޮށްދޭ ރައްދާއި އެހީތެރިކަން އިތުރަށް ހަރުދަނާކޮށް، ގުޅިގެން މަސައްކަތްކުރެވޭނެ އުސޫލުތަކެއް ގާއިމުކުރުމެވެ.
ގަރާރުގައި ސޮއިކުރުމަށް ބޭއްވި ރަސްމިއްޔާތުގައި ވާހަކަފުޅު ދައްކަވަމުން ވަޒީރު ގީލާ އަލީ ވިދާޅުވީ، ކުޑަކުދިންގެ ރައްކާތެރިކަން ކަށަވަރުކުރުމުގެ ދާއިރާއިން ހަގީގީ އަދި އެދެވޭ ކުރިއެރުމެއް ހޯދޭނީ ދިގު މުއްދަތަކަށް ދެމިގެންދާ ފުޅާ މަސައްކަތްތަކެއް ކޮށްގެން ކަމަށެވެ. އަދި މި ސިޔާސަތުތައް ތަންފީޒުކުރުމުގައި ދައުލަތުގެ ކަމާބެހޭ އިދާރާތަކުގެ އިތުރުން، އާއިލާތަކާއި، މަދަނީ ޖަމުއިއްޔާތަކާއި، ބައިނަލްއަގުވާމީ ތަރައްގީގެ ބައިވެރިންގެ އިތުރުން ކުޑަކުދިންގެ ބައިވެރިވުން ވެސް މުހިންމު ކަމަށް ވަޒީރު ފާހަގަކުރެއްވި އެވެ.
މީގެއިތުރުން، އދ. ގެ ކުޑަކުދިންނާ ބެހޭ ފަންޑު (ޔުނިސެފް) ހިމެނޭހެން، ރާއްޖޭގެ އިޖުތިމާއީ ދާއިރާ ހަރުދަނާކުރުމަށް އެހީތެރިކަން ފޯރުކޮށްދޭ ބައިނަލްއަގުވާމީ އެކި ފަރާތްތަކުން ދެއްވާ އެއްބާރުލުން ވެސް ވަޒީރުގެ ވާހަކަފުޅުގައި ފާހަގަކުރެއްވި އެވެ.
