ދިވެހިރާއްޖެއާއި ޕާކިސްތާނާ ދެމެދު ކުރެވޭ ވިޔަފާރީގެ މުއާމަލާތްތަކުގެ އަދަދު ކުރިއަށް އޮތް ދެ އަހަރު ދުވަހުގެ ތެރޭގައި 200 މިލިޔަން އެމެރިކާ ޑޮލަރަށް އިތުރުކުރުމަށް ދެ ގައުމުން ނިންމައިފިއެވެ. މިކަން ހާމަކުރެއްވީ ރައީސުލްޖުމްހޫރިއްޔާ ޑޮކްޓަރ މުހައްމަދު މުއިއްޒު ޕާކިސްތާނަށް ކުރައްވަމުންދާ ރަސްމީ ދަތުރުފުޅުގެ ތެރެއިން، އެ ގައުމުގެ ބޮޑުވަޒީރު ޝެހެބާޒް ޝަރީފާއެކު ދެއްވި ގުޅިފައިވާ ބަޔާނެއްގައެވެ.
ޕާކިސްތާނުގެ ބޮޑުވަޒީރު ޝެހެބާޒް ޝަރީފް ވިދާޅުވީ، ދެ ގައުމުގެ ދެމެދުގައި އޮތް އިގްތިސާދީ ގުޅުންތައް އިތުރަށް ފުޅާކުރުމަކީ މިވަގުތަށް ނުހަނު މުހިންމު ކަމެއް ކަމަށެވެ. މިހާރު ދެ ގައުމުގެ ދެމެދުގައި ކުރެވޭ ތާރީޚީ ވިޔަފާރީގެ މިންވަރަކީ އަހަރަކު 13.9 މިލިޔަން އެމެރިކާ ޑޮލަރެވެ.
ދެ ގައުމުގެ ދެމެދުގައި ބޭއްވުނު މުހިންމު މަޝްވަރާތަކަށް އަލިއަޅުއްވާލައްވަމުން ބޮޑުވަޒީރު ޝެހެބާޒް ފާހަގަކުރެއްވީ، ސަރަހައްދީ އަދި ބައިނަލްއަގުވާމީ މުހިންމު މަސްރަހުތަކާ މެދު ފުޅާ ދާއިރާއެއްގައި ޚިޔާލު ބަދަލުކުރެވުނު ކަމަށެވެ. މީގެ ތެރޭގައި އިގްތިސާދީ ދާއިރާގެ އިތުރުން ދިފާއީ، ތައުލީމީ، އަދި ސިއްހީ ދާއިރާއިން ދިވެހިން ތަމްރީނުކުރުމަށް ޕާކިސްތާނުން ފުރިހަމަ އެހީތެރިކަން ފޯރުކޮށްދޭނެ ކަމުގެ ޔަގީންކަން އޭނާ ދެއްވިއެވެ.
މި ދަތުރުފުޅުގެ ތެރެއިން ދެ ގައުމުގެ ދެމެދުގައި ސޮއިކުރެވުނު 20 ފަހުމުނާމާއަށް އަމަލީ ސިފަ ގެނައުމަށް ޚާއްސަ އިސްކަމެއް ދެއްވާނެ ކަމަށް ބޮޑުވަޒީރު ވިދާޅުވިއެވެ. ދެ ގައުމުގެ ދެމެދުގައި އެކުގައި މަސައްކަތްކުރުމުގެ ދިގު ތާރީޚެއް އޮތް ނަމަވެސް، މިހާރުގެ އިގްތިސާދީ ގުޅުމުން އެކަން އެންމެ ފުރިހަމައަށް ތަސައްވުރު ނުކުރެވޭކަން އޭނާ ފާހަގަކުރެއްވިއެވެ.
"ވިޔަފާރީގެ ގުޅުންތައް ބަދަހިކުރުމަށާއި، އެމްއޯޔޫތައް ތަންފީޒުކުރުން އަވަސްކުރުމަށް މަސައްކަތްކުރާނަން. ރާއްޖެއިން ބޭނުންވާ ކަންކަން ފުރިހަމަކޮށްދިނުމަށް ވީ މިންވަރަކުން އެހީތެރިކަން ފޯރުކޮށްދިނުމަށް އަޅުގަނޑުމެން މިތިބީ ތައްޔާރަށް،" ޕާކިސްތާނުގެ ބޮޑުވަޒީރު ޝެހެބާޒް ޝަރީފް ވިދާޅުވިއެވެ.
ރާއްޖެއާއި ޕާކިސްތާނާ ދެމެދު ސިޔާސީ ގުޅުން ގާއިމުކުރިތާ 60 އަހަރު ފުރޭ މުނާސަބަތާ ދިމާކޮށް ކުރައްވާ މި ދަތުރުފުޅުގައި، ރައީސް ޑރ. މުހައްމަދު މުއިއްޒަށް މަރުހަބާ ދެންނެވުމަކީ ޕާކިސްތާނަށް ލިބުނު ފަޚުރެއް ކަމަށް ބޮޑުވަޒީރު ވިދާޅުވިއެވެ. އަދި ދެ ގައުމުގެ ދެމެދުގައި އޮތް އުޚުއްވަތްތެރި އަދި ޒަމާންވީ ގުޅުން ކުރިއަށް އޮތް ތަނުގައިވެސް އިތުރަށް ބަދަހިވެގެންދާނެ ކަމާމެދު ޝައްކު ނުކުރައްވާ ކަމަށް އޭނާ ވިދާޅުވިއެވެ.
