ހައިސްކޫލް ނިންމިކަން ސާބިތުކޮށްދޭ ރަސްމީ ސަނަދެއް ނެތް ކަމަށް އިންޑޮނޭޝިއާގެ ދުސްތޫރީ ކޯޓުން ކަނޑައެޅުމާ ގުޅިގެން ކުރިމަތިވި ސިޔާސީ ފިއްތުންތަކަށްފަހު، އިންޑޮނޭޝިއާގެ ނައިބު ރައީސް ޖިބްރާން ރަކަބުމިންގް ރަކާ މަޤާމުން އިސްތިއުފާ ދެއްވައިފިއެވެ. ކުރީގެ ރައިސް ޖޯކޯގެ ދަރިފުޅު އިސްތިއުފާ ދެއްވީ އިންޑިނޭޝިއާގެ ރައީސް މަޖުބޫރު ކުރެއްވުމުން ކަމަށްވެސް ރިޕޯޓުތައް ބުނެއެވެ.
ދުނިޔޭގެ ތިންވަނައަށް އެންމެ ބޮޑު ޑިމޮކްރެޓިކް ޤައުމުގެ ވެރިކަމުގެ ނިޒާމަށް ބޮޑު ލޮޅުމެއް ގެނުވި މި ނިންމެވުން އައިސްފައިވަނީ، ރައީސް ޕްރަބޯވޯ ސުބިއަންޓޯއާއި ކުރީގެ ރައީސް ޖޮކޯ ވިޑޯޑޯއާ ދެމެދު އޮތް ސިޔާސީ އިއްތިޙާދު ވަރަށް ބޮޑަށް ހީނަރުވެފައިވާ ދަނޑިވަޅެއްގައެވެ.
ރައީސް ޕްރަބޯވޯ ސުބިއަންޓޯ ރައީސްކަމަށް ގެނައުމުގައި ރައީސް ޖޮކޯ ވިޑޯޑޯ ގެ ހިއްސާ ވަރަށް ބޮޑުވާނެއެވެ.
ޢުމުރުން 39 އަހަރުގެ ޖިބްރާންގެ ތަޢުލީމީ ފެންވަރާ މެދު ފާއިތުވި މަސްތަކުގައި އުފެދިފައިވާ ސުވާލުތަކާ ގުޅިގެން، އޭނާ މަޤާމުން ދުރުކުރުމަށް ކޯޓަށް ހުށަހެޅި މައްސަލަ ބެލުމަށްފަހު ދުސްތޫރީ ކޯޓުން މިދިޔަ މަހު ނިންމާފައިވަނީ، ބޭރު ޤައުމަކުން އޭނާ ހައިސްކޫލް ނިންމިކަން ސާބިތުކޮށްދޭފަދަ އިތުބާރު ހުރި އެއްވެސް ސަނަދެއް ނުވަތަ ޑިގްރީއެއް އޮތްކަމުގެ ހެކި ފެންނަން ނެތް ކަމަށެވެ.
އިންޑޮނޭޝިއާގެ ޤާނޫނު ބުނާގޮތުން މަސްއޫލުވެރިން ރޯފިލާފައި ތިބިކަން ސާބިތުކޮށްދިނުމަށް އިންތިޚާބުގައި ވާދަކުރުމަށް ހައިސްކޫލް ސަނަދު އޮތުމަކީ ލާޒިމު ޝަރުޠެކެވެ. ނަމަވެސް، 2024 ވަނަ އަހަރުގެ އިންތިޚާބުގެ ނަތީޖާ ބާޠިލުކުރުމުގެ ބާރު ކޯޓަށް ލިބިގެންނުވާ ކަމަށް ކޯޓުން ވަނީ ކަނޑައަޅާފައެވެ.
ސިންގަޕޫރުގެ އޯކިޑް ޕާކް ސެކަންޑަރީ ސްކޫލާއި އޮސްޓްރޭލިއާގެ ޔޫ.ޓީ.އެސް އިންސާޗްގައި ތަޢުލީމު ހާސިލުކުރެއްވުމަށްފަހު، ސިންގަޕޫރުގެ މެނޭޖްމަންޓް ޑިވެލޮޕްމަންޓް އިންސްޓިޓިއުޓުން ބެޗްލަރސް ޑިގްރީ ހާސިލުކުރައްވާފައިވާ ކަމަށް ޖިބްރާން ވިދާޅުވި ނަމަވެސް، އެކަމުން ފާޑުކިޔާ ފަރާތްތަކުގެ އަޑު ހިމޭން ކުރެވޭ ގޮތެއް ނުވިއެވެ.
ކޯޓުގެ ނިންމުމާއެކު ޤާނޫނު ހަދާ މަޖިލީހުގެ ތެރެއިން އޭނާ މަޤާމުން ވަކިކުރުމުގެ މަސައްކަތްތައް މި ހަފްތާގައި ވަރުގަދަކުރުމުން، ރައީސް ޕްރަބޯވޯއާ ބައްދަލުކުރައްވައި އިސްތިއުފާ ދެއްވާނެކަން ހާމަކުރެއްވުމަށްފަހު، ހަވީރުގެ ވަގުތެއްގައި އޭނާ ވަނީ ރަސްމީކޮށް މަޤާމުން ވަކިވެވަޑައިގެންފައެވެ.
ކުރީގެ މަޤްބޫލު ރައީސް ޖޮކޯ ވިޑޯޑޯ (ޖޮކޯވީ) ގެ ދޮށީ ދަރިކަލުން ޖިބްރާން ސިޔާސީ މައިދާނަށް ނުކުންނެވީ 2019 ވަނަ އަހަރު ސޯލޯ ސިޓީގެ މޭޔަރުކަމަށް ވާދަކުރައްވައިގެންނެވެ. އޭގެ ކުރިން އޭނާ ހަރަކާތްތެރިވީ ކާބޯތަކެތީގެ ވިޔަފާރީގައެވެ. 2024 ވަނަ އަހަރުގެ ނައިބު ރައީސްކަމަށް ވާދަކުރެއްވުމަށް އޭރު ޤާނޫނީ ގޮތުން ކަނޑައަޅާފައިވާ 40 އަހަރުގެ އުމުރުފުރާ ހަމަނުވާތީ އުފެދުނު ހުރަސް ނައްތާލެވުނީ، ރަޖިސްޓްރޭޝަން ބަންދުވުމުގެ ކުޑައިރުކޮޅެއް ކުރިން ދުސްތޫރީ ކޯޓުން ޤާނޫނަށް ގެނައި އިސްތިސްނާއެއްގެ ދަށުންނެވެ.
އޭރު އެ ކޯޓުގެ އުއްތަމަ ފަނޑިޔާރަކަށް ހުންނެވީ ޖިބްރާންގެ ބޮޑުބޭބޭ އަންވަރު އުސްމާނެވެ. މަޞްލަޙަތު ފުށުއަރާ މައްސަލައެއް ބެއްލެވިކަން ސާބިތުވެ ފަހުން އޭނާ މަޤާމުން ވަކިކުރި ނަމަވެސް، ކޯޓުގެ އެ ނިންމުން އޮތީ ދެމިއެވެ.
މި ސިޔާސީ ކާރިސާގެ ފަހަތުގައި އޮތް މައިގަނޑު ސަބަބަކީ ރައީސް ޕްރަބޯވޯއާއި ކުރީގެ ރައީސް ޖޮކޯވީއާ ދެމެދު އޮތް ގުޅުން ގޯސްވުމެވެ.
ދިހަ އަހަރުގެ ވެރިކަމަށްފަހު ސިޔާސީ ނުފޫޒު ދެމެހެއްޓުމަށް ޖޮކޯވީ އޭނާގެ ދަރިކަލުން ޕްރަބޯވޯގެ ރަނިންގ މޭޓަކަށް ހަމަޖެއްސެވިއިރު، އިންތިޚާބު ކާމިޔާބުކުރުމަށް ޕްރަބޯވޯވެސް ޖޮކޯވީގެ މަޤްބޫލުކަމުގެ ބޭނުން ހިއްޕެވިއެވެ. ނަމަވެސް މި ގުޅުން ހީނަރުވެ، މިދިޔަ ހަފްތާގައި ވަނީ ޕްރަބޯވޯގެ ޗީފް އޮފް ސްޓާފް އަދި ޖޮކޯވީގެ ގާތް ބޭފުޅެއް ކަމަށްވާ ލިސްޓިޔޯ ސިގިތު ޕްރަބޯވޯ، ރައީސްގެ ފޯނު ސިއްރުން އަޑުއެއްސެވި ކަމުގެ ތުހުމަތު ކުރެވިފައެވެ. ޤައުމަށް ޚިޔާނާތްތެރިވުމުގެ މި މައްސަލައިގައި ލިސްޓިޔޯ ހިމެނޭހެން ހަތަރު މީހެއްގެ މައްޗަށް ފުލުހުން ދަނީ ތަޙުޤީޤު ހިންގަމުންނެވެ.
ސިޔާސީ މަސްރަހު ދިރާސާކުރައްވާ ފަރާތެއް ކަމަށްވާ ކެނެޑީ މުސްލިމް ވިދާޅުވި ގޮތުގައި، މި އިސްތިއުފާއަކީ ވަކި އެއް ހާދިސާއެއްގެ ގޮތުގައި ބެލެވެން ނެތް، ކުރިއަށް އޮތް ސިޔާސީ ހަލަބޮލިކަމުގެ ފެށުމެކެވެ.
ޤާނޫނުގައިވާ ގޮތުން މަޤާމު ހުސްވާތާ 60 ދުވަހުގެ ތެރޭގައި ރައީސް ހުށަހަޅުއްވާ ދެ ނަމެއްގެ ތެރެއިން ޤައުމީ މަޖިލީހުން އައު ނައިބު ރައީސަކު އިންތިޚާބު ކުރަންޖެހެއެވެ. މި ބަދަލާއެކު ރައީސް ޕްރަބޯވޯއަށް އޭނާގެ ގެރިންދްރާ ޕާޓީގެ ވަށައިގެން ބާރުތައް އެއްކޮށްލުމަށް ފުރުޞަތު ލިބުނު ނަމަވެސް، މިދިޔަ އަހަރުގެ ނޮވެމްބަރު މަހު %81.2 ގައި ހުރި ރައީސްގެ މަޤްބޫލުކަން މިއަހަރުގެ އޮކްޓޯބަރު މަހު %44.5 އަށް ވެއްޓި، މަގުމަތީގެ މުޒާހަރާތަކާއި އިޤްތިޞާދީ ދަތިތަކާ ކުރިމަތިވެފައިވާތީ، 2029 ވަނަ އަހަރުގެ އިންތިޚާބާ ދިމާކޮށް އިއްތިޙާދުގެ ބައިވެރިންގެ ފަރާތުން ބޮޑެތި ގޮންޖެހުންތަކެއް ކުރިމަތިވުމުގެ ފުރުޞަތު އެބައޮތެވެ.
