އިންޑޮނޭޝިއާގެ ސައުތު ސުލަވެސީގެ މަކައްސަރުގައި ހުރި ސަރުކާރު އިމާރާތަކުގައި ހުޅު ޖެހުމުން އަލިފާން ރޯވެ، 3 މީހުން މަރުވެ، އިތުރު 5 މީހުންނަށް އަނިޔާވެއްޖެއެވެ. މި ހާދިސާ ހިނގާފައިވަނީ މުޅި އިންޑޮނޭޝިއާގައި ހިނގަމުންދާ މުޒާހަރާތަކުގެ ތެރޭންނެވެ. މި މުޒާހަރާތައް ފެށިފައިވަނީ އިގްތިސާދީ ގޮތުން ދަތި އިގްތިސާދީ ގޮތުން ދަތި ދުވަސްވަރެއްގައި، ޕާލަމެންޓްގެ މެމްބަރުންގެ މުސާރަ ބޮޑު ކުރުމާ ގުޅިގެން އާންމުން ހިތްހަމަނުޖެހުން ފާޅުކުރަން ފެށުމުންނެވެ. އަދި، މުޒާހަރާތަކާ ދިމާކޮށް، މޮޓޯސައިކަލް ޑެލިވަރީ ގައި އުޅުނު ޑްރައިވަރެއް ފުލުހުންގެ އުޅަނދެއްގެ ދަށުވެ، މަރުވި ކަމަށް ބެލެވޭ ހާދިސާއަކާ ގުޅިގެން މުޒާހަރާތައް ވަނީ އިތުރަށް ފުޅާވެފައެވެ. މުޒާހަރާތަކުގައި ބައިވެރިވާ ފަރާތްތަކުން އިހުތިޖާޖު ކުރަމުންދަނީ ތަކެތީގެ އަގު ބޮޑު ވުމާއި މުސާރަ ކުޑަވުމާ ގުޅިގެންނެވެ.
ޖަކާޓާ އަދި ބާންޑުންގް ފަދަ ބޮޑެތި ސިޓީތަކަށް މުޒާހަރާތައް ފެތުރި، މިހާތަނަށް 200 އަށްވުރެ ގިނަ މީހުންނަށް އަނިޔާވެފައިވެއެވެ. ޑެލިވަރީގައި އުޅުނު މީހާ މަރުވި ހާދިސާއާ ގުޅިގެން ފުލުހުންގެ 7 މީހެއްގެ މައްޗަށް ތަހުގީގު ހިންގަމުންދާ ކަމަށް އިންޑޮނޭޝިއާގެ އިސް ފަރާތްތަކުން މަޢުލޫމާތު ދީފައިވެއެވެ.
އިންޑޮނޭޝިއާގެ ރައީސް ޕްރަބޯވޯ ސުބިއަންތޯ ވަނީ މި ހަމަނުޖެހުންތަކާ ގުޅިގެން ތަހުގީގެއް ފަށައި، ރައްޔިތުންނަށް ހިމޭން ވުމަށް ގޮވާލައްވާފައެވެ. އަދި މުޒާހަރާތަކުގައި އިމާރާތަކުގައި ހުޅުޖަހާ ފަރާތްތަކާ ދެކޮޅަށް ގާނޫނީ ފިޔަވަޅު އަޅާނެ ކަމަށްވެސް ވަނީ ވިދާޅުވެފައެވެ. މި ހަމަނުޖެހުންތަކާ ގުޅިގެން ސަލާމަތީ ބާރުތަކުން ވަނީ އެކި ސަރަހައްދުތަކުގައި ސަލާމަތީ ފިޔަވަޅުތައް ވަރުގަދަ ކޮށްފައެވެ. އަދި އިތުރު ހަމަނުޖެހުން ހުއްޓުވުމަށް މަސައްކަތްތަކެއް ކުރަމުންދާ ކަމަށް ވެސް އިންޑޮނޭޝިއާގެ ފުލުހުން ދަނީ އިއުލާން ކުރަމުންނެވެ.
