ޔޫރަޕިއަން ޔޫނިއަން (އީޔޫ) ގެ ކުރީގެ އިސް ޑިޕްލޮމެޓެއް ކަމަށްވާ ގާހާޑް ސަބާތިލް، ޗައިނާގެ ޖާސޫސީ އިދާރާތަކާ ގުޅުން އޮތް ކަމަށް ތުހުމަތުކޮށް ޖަރުމަނުގެ އިންޓެލިޖެންސް ސާވިސްއިން އޭނާއަށް ފާރަވެރިވީ ގާނޫނާ އެއްގޮތަށް ކަމަށް ބާލިންގެ ކޯޓަކުން ނިންމައިފިއެވެ. އެޑްމިނިސްޓްރޭޓިވް ކޯޓުން ނިންމި ނިންމުމުގައި ބުނެފައިވަނީ، ސަބާތިލްގެ ފޯނު ކޯލްތައް އަޑުއެހުމަށް އަމުރު ނެރުނުއިރު، އޭނާ ޖާސޫސީ ހަރަކާތްތަކެއްގައި އުޅޭ ކަމަށް ބެލެވޭނެ "ސާބިތު ހަގީގީ ހެކިތަކެއް" ހުރި ކަމަށެވެ.
ސަބާތިލް އަކީ މީގެ ކުރިން ޔޫރަޕިއަން އެކްސްޓާނަލް އެކްޝަން ސާވިސްގެ އިސް މަގާމުތަކެއް ފުރުއްވާފައިވާ ބޭފުޅެކެވެ. މީގެ އިތުރުން އޭނާ ވަނީ ދެކުނު ކޮރެއާއަށް އީޔޫއިން ކަނޑައަޅާފައި ހުންނަ ސަފީރުގެ މަގާމުވެސް އަދާކުރައްވާފައެވެ. އޭނާގެ ސެކިއުރިޓީ ކްލިއަރެންސް ބާތިލްކޮށްފައިވަނީ، ޗައިނާގެ ރައްޔިތަކާ އެކު ބޭއްވި ލޯބީގެ ގުޅުމެއް ހާމަކޮށްފައި ނުވާތީއެވެ.
ޖާސޫސީ އިދާރާތަކުން ބުނާ ގޮތުގައި، ސަބާތިލް އަކީ ޗައިނާގެ އޭޖެންސީތަކުން އާންމުކޮށް އަމާޒުކުރާ ފަދަ ޝަހުސިއްޔަތެކެވެ. ޗައިނާގެ ޖާސޫސީ އިދާރާތަކުން އާންމުކޮށް އަމާޒުކުރަނީ ބޮޑެތި ނެޓްވޯކްތައް އޮންނަ، މުހިންމު މައުލޫމާތުތައް އެނގޭ، މަގާމުތަކުން ރިޓަޔާކޮށްފައިވާ ނުވަތަ ކުރީގެ އިސް އޮފިޝަލުންނަށެވެ.
މި މައްސަލައިގައި 2020 ވަނަ އަހަރު ޕްރޮސެކިއުޓަރުން ވަނީ ސަބާތިލްގެ މައްޗަށް ކުރެވުނު ޖާސޫސީ ދައުވާތައް ދޫކޮށްލާފައެވެ. ނަމަވެސް، ކޯޓުގައި ކުރިއަށްދިޔަ އަޑުއެހުމުގައި ސަބާތިލް ވަނީ ޖަރުމަނުގެ އިންޓެލިޖެންސް ސާވިސްގެ އަމަލުތަކަށް ވަރަށް ބޮޑަށް ފާޑުވިދާޅުވެފައެވެ. އެހެންނަމަވެސް، ކޯޓުން ބުނީ މި މައްސަލައިގައި ބަލާފައިވަނީ ހަމައެކަނި ފާރަވެރިވުމުގެ އަމުރު ނެރުނު ވަގުތު އެކަމަށް އެކަށީގެންވާ ސަބަބުތަކެއް ހުރިތޯ އެކަނި ކަމަށެވެ.
މި ނިންމުމަކީ ޔޫރަޕްގެ ގައުމުތަކުގައި ޗައިނާގެ ޖާސޫސީ ހަރަކާތްތައް އިތުރުވަމުންދާ ކަމަށް ބުނެ ކަންބޮޑުވުން ފާޅުކުރަމުންދާ ދަނޑިވަޅެއްގައި އައި ނިންމުމެކެވެ. މިފަދަ ތުހުމަތުތަކާ ގުޅިގެން އީޔޫގެ އެކި ގައުމުތަކުގައި މިހާރުވެސް ގިނަ ތަހުގީގުތަކެއް ހިންގައި މީހުން ހައްޔަރުކުރަމުންދާކަން ފާހަގަކުރެވެއެވެ.
