ޗައިނާގެ ކުރީގެ ޖަސްޓިސް މިނިސްޓަރު ޓޭންގް ޔީޖުން ރިޝްވަތު ހިފުމުގެ ކުށުގައި އުމުރަށް ޖަލަށް ލުމަށް އެ ގައުމުގެ ކޯޓަކުން ހުކުމްކޮށްފި އެވެ. އުމުރުން 64 އަހަރުގެ ޓޭންގްގެ މައްޗަށް މި ހުކުމް އިއްވީ ފޫޖިއަން ޕްރޮވިންސްގެ ޒިއަމެން އިންޓަރމީޑިއަޓް ޕީޕަލްސް ކޯޓުންނެވެ.
ކޯޓުގެ ނިންމުމުގައި ބަޔާންކޮށްފައިވާ ގޮތުގައި، 2006 އިން 2022 އާ ދެމެދު 16 އަހަރުގެ މުއްދަތަށް ޓޭންގް ވަނީ 137 މިލިއަން ޔުއާން (ގާތްގަނޑަކަށް 14.38 މިލިއަން ޑޮލަރު) އަށް ވުރެ ގިނަ ފައިސާ އާއި މުދާ ރިޝްވަތުގެ ގޮތުގައި ނަގާފައެވެ. މި ރިޝްވަތުގެ ސަބަބުން ދައުލަތަށާއި އާންމު މަސްލަހަތަށް "ވަރަށް ބޮޑެތި ގެއްލުންތަކެއް" ލިބިފައިވާ ކަމަށް ކޯޓުން ފާހަގަކުރިއެވެ.
ޓޭންގްގެ ތަހުގީގުން ހާމަވި ގޮތުގައި، އޭނާ ވަނީ އޭނާގެ މަގާމުގެ ނުފޫޒު ބޭނުންކޮށްގެން ކުންފުނިތައް ލިސްޓުކުރުމާއި، ބިންތައް އަނބުރާ ގަތުމާއި، ބޭންކު ލޯނުތައް ހޯދައިދިނުމުގެ އިތުރުން އެކި މައްސަލަތައް ވަކި ގޮތަކަށް ނިންމުމުގައި އެކި ފަރާތްތަކަށް ނާޖާއިޒު ފައިދާ ހޯދައިދީފައެވެ. މީގެ އިތުރުން، އޭނާގެ އާއިލާގެ މެންބަރުންނަށް މާލީ މުއާމަލާތްތަކުން ފައިދާ ހޯދައިދިނުމާއި، އަގުބޮޑު ހަދިޔާތަކާއި ދަތުރުތައް ގަބޫލުކޮށްފައިވާ ކަމަށްވެސް ތުހުމަތު ކުރެވިފައިވެއެވެ.
ކޮރަޕްޝަންގެ މި މައްސަލައާ ގުޅިގެން 2024 ވަނަ އަހަރު ޓޭންގް ވަނީ ކޮމިއުނިސްޓް ޕާޓީން ވަކިކޮށްފައެވެ. ކޯޓުގެ ހުކުމާއެކު އޭނާގެ އަމިއްލަ ހުރިހާ މުދަލެއް ދައުލަތަށް ހިފޭގޮތަށް ނިންމައި، ސިޔާސީ ހުރިހާ ހައްގުތަކެއް އުމުރަށް ވަނީ ނިގުޅައިގަނެފައެވެ.
މިއީ ޗައިނާގެ ރައީސް ޝީ ޖިންޕިންގް 2012 ވަނަ އަހަރު ފެއްޓެވި ކޮރަޕްޝަނާ ދެކޮޅު ވަރުގަދަ ކެމްޕޭނުގެ ދަށުން އެޅުނު ފިޔަވަޅެކެވެ. މި ކެމްޕޭނުގެ ދަށުން މިހާތަނަށް 200,000 އަށް ވުރެ ގިނަ އޮފިޝަލުންނަށް ވަނީ އަދަބު ދީފައެވެ. ޓޭންގްގެ ކުރިން 2022 ވަނަ އަހަރު، ކުރީގެ އެހެން ޖަސްޓިސް މިނިސްޓަރެއް ކަމަށްވާ ފޫ ޒެންގްހުއާ އަށް ވެސް ވަނީ ރިޝްވަތުގެ މައްސަލައިގައި މަރުގެ ހުކުމެއް އިއްވައި، ފަހުން އެ ހުކުމް އުމުރު ދުވަހުގެ ޖަލު ހުކުމަކަށް ބަދަލުކޮށްފައެވެ.
މި މައްސަލައަކީ ޗައިނާގެ މަދަނީ އަދި އަސްކަރީ އިދާރާތަކުގެ އިސް އޮފިޝަލުންގެ މެދުގައި އޮތް ކޮރަޕްޝަން ނައްތާލުމަށް ކުރަމުންދާ މަސައްކަތުގެ ތެރެއިން ފާހަގަކޮށްލެވޭ މުހިންމު މައްސަލައެކެވެ.
