ދުނިޔޭގެ ސިޔާސީ މަސްރަހަށް އަންނަ ބަދަލުތަކާއެކު، އިންޑިއާގެ ދިފާއީ އުފެއްދުންތައް އަމިއްލައަށް އެތެރޭގައި އުފެއްދުމަށާއި ބޭރު ގައުމުތަކަށް އެކްސްޕޯޓް ކުރުމަށް ކުރާ މަސައްކަތްތައް އެ ގައުމުން ވަނީ ވަރަށް ބޮޑަށް އަވަސްކޮށްފައެވެ. އެންމެ ފަހުގެ ތަފާސްހިސާބުތަކުން ދައްކާ ގޮތުގައި މި ނިމުނު މާލީ އަހަރު އިންޑިއާއިން 384 ބިލިއަން ރުޕީސްގެ ދިފާއީ ސާމާނު އެކްސްޕޯޓްކޮށްފައިވާއިރު، މިއީ އޭގެ ކުރީ އަހަރާ އަޅާބަލާއިރު 63 އިންސައްތައިގެ ކުރިއެރުމެކެވެ.
ބޮޑުވަޒީރު ނަރެންދުރަ މޯދީ ވެރިކަމާ ހަވާލުވެވަޑައިގަތުމުގެ ކުރިން، 2013-14 ވަނަ އަހަރާ އަޅާބަލާއިރު މިއީ 56 ގުނަ އިތުރު އަދަދެކެވެ. ސިޕްރީ ގެ ރިޕޯޓްތަކުން ދައްކާ ގޮތުގައި އިންޑިއާ މިހާރު އޮތީ ދުނިޔޭގެ ހަތިޔާރު އެކްސްޕޯޓްކުރާ ގައުމުތަކުގެ ލިސްޓުގެ 27 ވަނައިގައެވެ. އިންޑިއާގެ އަމާޒަކީ 2029 ވަނަ އަހަރު އަންނަންވާއިރަށް އެކްސްޕޯޓް 500 ބިލިއަން ރުޕީސްއަށް މަތިކޮށް، 100 އަށްވުރެ ގިނަ ގައުމަށް ހަތިޔާރު ފޯރުކޮށްދިނުމެވެ.
ފާއިތުވި އަހަރުތަކުގައި އިންޑިއާގެ ދިފާއީ އުފެއްދުންތައް އެންމެ ގިނައިން ގަނެފައިވަނީ އަރުމޭނިއާ، ފިލިޕީންސް އަދި ވިއެޓްނާމުންނެވެ. މީގެ ކުރިން އިންޑިއާގެ އެކްސްޕޯޓް ރެކޯޑްތަކުން ނުފެންނަ މި ގައުމުތަކުގެ ތެރެއިން އަރުމޭނިއާއަކީ މިހާރު އިންޑިއާގެ އެންމެ ބޮޑު އެއް ކަސްޓަމަރެވެ. ރަޝިޔާއިން އަރުމޭނިއާއަށް ދެމުންދިޔަ އެހީތެރިކަން ކުޑަވުމާ ގުޅިގެން، އެ ގައުމުން މިހާރު ވަނީ އިންޑިއާގެ އާކާޝް މިސައިލް ސިސްޓަމްތަކާއި ރޮކެޓް ލޯންޗަރުތައް ބޭނުންކުރަން ފަށާފައެވެ.
ދެކުނު ޗައިނާ ކަނޑުގެ މައްސަލައިގައި ޗައިނާގެ ނުފޫޒާ ދެކޮޅަށް ފިލިޕީންސް އާއި ވިއެޓްނާމުން ވެސް ދަނީ އިންޑިއާގެ ބްރަހްމޯސް ކްރޫޒް މިސައިލާއި ކަނޑުގެ ދިފާއީ ނިޒާމުތައް ގަންނަމުންނެވެ. މީގެ އިތުރުން، އިންޑިއާގެ އަމިއްލަ ކުންފުނިތަކުން ވެސް ދަނީ މި ދާއިރާގައި ބޮޑެތި ކުރިއެރުންތައް ހޯދަމުންނެވެ. ބެންގަލޫރުގެ އެސްއެސްއެސް ޑިފެންސް ކުންފުނިން ބުނާ ގޮތުގައި އެ ކުންފުނީގެ އުފެއްދުންތައް ސަރުކާރު ކުންފުނިތަކަށްވުރެ އަގުހެޔޮކޮށް ލިބޭނެއެވެ.
ޔޫކްރެއިން ހަނގުރާމައިގެ ސަބަބުން އެމެރިކާ އާއި ރަޝިޔާ ފަދަ ބޮޑެތި ގައުމުތަކުގެ ހަތިޔާރު އުފެއްދުމަށް ބުރޫއަރާފައިވުމަކީ އިންޑިއާއަށް ލިބުނު ފުރުސަތެކެވެ. އަދި ޗައިނާގެ އުފެއްދުންތަކުގެ މަރާމާތު ކުރުމުގައި ހުރި ދަތިތަކުގެ ސަބަބުން، ދެކުނު އޭޝިއާގެ ގައުމުތަކުން ވެސް މިހާރު އިސްކަންދެނީ އިންޑިއާގެ އުފެއްދުންތަކަށެވެ.
އިންޑިއާގެ މި ފުޅާވަމުންދާ ދިފާއީ ދާއިރާއަކީ ހަމައެކަނި ވިޔަފާރިއެއް ނޫނެވެ. މިއީ ދުނިޔޭގެ ބާރުތަކުގެ ތަރުތީބު ބަދަލުވަމުންދާ ދަނޑިވަޅެއްގައި، އަމިއްލަ ފައިމައްޗަށް ތެދުވެ، ބައިނަލްއަގުވާމީ މައިދާނުގައި މުހިންމު ދައުރެއް އަދާކުރުމަށް އިންޑިއާއިން ގެންގުޅޭ ސްޓްރެޓީޖިކް ސިޔާސަތެއްގެ ބައެކެވެ.
