އިނގިރޭސި ޕްރިމިއާ ލީގުގެ ލިވަޕޫލް ދޫކޮށްލުމަށް ނިންމި ނިންމުމާ މެދު އެއްވެސް ވަރަކަށް ހިތާމަ ނުކުރާ ކަމަށާއި، އެ ނިންމުން ނިންމީ ވަރަށް ބޮޑަށް ވިސްނުމަށްފަހު ކަމަށް އެ ޓީމުގެ ތަރި މުހައްމަދު ސަލާހު ބުނެފިއެވެ. ސަލާހު މިހެން ބުނީ ލިވަޕޫލާ އެކު އޭނާ ހޭދަކުރި ދުވަސްތަކާ ގުޅޭގޮތުން ތައްޔާރުކޮށްފައިވާ ޑޮކިއުމެންޓްރީއެއްގައެވެ.
ލިވަޕޫލްގެ އެންފީލްޑް ދަނޑުގައި ބްރެންޓްފޯޑާ ދެކޮޅަށް ކުޅޭ މެޗަކީ ސަލާހު އެ ދަނޑުގައި ކުޅޭނެ ފަހު މެޗަށް ވުން ގާތްއިރު، އޭނާ ބުނީ ޓީމުގެ ކަންކަން މިހާރު ހުރީ އެންމެ ރަނގަޅު މަގަކު ނޫން ކަމަށެވެ.
"އަހަރެން މިތާ މަޑުކުރުމަށް ދެ އަހަރުގެ ކޮންޓްރެކްޓެއްގައި ސޮއިކުރިން، އެކަމަކު އެއް އަހަރު ފަހުން އަހަރެން މި ދަނީ. މި ނިންމުމާ މެދު އެއްވެސް ވަރަކަށް ހިތާމައެއް ނުކުރަން،" ސަލާހު ބުންޏެވެ.
ސަލާހު އިތުރަށް ކިޔައިދިން ގޮތުގައި އޭނާގެ ނިންމުން ބަދަލުކުރުމަށް ވަގުތު ލިބުނު ނަމަވެސް، ކަންކަން ދިޔަ ގޮތުން އެއީ އެންމެ ރަނގަޅު ނިންމުން ކަމަށް އޭނާ ގަބޫލުކުރެއެވެ. އޭނާ ބުނީ ސަޕޯޓަރުންނަށް އޭނާގެ އިހުލާސްތެރިކަން އެނގޭނެ ކަމަށާއި، ކްލަބަށްޓަކައި އޭނާ ކުރި މަސައްކަތް ސަޕޯޓަރުން ބަލައިގަންނާނެ ކަމުގެ ފުރިހަމަ އިތުބާރު އެބައޮތް ކަމަށެވެ.
ކްލަބް ދޫކޮށްލާއިރު ސަޕޯޓަރުންގެ ފަރާތުން ލިބޭ ލޯތްބަކީ އެންމެ މުހިންމު ކަންތައް ކަމަށް ސަލާހު ފާހަގަކުރިއެވެ.
"މިއީ ކިބުރުވެރިކަމެއް ކަމަށް ހީވެދާނެ، އެކަމަކު އަހަރެން ގަބޫލުކުރަނީ ލިވަޕޫލަށް ޕްރިމިއާ ލީގު ހޯދައިދިނުމުގައި އަހަރެންގެ ބޮޑު ހިއްސާއެއް އޮތް ކަމަށް. އެ އިހުސާސް އަހަރެން ކުރަން،" ސަލާހު ބުންޏެވެ. އޭނާ ވަނީ މިދިޔަ ސީޒަނުގައި ލިވަޕޫލުން ހޯދި ކާމިޔާބީތަކުގައި އޭނާގެ ދަރިންނާއެކު އުފާފާޅުކުރި ހަނދާންތައް އައުކޮށްފައެވެ.
ނިމިދިޔަ ސީޒަނުގައި 29 ގޯލު ޖަހައި 18 އެސިސްޓް ހެދި ނަމަވެސް، މި ސީޒަނަކީ ސަލާހަށާއި ލިވަޕޫލަށް އުނދަގޫ ސީޒަނެކެވެ. މި ސީޒަނުގައި އޭނާއަށް ޖެހިފައިވަނީ 7 ގޯލެވެ. މީގެ ސަބަބުން ލިވަޕޫލް ތާވަލުގެ ފަސްވަނައިގައި އޮތްއިރު، އެއްވެސް ތައްޓެއް މި ސީޒަނުގައި ކްލަބަށް ކާމިޔާބު ކުރެވިފައެއް ނުވެއެވެ.
ކަންކަން މިހެން ހުރި ނަމަވެސް، މުހައްމަދު ސަލާހަކީ އަދިވެސް ލިވަޕޫލްގެ ސަޕޯޓަރުންގެ މެދުގައި އެންމެ މަގުބޫލު އެއް ކުޅުންތެރިޔާއެވެ. އޭނާގެ ކާމިޔާބު ތާރީޚާއި ލިވަޕޫލަށް ހޯދައިދިން ރެކޯޑުތަކަކީ އެ ކްލަބުގެ ތާރީޚުގައި އަބަދުވެސް ފާހަގަކުރެވޭނެ ކަންކަމެވެ.
