ޕޯޗުގަލްގެ ގައުމީ ޓީމުގެ ކޯޗު ރޮބާޓޯ މާޓިނޭޒް، އެ ޓީމުގެ ކެޕްޓަން ކްރިސްޓިއާނޯ ރޮނާލްޑޯ އާއި ޒުވާން ތަރި ޔާއޯ ފީލިކްސްއަށް ވަރަށް ބޮޑަށް ތައުރީފުކޮށްފިއެވެ. ސްޕޭންގެ ރޭޑިއޯ ޕްރޮގްރާމަށް ދިން އިންޓަވިއުއެއްގައި މާޓިނޭޒް ވަނީ ކުރިއަށް އޮތް 2026 ވަނަ އަހަރުގެ ވޯލްޑް ކަޕާ ބެހޭގޮތުންނާއި ޓީމުގެ މުހިންމު ކުޅުންތެރިންނާ ބެހޭގޮތުން ވާހަކަދައްކާފައެވެ.
ރޮނާލްޑޯއާ ބެހޭގޮތުން ވާހަކަދައްކަމުން މާޓިނޭޒް ބުނީ ރޮނާލްޑޯއަކީ ފުޓްބޯޅައިގެ އައިކޮނެއް ކަމަށާއި، އޭނާ ކޮށްފައިވާ މަސައްކަތްތަކަކީ އެތައް އަހަރެއް ވަންދެން ފެންނަން ހުންނާނެ ނަމޫނާއެއް ކަމަށެވެ. "މިއީ އޭނާގެ ހަވަނަ ވޯލްޑް ކަޕަށް ވެގެންދާނެ. މިއީ އޭނާއަށް ވަރަށް ތަފާތު އަދި ހާއްސަ ތަޖުރިބާއަކަށް ވާނެ،" މާޓިނޭޒް ބުންޏެވެ. އަދި ރޮނާލްޑޯގެ ކެއުމާއި ދިރިއުޅުމުގެ އާދަކާދަތަކަކީ ޒުވާން ކުޅުންތެރިން ނަމޫނާއަކަށް ބަލަންޖެހޭ ކަންކަން ކަމަށްވެސް އޭނާ ފާހަގަކުރިއެވެ.
ސައުދީ ޕްރޯ ލީގުގެ އައްނަޞްރުގައި ކުޅެމުންދާ ޔާއޯ ފީލިކްސްއާ ބެހޭގޮތުން މާޓިނޭޒް ބުނީ، މިއީ ފީލިކްސްގެ ކެރިއަރުގައި މިހާތަނަށް ފެނުނު އެންމެ ފުރިހަމަ ސީޒަން ކަމަށެވެ. އައްނަޞްރުގެ މަޝްރޫއުގެ ތެރެއިން ފީލިކްސްއަށް މިނިވަންކަމާއެކު ކުޅުމުގެ ފުރުސަތު ލިބި، އޭނާގެ ހަގީގީ ހުނަރު މިހާރު ފެންނަމުންދާ ކަމަށް ކޯޗު ބުންޏެވެ. މާޓިނޭޒް ގަބޫލުކުރާ ގޮތުގައި ފީލިކްސް މިހާރު ހުރީ ވަރަށް ބޮޑަށް ފައްކާވެ، ގައުމީ ޓީމަށް އެހީތެރިވެދެވޭނެ ފަދަ މޮޅު ފޯމެއްގައެވެ.
ވޯލްޑް ކަޕް ކާމިޔާބުކުރާނެ ފޭވަރިޓުންނާ ބެހޭގޮތުން ސުވާލުކުރުމުން މާޓިނޭޒް ބުނީ، ފޭވަރިޓުންގެ ގޮތުގައި ބަލަންޖެހޭނީ ކުރިން މުބާރާތް ކާމިޔާބުކޮށްފައިވާ ސްޕޭން، ފްރާންސް، އާޖެންޓީނާ އަދި ބްރެޒިލް ފަދަ ޓީމުތައް ކަމަށެވެ. ޕޯޗުގަލްއަކީ މުބާރާތް ކާމިޔާބުކުރާނެ ޓީމެއްގެ ގޮތުގައި މީހުން ދެކޭތީ އެކަމަށް އޭނާ ޝުކުރުވެރިވާ ކަމަށްވެސް ބުންޏެވެ.
ނިންމާލަމުން މާޓިނޭޒް ފާހަގަކުރީ ކުރިއަށް އޮތް ވޯލްޑް ކަޕަކީ ގިނަ ގައުމުތަކެއް ބައިވެރިވާ މުބާރާތަކަށް ވުމުން، މޫސުމާއި އުސްމިން ފަދަ ގިނަ ކަންތައްތަކެއް ނަތީޖާއަށް އަސަރުކުރާނެ ކަމަށެވެ. ނަމަވެސް ޕޯޗުގަލް ޓީމު އޮތީ މިހާރު ވަރަށް ބޮޑަށް ކުރިއަރާފައި ކަމަށާއި، ޓީމުގެ އުންމީދުތައް ވަރަށް މަތި ކަމަށް އޭނާ ވިދާޅުވިއެވެ.
