ބޯޅަ ކުޅުންތެރިޔާ ލިއޮނެލް މެސީގެ ބޮޑު ބުދެއް އިންޑިއާގައި އިއްޔެ ބާލައިފިއެވެ. ކަމާބެހޭ ފަރާތްތަކުން ބުނި ގޮތުގައި، ވައިގަދަވުމުގެ ސަބަބުން މި ބުދު ނުރައްކާތެރި މިންވަރަކަށް ހެލޭތީ ކަމަށް ބުނެ އާންމުން ޝަކުވާ ކުރުމާ ގުޅިގެން ވެސްޓް ބެންގޯލްގެ ވެރިރަށް ކޮލްކަޓާ ސަރުކާރުން މި ބުދު ވަނީ ތިރިކޮށްފައެވެ.
ނޫސްވެރިންނަށް ފެނުނު ގޮތުގައި، 21 މީޓަރު (70 ފޫޓު) ގެ މި ބުދު ނެގުމަށްޓަކައި ހައިޑްރޮލިކް ކްރޭނާއި ވާ ބޭނުންކުރިއެވެ. އަދި ނެގުމަށްފަހު، މަތި ހުޅުވާލާފައި އޮތް ބޮޑު ލޮރީއަކަށް އަރުވައިގެން އެ ބުދު އެ ތަނުން ގެންދިޔައެވެ.
"ވައިގެ ތެރޭގައި ބުދު ހެލޭތީ އާންމުން ޝަކުވާ ކުރުމުން، ހޯމަ ދުވަހުގެ މެންދުރުފަހު އަހަރެމެން އެ ބުދު ނެގިން،" އެ ސްޓޭޓްގެ ގާނޫނު ހަދާ މަޖިލީހުގެ މެންބަރު ޝަރަދްވަތު މުކަރުޖީ ކިޔައިދިނެވެ. މުކަރުޖީ އިތުރަށް ބުނި ގޮތުގައި، ބުދު ބަހައްޓާނެ އާ ތަނެއް ސަރުކާރުން ނިންމަންދެން، މިހާރު އެ ބުދު ބާއްވާފައި އޮތީ ސަރުކާރުގެ ގުދަނެއްގައެވެ.
އާޖެންޓީނާ އަދި އިންޓަ މިއާމީގެ 38 އަހަރުގެ ތަރި، ވޯލްޑް ކަޕް ތަށި އުފުލާލައިގެން ހުންނަ ގޮތަށް ރަންކުލައިން ހަދާފައިވާ މި ބުދު ދައްކާލީ، މިދިޔަ ޑިސެމްބަރު މަހު މެސީ އިންޑިއާއަށް ކުރި މަޝްހޫރު "ގޯޓް" ދަތުރުގައެވެ. އެމެރިކާ، ކެނެޑާ އަދި މެކްސިކޯގައި ބާއްވާ ކުރިއަށް އޮތް ވޯލްޑް ކަޕްގައި ވެސް އާޖެންޓީނާގެ ކެޕްޓަންކަން ކުރާނީ މެސީއެވެ.
ވެސްޓް ބެންގޯލްގެ ސިޔާސީ ބާރުވެރިކަމަށް އައި ބަދަލާއެކު، މި ބުދަށް ގިނަ ފާޑުކިޔުންތަކެއް އަމާޒުވިއެވެ. ބޮޑުވަޒީރު ނަރެންދުރަ މޯދީގެ ހިންދޫ ނޭޝަނަލިސްޓް ބާރަތިޔާ ޖަނަތާ ޕާޓީ (ބީޖޭޕީ) އިން ވަނީ މިދިޔަ މަހުގެ އިންތިހާބުގައި އިދިކޮޅު ތުރިނަމޫލް ކޮންގްރެސް (ޓީއެމްސީ) ބަލިކޮށް، އެ ސްޓޭޓްގެ ވެރިކަން ހޯދާފައެވެ.
ރިޕޯޓްތައް ބުނާ ގޮތުގައި، މި ބުދު ފަރުމާކުރީ ކުރީގެ ޗީފް މިނިސްޓަރު އަދި ޓީއެމްސީގެ ލީޑަރު މަމަތާ ބެނަޖީގެ އެހީތެރިކަމާއެކުގައެވެ. ނަމަވެސް ބީޖޭޕީގެ އާ ކުޅިވަރާ ބެހޭ މިނިސްޓަރު ނިސިތު ޕްރަމާނިކް ވަނީ އެ ބުދަކީ "ހުތުރު" އެއްޗެއްގެ ގޮތުގައި ސިފަކުރައްވައި ފާޑުވިދާޅުވެފައެވެ.
ބީޖޭޕީން ދެކޭ ގޮތުގައި އެ ބުދު ހުރެއްޖެނަމަ ގިނަ ދުވަސްވެ މީހުން ހިންދީ ދޭވަތާއިން ދޫކޮށް އެ ބުދަށް އަޅުކަން ކުރަން ފަށާފާނެ އެވެ.
1.4 ބިލިއަން މީހުންގެ އާބާދީއެއް އޮންނަ އިންޑިއާއަކީ ކްރިކެޓްގެ ވަރުގަދަ ބާރެކެވެ. ނަމަވެސް ބައިނަލްއަގުވާމީ ފުޓްބޯޅައިގައި އެ ގައުމަށް އަދިވެސް ބޮޑެތި ކުރިއެރުންތަކެއް ނުލިބެއެވެ. ފީފާ ރޭންކިންގައި އެ ގައުމު މިހާރު އޮތީ 142 ވަނައިގައެވެ. އެހެންނަމަވެސް، ނީލްސަން ކުންފުނީގެ ދިރާސާތަކުން ދައްކާ ގޮތުގައި، ފުޓްބޯޅައަކީ އެ ގައުމުގައި ދެވަނައަށް އެންމެ މަގުބޫލު ކުޅިވަރެވެ.
