2026 ވަނަ އަހަރުގެ ވޯލްޑް ކަޕް ފުޓްބޯޅަ މުބާރާތުގައި ވާދަކުރާ އީރާނުގެ ޤައުމީ ޓީމު، މުބާރާތުގެ ކުރިން ކުޅޭ ފަހުގެ ތައްޔާރީ މެޗުތައް ސަޕޯޓަރުންނާއި މީޑިއާއަށް ބަންދުކޮށްގެން ކުޅުމަށް ނިންމައިފިއެވެ. އަދި މި މެޗަށްފަހު އަންނަ ހޮނިހިރު ދުވަހު އެ ޓީމު މުބާރާތް ބާއްވާ އެއް ޤައުމު ކަމަށްވާ މެކްސިކޯއަށް ދަތުރުކުރުމަށް ވަނީ ހަމަޖެހިފައެވެ.
އީރާނު ޓީމުން މިއަދު (ބުދަ ދުވަހު) ތެހެރާނުގެ އަޒާދީ ސްޓޭޑިއަމްގައި ވާރމް-އަޕް މެޗެއް ކުޅޭނެއެވެ. މި މެޗު ކުޅެނީ ކޮން ޓީމަކާ ދެކޮޅަށްކަން އީރާނުގެ ފުޓްބޯޅަ ފެޑެރޭޝަނުން ރަސްމީކޮށް ހާމަކޮށްފައެއް ނުވެއެވެ.
ޓީމުގެ ކޯޗު އާމިރު ގަލެނޮއީ ބޭނުންވަނީ މުބާރާތް ފެށުމުގެ ކުރިން ޓީމުގެ ކުޅުމުގެ އުކުޅުތަކާއި ރޭވުންތައް ސިއްރުކޮށްގެން ޓީމު ތައްޔާރުކުރުމަށެވެ. އެހެންކަމުން މި މެޗަށް ސަޕޯޓަރުންނެއް ނުވައްދާނެއެވެ. އަދި މީޑިއާއަށްވެސް މެޗު ކަވަރުކުރުމުގެ ހުއްދައެއް ނެތެވެ
މިއަދުގެ މެޗަށްފަހު، ޓީމުގެ ފައިނަލް ސްކޮޑާއެކު އަންނަ ހޮނިހިރު ދުވަހު އީރާނު ޓީމު މެކްސިކޯއަށް ފުރުމަށް ވަނީ ހަމަޖެހިފައެވެ. އެތަނުގައި މުބާރާތް ފެށުމުގެ ކުރިން ކޭމްޕްޖަހައިގެން ފަރިތަކުރުންތައް ކުރިއަށްގެންދާނެއެވެ.
އީރާނުގެ ސްކޮޑުގައި ހިމެނޭ މުހިންމު ކުޅުންތެރިން ކަމަށްވާ މަހުދީ ތަރޭމީ އާއި ސަރްދާރު އަޒްމޫން ފަދަ ތަރިން ވަނީ ޓީމާ ގުޅިފައެވެ. ޓީމުގެ މެޑިކަލް މާހިރުން ބުނާގޮތުގައި ކުޅުންތެރިންގެ ފިޓްނަސް މިހާރު ހުރީ ވަރަށް ރަނގަޅު ފެންވަރެއްގައެވެ.
އީރާނަކީ އޭޝިއާ ސަރަޙައްދުން މި ފަހަރުގެ ވޯލްޑް ކަޕަށް ކޮލިފައިވި އެންމެ ވަރުގަދަ އެއް ޓީމެވެ. މި ފަހަރުގެ މުބާރާތުގައި އީރާނު ހިމެނެނީ ވަރަށް ވާދަވެރި ގްރޫޕެއްގައެވެ. ކޯޗު ގަލެނޮއީގެ އަމާޒަކީ މި ފަހަރުގެ މުބާރާތުގައި ތާރީޚީ ކާމިޔާބީއެއް ހޯދައި، ގްރޫޕް ސްޓޭޖް ފަހަނައަޅައި ދެވަނަ ބުރަށް ޓީމު ގެންގޮސްދިނުމެވެ. މިއަދުގެ ސިއްރު މެޗަކީ އެ މަޤްޞަދުގައި ޓީމުގެ ފެންވަރު ވަޒަންކޮށްލުމަށް ކުޅޭ ފަހު މެޗެވެ.
