އެމެރިކާ، ކެނެޑާ އަދި މެކްސިކޯގައި ބާއްވާ ތާރީޚީ ވޯލްޑް ކަޕް ފެށެން ކުޑަތަންވެފައިވާއިރު، ސަޕޯޓަރުންގެ ނަޒަރު ހުރީ ހަމައެކަނި ތަށި ހޯދާނެ ޤައުމަކަށް ނޫނެވެ. މުޅި ފުޓްބޯޅަ ދުނިޔެ އިންތިޒާރުކުރަނީ އެތައް އަހަރެއްގެ ތާރީޚީ ދިހަ ރެކޯޑެއް މުގުރާލުމަށް މިހާރުގެ ސުޕަރސްޓާރުން ކުރާނެ ހަނގުރާމައަށެވެ.
ޖަޒީރާ މީޑިއާއިން ރިޕޯޓްކުރާ ގޮތުގައި، މިފަހަރުގެ މުބާރާތުގައި އެންމެ ފުރަތަމަ ފެނިގެންދާނެ ބޮޑު ރެކޯޑަކީ އާޖެންޓީނާގެ ލިއޮނަލް މެސީ، ޕޯޗުގަލްގެ ކްރިސްޓިއާނޯ ރޮނާލްޑޯ އަދި މެކްސިކޯގެ ކީޕަރު ގިލްރެމޯ އޮޗޯއާ 6 ވޯލްޑް ކަޕްގައި ކުޅޭ ފުރަތަމަ ކުޅުންތެރިންގެ ޝަރަފް ހޯދުމެވެ.
ކްލޯޒާގެ ރެކޯޑްތަކަށް މެސީއާއި އެމްބާޕޭގެ ނުރައްކާ
ޖާމަނީގެ ލެޖެންޑް މިރޮސްލާވް ކްލޯޒާ ހަދާފައިވާ ރެކޯޑްތައް މިފަހަރު މުގުރާލާނެ ކަމަށް ބެލެވެއެވެ. ކްލޯޒާއަކީ ވޯލްޑް ކަޕްގައި އެންމެ ގިނަ މެޗުން މޮޅުވި (17 މެޗު) ކުޅުންތެރިޔާއެވެ. ނަމަވެސް މެސީއަށް މި ރެކޯޑް މުގުރާލަން ބޭނުންވަނީ އެންމެ ދެ މެޗުގެ މޮޅެވެ.
މީގެ އިތުރުން ވޯލްޑް ކަޕް ތާރީޚުގައި އެންމެ ގިނަ ގޯލު ޖެހި ކުޅުންތެރިޔާގެ ރެކޯޑްވެސް އޮތީ 16 ގޯލާއެކު ކްލޯޒާ އަތުގައެވެ. މިހާރު 13 ގޯލު ޖަހާފައިވާ މެސީ އަދި ބާރަ ގޯލު ޖަހާފައިވާ ފްރާންސްގެ ކީލިއަން އެމްބާޕޭ ދަނީ މި ރެކޯޑާ ދިމާލަށް ބާރު ދުވެލީގައި ދަތުރުކުރަމުންނެވެ.
ލިސްޓުގައި ހިމެނޭ އެހެނިހެން ބޮޑެތި ރެކޯޑްތައް:
- ދެ ހެޓްރިކްގެ ރެކޯޑް: ވޯލްޑް ކަޕްގެ ދެ މުބާރާތެއްގައި ހެޓްރިކް ހެދި ހަމައެކަނި ކުޅުންތެރިޔަކީ އާޖެންޓީނާގެ ބަޓިސްޓޫޓާއެވެ. މިފަހަރު އެމްބާޕޭ، ރޮނާލްޑޯ، ހެރީ ކޭން އަދި ގޮންސާލޯ ރާމޮސްއަށް މި ރެކޯޑާ އަރާ ހަމަކުރުމުގެ ފުރުޞަތު އެބައޮތެވެ.
- ޖެހިޖެހިގެން ތިން ފައިނަލް: ބްރެޒިލްގެ ކަފޫގެ މި ރެކޯޑާ އަރާ ހަމަކުރުމާ ގާތުގައި ތިބީ ކުރިން ދެ ފައިނަލް ކުޅެފައިވާ މެސީ އަދި އެމްބާޕޭއެވެ.
- އުމުރުން ދުވަސްވީ ގޯލްސްކޯރަރ: ޕޯޗުގަލްގެ ޕެޕޭ އޮތީ އުމުރުން 39 އަހަރުގައި ގޯލު ޖަހައިގެންނެވެ. ނަމަވެސް އުމުރުން 41 އަހަރުގެ ރޮނާލްޑޯ، އަދި 40 އަހަރުގެ މޮޑްރިޗް ނުވަތަ ޒެކޯ ގޯލެއް ޖަހައިފިނަމަ އާ ރެކޯޑެއް އުފެދޭނެއެވެ.
- އެންމެ ދުވަސްވީ ކޯޗު: ޖާމަނީގެ އޮޓޯ ރެހާގެލްގެ 71 އަހަރުގެ ރެކޯޑް، މިފަހަރު ކުރަސާއޯގެ ކޯޗު ޑިކް އެޑްވޮކާޓް (78 އަހަރު) ނުވަތަ ޗެކް ރިޕަބްލިކްގެ އިވާން ހާޝެކް (74 އަހަރު) މުގުރާލާނެއެވެ.
- އެންމެ ގިނަ ފަހަރު ބަދަލު ކުޅުންތެރިއެއްގެ ގޮތުގައި: ބްރެޒިލްގެ ދިނިލްސަން 11 މެޗާއެކު ކުރީގައި އޮތްއިރު، އިންގްލޭންޑްގެ މާކަސް ރެޝްފޯޑް (9 މެޗު) އަށް މި ރެކޯޑް އަމިއްލަކުރުމަށް ބޭނުންވަނީ އެންމެ 3 މެޗެވެ.
މި ހުރިހާ ސަބަބުތަކަށް ބަލާއިރު، 2026 ވަނަ އަހަރުގެ ވޯލްޑް ކަޕަކީ ހަމައެކަނި ތަށި ހޯދުމުގެ މުބާރާތެއް ނޫނެވެ. މިއީ ފުޓްބޯޅައިގެ ތާރީޚުގެ، އާ ޞަފުޙާތަކެއް ލިޔެވިގެންދާނެ ބޮޑު ހަފްލާއެކެވެ.
