ޤަތަރު: ވޯލްޑް ކަޕްގެ ތާރީޚުގައި އެގައުމުން ފުރަތަމަ ފަހަރަށް ޕޮއިންޓެއް ހޯދައިފި

ވޯލްޑް ކަޕްގެ ދެވަނަ ހާފުގެ އިތުރު ވަގުތުގެ ހަތަރުވަނަ މިނިޓުގައި ގަތަރުން ވައްދާލި ލަނޑާއެކު، ސްވިޒަލޭންޑާ 1-1 އިން އެއްވަރުކޮށް، ވޯލްޑް ކަޕްގެ ތާރީޚުގައި އެގައުމުން ފުރަތަމަ ފަހަރަށް ޕޮއިންޓެއް ހޯދައިފިއެވެ.

ދުނިޔޭގެ ރޭންކިންގްގެ 50 ވަނައިގައި އޮތް ގަތަރަށް މި މުހިންމު ލަނޑު ކާމިޔާބުކޮށްދިނީ ބޯލެމް ޚޫޚީ ބޮލުން ޖެހި ބޯޅައަކުންނެވެ. މި ލަނޑާއެކު، ރޭންކިންގްގެ 19 ވަނައިގައި އޮތް ސްވިޒަލޭންޑަށް މޮޅުވުމުގެ ފުރުސަތު ގެއްލުނުއިރު، މިއީ މިފަހަރުގެ މުބާރާތުގައި ފެނުނު ފުރަތަމަ ބޮޑު ސިއްސުންލުމެވެ.

މެޗުގެ ފުރަތަމަ ލަނޑާ ގުޅިގެން އުފެދުނު ބޮޑު އޮޅުންބޮޅުމަށް ބަލާއިރު، މިއީ ގަތަރަށް ހައްގު ދާދި ހަމަހަމަ ނަތީޖާއެކެވެ.

ގަތަރަށް މިއީ ކިހާ މުހިންމު ވަގުތުކޮޅެއް؟

2022 ވަނަ އަހަރުގެ މުބާރާތް އަމިއްލަ ގައުމުގައި ބޭއްވިއިރު، ކުޅުނު ތިން މެޗުން ވެސް ބަލިވެ، 7 ލަނޑު ވަދެ، ޖެހުނީ އެންމެ ލަނޑެކެވެ. އެހެންކަމުން މިފަހަރު ގަތަރުގެ އަމާޒަކީ ކުރިއަށްވުރެ ވާދަވެރިކޮށް ފެނުމެވެ.

އެ ދެމެދުގައި ދިޔަ އަހަރުތަކުގައި، ގަލްފުގެ މި ކުޑަކުޑަ ގައުމުން ވަނީ 2023 ގެ އޭޝިއަން ކަޕް ކާމިޔާބުކޮށްފައެވެ. އަދި އަމިއްލަ ގާބިލުކަމުގައި ވޯލްޑް ކަޕަށް ފުރަތަމަ ފަހަރަށް ކޮލިފައިވީ ސްޕެއިންގެ ހެޑް ކޯޗު ހުލެން ލޮޕެޓެގީގެ އިރުޝާދުގެ ދަށުން، އަވަށްޓެރި އީރާނާއި ޔޫއޭއީގެ މައްޗަށް ހޯދި މުހިންމު މޮޅުތަކާއެކުގައެވެ. (ކުރީ ފަހަރު ކޮލިފައިވީ ހޯސްޓުންގެ ހައިސިއްޔަތުންނެވެ.)

ހޮނިހިރު ދުވަހު ކެލިފޯނިއާގެ ސެންޓާ ކްލާރާގައި ކުޅުނު މެޗުގެ ފުރަތަމަ ހާފުގައި ގަތަރުގެ ޓީމުން އެންމެ ބިޒީކޮށް ފެނުނީ ގޯލްކީޕަރު މަޙްމޫދު އަބޫނަދާއެވެ. ދޯހާއަށް އުފަން، ނަމަވެސް ފަލަސްތީނުގެ ނަސްލަށް ނިސްބަތްވާ އަބޫނަދާއަށް ޕެނަލްޓީގެ ހާދިސާގައި ބަދުނަސީބު ގޮތެއް ދިމާވި ނަމަވެސް ފުރަތަމަ 45 މިނިޓުގައި އޭނާ ވަނީ މުހިންމު 3 ސޭވް ކޮށްފައެވެ.

ގަތަރަށް ބޯޅަ ހިފެހެއްޓުނީ ވަރަށް މަދުންނެވެ. ނަމަވެސް ފުރުސަތުތައް ތަނަވަސްކުރިއެވެ. މެޗުގެ ދެވަނަ މިނިޓުގައި ސްވިސް ޑިފެންޑަރު މެނުއަލް އަކާންޖީއަށް ހެދުނު ގަލަތެއްގެ ފައިދާ އެޑްމިލްސަން ޖޫނިއާ ނަގަން އުޅުނެވެ. އަދި ފުރަތަމަ ހާފު ނިމެން އުޅެނިކޮށް އޭނާ ފޮނުވާލި ހަމަލާ ކީޕަރު ގްރެގޯ ކޮބެލް ދިފާއުކުރިއެވެ.

ދެވަނަ ހާފުގައި ވެސް ފެނުނީ ދާދި އެއްކަހަލަ މަންޒަރެކެވެ. ނަމަވެސް ގަތަރުން ދިފާއީ ރޭވުންތެރިކަން ހިފަހައްޓައި، ހާސްކަމެއްގެ ތެރެއަށް ނުދެއެވެ. ލޮޕެޓެގީ މަޑުމަޑުން އާ ކުޅުންތެރިންނާއި އެޓޭކިންގް އޮޕްޝަންތައް ދަނޑަށް ނެރުނެވެ. މީގެ ސަބަބުން ސާފު ފުރުސަތުތަކެއް ނުލިބުނު ނަމަވެސް، އުންމީދީ ދަނޑިވަޅުތަކެއް އުފެއްދިއެވެ.

އެންމެ ފަހު ވަގުތާ ހަމައަށް ވެސް ގަތަރު މެޗުގެ ތެރޭގައި ހިފެހެއްޓިއެވެ. އަދި 94 ވަނަ މިނިޓުގައި، ޓީމުގެ ކެޕްޓަން އަދި ސެންޓަރ ބެކް ޚޫޚީ، ފަހަތުނ އަރައި ބާރުގަދަ ބޮލުންޖެހުމަކުން ގޯލުގެ ތެރެއަށް ބޯޅަ ފޮނުވާލިއެވެ.

ސްވިޒަލޭންޑަށް މާ ގިނަ ފުރުސަތުތައް ލިބުނު ނަމަވެސް، ގާތްގަނޑަކަށް ހުރިހާ ފުރުސަތެއް ބޭކާރުވިއެވެ. ގަތަރަށް ނަސީބު އެހީވިއެވެ. އަދި ލިބުނު ފުރުސަތުގެ ބޭނުން ހިފައި، ވޯލްޑް ކަޕްގެ ތާރީޚުގައި އެގައުމުގެ ފުރަތަމަ ޕޮއިންޓް ކަށަވަރުކުރިއެވެ.

އަމިއްލަ ގައުމުގައި ބޭއްވުމުގެ ފިއްތުންތަކާއި ފައިދާތަކާ ނުލައި، މި މުބާރާތް އެމީހުންނަށް ވާނީ މުޅިން ތަފާތު ތަޖުރިބާއަކަށެވެ. ކަރުދާހުގައި އެމީހުންނަކީ އަދިވެސް ގްރޫޕް ބީގެ އެންމެ ބަލި ޓީމެވެ. ނަމަވެސް މި ނަތީޖާއިން އެމީހުންނަށް އިންތިހާއަށް އިތުބާރު ލިބިގެންދާނެއެވެ.

ސްވިޒަލޭންޑުގެ ލަނޑާ ގުޅިގެން ފީފާއަށް ފާޑުކިޔުން އަމާޒުވަނީ ކީއްވެ؟

މެޗުގެ 17 ވަނަ މިނިޓުގައި ބްރީލް އެމްބޮލޯ ކާމިޔާބުކުރި ޕެނަލްޓީއަކުން ސްވިޒަލޭންޑް ކުރިހޯދިއެވެ. މިއީ މިފަހަރުގެ ވޯލްޑް ކަޕްގައި ފެނުނު ފުރަތަމަ ޕެނަލްޓީއެވެ. ނަމަވެސް އެކަމުގެ ކުރިން ހިނގި ކަންތައްތަކުގައި ބޮޑު ބަހުސެއް އުފެދުނެވެ.

ކަނާތްފަރާތުން އަކާންޖީ ހުރަސްކޮށްލި ބޯޅަ، އެމްބޮލޯ ބޮލުން ތިރިކޮށްލިއެވެ. ގަތަރުގެ ކީޕަރު އަބޫނަދާ އެ ބޯޅައަށް އަރައި ފްރެއުލާއާ ލައިގަތުމުގެ ކުރިން ފްރެއުލާ ބޯޅައިގައި ފައިޖެއްސިއެވެ. މިއާއެކު ރެފްރީ ޕެނަލްޓީއަކަށް އިޝާރާތްކުރިއެވެ. ސްޓޭޑިއަމްގެ ސްކްރީންތަކުން ދެއްކީ ވީއޭއާރް އިން އެ ނިންމުން ބަލަމުންދާ ކަމަށެވެ.

ކީޕަރު އަބޫނަދާއަށް ފަރުވާދިނުމަށް ދިޔަ ދިގު ލަސްވުމަކަށްފަހު، ކުޅުންތެރިން އޭރިއާ ބޭރަށް ނެރެ، ޕެނަލްޓީ ދޭން ނިންމި ނިންމުން ކަށަވަރުކުރިއެވެ.

ޓީވީން މެޗު ބަލަންތިބި ގިނަ ބަޔަކަށް ލިބުނީ ހައިރާންކަމެކެވެ. ސަބަބަކީ ރީޕްލޭތަކުން ފެންނަ ގޮތުގައި، ކީޕަރު އަބޫނަދާ ގައިގައި ލައިގަތުމުގެ ކުރިން ފްރެއުލާ ހުރީ އޮފްސައިޑްގައެވެ. އަކާންޖީ ފުރަތަމަ ބޯޅަ އެމްބޮލޯއަށް ހުރަސްކޮށްލިއިރު، އެމްބޮލޯ ވެސް އޮފްސައިޑްތޯ ސުވާލު އުފެދެއެވެ. ނަމަވެސް އެންމެ ބޮޑު މައްސަލައަކީ އެމްބޮލޯ ބޮލުން ޖެހި ބޯޅައަށްފަހު ފްރެއުލާ ހުރި މަގާމެވެ.

އޭނާ ހުރީ އޮފްސައިޑްގައި ހެއްޔެވެ؟ ރެފްރީންގެ ނިންމުންތަކަށް އެހީވުމަށް ފީފާއިން ޓެކްނޮލޮޖީ ބޭނުންކުރެއެވެ. އެހެންކަމުން ބޮޑަށް ބެލެވެނީ ފްރެއުލާ ހުރީ އެންމެ ފަހު ޑިފެންޑަރަށްވުރެ ކުރީގައި ނޫން ކަމަށާއި، ޕެނަލްޓީ ދޭން ނިންމި ނިންމުމަކީ ރަނގަޅު ނިންމުމެއް ކަމަށެވެ.

ހުސް ގޮނޑިތައް ހުރީ ކިހާވަރަކަށް؟

މި ދެ ޓީމު މުބާރާތުގެ ފުރަތަމަ މެޗުގައި ބައްދަލުކުރުމަކީ، ވޯލްޑް ކަޕްގެ ގްރޫޕް ސްޓޭޖުގައި އެންމެ ބަލާހިތްވާނެ ފަދަ މެޗަކަށް ނުވެދާނެއެވެ. ނަމަވެސް މެޗު ފެށުމުގެ ކުރިން ލެވީސް ސްޓޭޑިއަމްގެ ވަށައިގެން ބޮޑު ފޯރިއެއް އޮތެވެ. އަދި ދެ ގޯލުގެ ފަހަތުގައި ވެސް ދެ ގައުމުގެ ގިނަ އަދަދެއްގެ ސަޕޯޓަރުން ތިއްބެވެ.

ސްވިސް ސަޕޯޓަރުންގެ ރަތް ކުލައިގެ ބްލޮކް ފެނުނުއިރު، ގަތަރު މީހުން ތިބީ އެމީހުންގެ ސަގާފީ ހުދު ހެދުމުގައެވެ. ބައެއް ސްވިސް ސަޕޯޓަރުން އައީ ސީދާ ޒިއުރިކުން ފުރައިގެންނެވެ. ޕްރެމިއާ ލީގުގެ ބައެއް ސަޕޯޓަރުން އައީ ހަމައެކަނި ވޯލްޑް ކަޕްގެ މެޗެއް ލައިވްކޮށް ބަލާލުމުގެ ބޭނުމުގައެވެ.

ސްޓޭޑިއަމްގެ ރަސްމީ ކެޕޭސިޓީއަށްވުރެ 861 ގޮނޑި މަދުން، ޖުމްލަ ހާޒިރީއަކީ 67,966 ކަމަށް އިއުލާނުކުރި ނަމަވެސް މުޅި ދަނޑު ފެންނަނީ ގާތްގަނޑަކަށް ތިންބައިކުޅަ ދެބައި ފުރިފައި އޮތް ގޮތަށެވެ. ހަތަރުާ ބައިގެ އެކި ދިމާދިމާލުން ހުސް ގޮނޑިތައް ފެންނަން ހުއްޓެވެ. މަތީ ބައިގެ ގޮނޑިތަކުގައި ތިބި ސަޕޯޓަރުން، ތިރި ބަލާލުމުން ބޯއަނބުރާާ ފަދަ އުސްތަނެއްގައި ތިބެ، މެންދުރު 12 ޖެހިއިރު ފެށުނު މެޗުގެ ގަދަ އަވީގައި ކެތްތެރިކަމާއެކު މެޗު ބެލިއެވެ. މިއީ މިފަހަރުގެ ވޯލްޑް ކަޕް ބާއްވާ 16 ދަނޑުގެ ތެރެއިން 6 ވަނައަށް އެންމެ ބޮޑު ދަނޑެވެ.

ކޯ-ހޯސްޓް ކެނެޑާއަށް މީގެ މާނައަކީ ކޮބައި؟

ހުކުރު ދުވަހު ގްރޫޕް ބީގެ ފުރަތަމަ މެޗުގައި ބޮސްނިއާ އެންޑް ހެރްޒެގޮވީނާއާ 1-1 އިން އެއްވަރުވުމުން، ކެނެޑާ މީހުން ތިބޭނީ މި މެޗަށް ވަރަށް ގާތުން ފާރަވެރިވެގެންނެވެ.

ގަތަރަކީ މި ގްރޫޕްގެ އެންމެ ބަލި ޓީމެވެ. އެހެންކަމުން އެމީހުން އެއްވަރުވުމުން ކުރިއަށް އޮތް މެޗުތަކުގެ ބަދަލުތައް މުޅިން ބަދަލުވެގެންދާނެއެވެ. މިހާރު ހަތަރު ޓީމަށް ވެސް ލިބިފައިވަނީ އެއް ޕޮއިންޓެވެ.

ކެނެޑާ ދެން ބައްދަލުކުރާނީ ބުރާސްފަތި ދުވަހު ވެންކޫވަރގައި ގަތަރާއެވެ.

ހަތަރު ޕޮއިންޓް ހޯދުމަކީ ގަދަ 32 ގެ ބުރަށް ދިއުން ގާތްގަނޑަކަށް ކަށަވަރުވާނެ ކަމެކެވެ. ސަބަބަކީ 12 ގްރޫޕްގެ ތެރެއިން ތިންވަނައަށްދާ އެންމެ މޮޅު 8 ޓީމު ކުރިއަށްދާތީއެވެ. ކެނެޑާއިން ގަބޫލުކުރާނީ މި މެޗުގައި ސްވިޒަލޭންޑަށްވުރެ ގިނަ ލަނޑު ގަތަރު ކޮޅަށް ޖެހޭނެ ކަމަށެވެ. މިއީ އެމީހުންގެ ގޯލްގެ ތަފާތު ރަނގަޅުކުރުމަށް ލިބޭނެ ފުރުސަތެކެވެ.

އޭގެ ފަހުން، ޖެހިގެން އަންނަ ބުދަ ދުވަހު ވެންކޫވަރގައި ސްވިޒަލޭންޑާ ދެކޮޅަށް ކުޅޭ ތިންވަނަ މެޗު ވަރަށް ފޯރިގަދަވާނެއެވެ. އެ މެޗުން ގްރޫޕް ބީގެ އެއްވަނަ ހޯދާާ ޓީމެއް ކަނޑައެޅިގެންދާނެއެވެ. އެއްވަނަ ހޯދާ ޓީމެއް ކެނެޑާގެ ފަސްގަނޑުގައި ގަދަ 32 ގެ މެޗު ކުޅޭނީ އެހެން ގްރޫޕެއްގެ ތިންވަނަ ޓީމާ ދެކޮޅަށެވެ. މި ގްރޫޕްގެ ދެވަނަ ޓީމު ދާންޖެހޭނީ ލޮސް އެންޖެލިސްއަށް ގްރޫޕް އޭގެ ދެވަނަ ޓީމާ ދެކޮޅަށް ކުޅުމަށެވެ. އެހެންކަމުން ކެނެޑާއަށް އެއްވަނަ ހޯދުމުގެ އިތުރު ހިތްވަރެއް އެބައޮތެވެ.