އިންޑޮނޭޝިއާ އާއި ރަޝިއާގެ ދެމެދުގައި ކުރާ ވިޔަފާރީގެ މުއާމަލާތްތަކުގައި ބައިނަލްއަޤްވާމީ މާލީ ފިއްތުންތަކުން ސަލާމަތްވުމަށްޓަކައި، ދެ ޤައުމުގެ ޤައުމީ ފައިސާ ބޭނުންކުރުން ފުޅާކުރުމުގެ މަސައްކަތް ފަށައިފިއެވެ. މިކަން ހާމަކޮށްފައިވަނީ އިންޑޮނޭޝިއާގެ އިންޑަސްޓްރީ މިނިސްޓަރު އަގަސް ގުމިވާން ކާޓަސަސްމިޓާ އެވެ.
މިމަސައްކަތަކީ، ދުނިޔޭގެ މާލީ ނިޒާމުގައި ހުރި ނުރައްކާތަކުން ރައްކާތެރިވުމަށްޓަކައި، ރަޝިއާ އާއި އިންޑޮނޭޝިއާގެ ދެމެދުގައި ކުރާ ވިޔަފާރީގައި އަމިއްލަ ފައިސާއިން މުއާމަލާތްތައް ނިންމުމެވެ. މި ނިޒާމުގެ ސަބަބުން ދެ ޤައުމުގެ ދެމެދުގައި އޮތް އިޤްތިޞާދީ އެއްބާރުލުން އިތުރަށް ބަދަހިވެ، ދެ ފަރާތަށް ވެސް ފައިދާހުރި، ހަމަހަމަ ގުޅުމެއް އުފެދިގެންދާނެއެވެ.
ޤައުމީ ފައިސާ ބޭނުންކޮށްގެން މުއާމަލާތްތައް ކުރުމަކީ ރަޝިއާ އާއި އިންޑޮނޭޝިއާގެ ދެމެދުގައި ހެދޭ މުސްތަޤްބަލުގެ ފުޅާ އެއްބަސްވުންތަކުގެ ބައެއް ކަމަށް މިނިސްޓަރު ފާހަގަކުރެއްވިއެވެ.
މިހާރުވެސް ރަޝިޔާއިން ޗައިނާއާއި އިންޑިއާއާއި އީރާނާއި ބްރަޒިލްއާއެކު އަމއިްލަ ފައިސާއިން މުއާމަލާތު ހިންގައެވެ.
މި ކުރިއެރުމަކީ ދެ ޤައުމުގެ އިޤްތިޞާދީ މިނިވަންކަން އިތުރުކުރުމަށާއި، ބައިނަލްއަޤްވާމީ ވިޔަފާރީގައި އަމިއްލަ ފައިސާގެ ބޭނުންތެރިކަން އިތުރުކުރުމަށް އެޅޭ މުހިންމު ފިޔަވަޅެކެވެ. މީގެ އިތުރުން، 2026 ވަނަ އަހަރު ރަޝިއާގެ ކަޓެރިންބާގްގައި ބޭއްވުމަށް ހަމަޖެހިފައިވާ 'އިންނޮޕްރޮމް' ބައިނަލްއަޤްވާމީ އިންޑަސްޓްރިއަލް އެގްޒިބިޝަންގެ ބައިވެރި ޤައުމަކަށް އިންޑޮނޭޝިއާ ހަމަޖައްސާފައިވުމުން، ދެ ޤައުމުގެ އިޤްތިޞާދީ ގުޅުން އިތުރަށް ބަދަހިވެގެންދާނެއެވެ.
