ފުޓްބޯޅަ މެޗެއްގެ ނަތީޖާ މިހާރު ނިންމަނީ ހަމައެކަނި ދަނޑުމަތީގައި ކުޅޭ ކުޅުންތެރިންގެ ހުނަރަކުން ނޫނެވެ. އަހަރަކު އެތައް ބިލިއަން ޑޮލަރެއް ދައުރުވާ ބާޖުމެރުމުގެ ނިޒާމުގެ ތެރޭގައި، ރަހުމެއް ނެތް ކަޅު ބާޒާރުގެ ނުފޫޒު ވަނީ ފެތުރިފައެވެ. ރީނދޫ ކާޑެއް، ކޯނަރެއް، ނުވަތަ ގޯލްކީޕަރަކު ވަގުތު ބޭކާރުކޮށްލާ ސިކުންތުކޮޅަކީވެސް މިހާރު މިލިއަނުން ފައިސާ ފުރޮޅިގެންދާ، އަދި ބައިނަލްއަގުވާމީ ކުށްކުރާ ގްރޫޕްތަކަށް މަގުފަހިކޮށްދޭ ކަންކަމެވެ.
ސަޕޯޓަރުންގެ ފޯރިއާއި، ދަނޑުތަކުގެ ދިއްލުންތަކުގެ ފުރަގަހުގައި ހިނގަނީ ކުޅިވަރު އިދާރާތަކާއި ބެޓިން ނެޓްވޯކްތަކުގެ މެދުގައި ކުރެވޭ ހަނގުރާމައެކެވެ. މިއީ ހަމައެކަނި ޖުވާ ކުޅޭ މީހުންގެ މެދުގައި އޮތް ކަމެއް ނޫނެވެ. މީގެ ތެރެއަށް ރެފްރީންނާއި، ކުޅުންތެރިންނާއި، އަދި ކުލަބުތަކުގެ ވެރިންވެސް ވަނީ ވަދެފައެވެ. ސުވާލަކީ، ދަނޑުމަތީގައި މި ފެންނަނީ ހަގީގީ ވާދަވެރިކަމެއް ހެއްޔެވެ؟ ނުވަތަ ސިއްރުން ރޭވިފައިވާ ސޯދާތަކެއްގެ ނަތީޖާ ހެއްޔެވެ؟
މިއަހަރު ބާއްވާ ފީފާ ވޯލްޑް ކަޕް 2026 އަށް އެކަނިވެސް ގާނޫނީ ހަމަތަކުގެ މަތިން 3.1 ބިލިއަން ޑޮލަރުގެ ބެޓް އޮންލައިންކޮށް ކުރާނެ ކަމަށް މާހިރުން ލަފާކުރެއެވެ. މީގެ އިތުރުން ލަފާކުރާ ޕްލެޓްފޯމްތަކުގައި 2.37 ބިލިއަން ޑޮލަރު ދައުރުވާނެއެވެ.
އިނގިރޭސި އިގްތިސާދީ ރިޕޯޓްތަކުން ދައްކާ ގޮތުގައި، މުބާރާތުގެ ފައިނަލް މެޗާ ހަމައަށް ދާއިރު، ހަމައެކަނި މުބާރާތުގެ ޗެމްޕިއަންކަން ހޯދާނެ ޓީމަކަށް ބެޓްކުރި އަދަދު 1.8 ބިލިއަން ޑޮލަރަށް އަރާނެއެވެ. މިއާއެކު މިއަހަރުގެ ވޯލްޑް ކަޕްގެ ޖުމްލަ ބެޓިންގެ އަދަދު 7.3 ބިލިއަން ޑޮލަރަށް އަރާނެއެވެ.
ބެޓްކުރުމުގެ ވައްޓަފާޅި މިހާރު ވަނީ މުޅިން ބަދަލުވެފައެވެ. މެޗުން މޮޅުވާނީ ނުވަތަ ބަލިވާނީ ކޮން ޓީމެއްތޯ ބެލުމުގެ ބަދަލުގައި، މިހާރު ބެޓް ކުރަނީ މެޗުގެ ކުދިކުދި ތަފްސީލުތަކަށެވެ.
- ލިބޭނެ ކޯނަރުގެ އަދަދު.
- ކުޅުންތެރިއަކަށް ރީނދޫ ކާޑު ލިބޭނެ މިނެޓް.
- ޑިފެންޑަރަކު ފައުލްކުރާނެ ވަގުތު.
ކަޅު ފައިސާ އާއި ގާނޫނާ ހިލާފު ބާޒާރު
އިންޓަޕޯލް އާއި އޭޝިއަން ރޭސިން ފެޑެރޭޝަން ގުޅިގެން ތައްޔާރުކޮށްފައިވާ ރިޕޯޓެއްގައިވާ ގޮތުން، ދުނިޔޭގައި ކުރެވޭ ކުޅިވަރު ބެޓިންގެ 80 އިންސައްތައަކީ ގާނޫނާ ހިލާފަށް ހިންގާ ޖހުވާގެ ހަރަކާތްތަކެވެ.
| ތަފާސްހިސާބު | އަންދާޒާކުރެވޭ އަދަދު |
| ގާނޫނާ ހިލާފު ބެޓިން ބާޒާރުގެ އަހަރީ އާމްދަނީ | 340 ބިލިއަން – 1.7 ޓްރިލިއަން ޑޮލަރު |
| ބެޓިންގެ ތެރެއިން މަނީ ލޯންޑްރިން ހިންގާ އަދަދު | އަހަރަކު 140 ބިލިއަން ޑޮލަރު |
މިއީ ދުނިޔޭގެ އިންތިޒާމްވެގެން ހިންގާ ކުށްތަކުން ލިބޭ ޖުމްލަ އާމްދަނީގެ 10 އިންސައްތައެވެ.
މިއީ އައު ކަމެއް ނޫނެވެ. 2004 ވަނަ އަހަރު ޖަރުމަނުގެ ރެފްރީ ރޮބަޓް ހޮއިޒާ ވަނީ ބެޓިން ނެޓްވޯކަކުން 67,000 ޔޫރޯ އާއި އަގުބޮޑު ޓީވީއެއް ހޯދައިގެން މެޗުތަކުގެ ނަތީޖާ ބަދަލުކުރިކަމަށް އެއްބަސްވެފައެވެ.
އަދި 2013 ގައި ސިންގަޕޫރުން ހިންގި ނެޓްވޯކަކުން ދުނިޔޭގެ 680 މެޗު ފިކްސްކުރިކަން ފަޅާއެރިއެވެ. އޭގެ ތެރޭގައި ވޯލްޑް ކަޕް ކޮލިފައިން މެޗުތައްވެސް ހިމެނެއެވެ. ދާދިފަހުން 2025 ގެ ޑިސެމްބަރުގައި ތުރުކީން ވެސް ވަނީ މިފަދަ މައްސަލައެއްގައި ކުޅުންތެރިންނާއި ކުލަބު ރައީސުންނާއެކު 46 މީހަކު ހައްޔަރުކޮށްފައެވެ.
މި ބޮޑެތި ކުންފުނިތައް ހަމައެކަނި ފިލައިގެން ތިބެނީއެއް ނޫނެވެ. އިނގިރޭސި ޕްރިމިއާ ލީގުގެ 2025-2026 ސީޒަނުގައި 11 ކުލަބެއްގެ ޖާޒީގައި ބެޓިން ކުންފުނިތަކުގެ އިޝްތިހާރު ހުއްޓެވެ. ނަމަވެސް، މި ނުފޫޒު ކުޑަކުރުމަށްޓަކައި 2026-2027 ސީޒަނުން ފެށިގެން ޖާޒީގެ ކުރިމަތީގައި ބެޓިން ކުންފުނިތަކުގެ ލޯގޯ ޖެހުން މަނާކުރުމަށް ޕްރިމިއާ ލީގުން ވަނީ ނިންމާފައެވެ.
ފީފާގެ ގާނޫނުތަކުގެ ދަށުން ކުޅުންތެރިންނާއި، ރެފްރީންނާއި، އޮފިޝަލުން ބެޓްކުރުމަކީ މަނާކަމެކެވެ. ނަމަވެސް، އަހަރަކު އެތައް ސަތޭކަ ބިލިއަން ޑޮލަރެއް އޮހޭ މި ސިނާއަތުގެ ކުރިމަތީގައި، ހަމައެކަނި ގާނޫނަކުން ފުޓްބޯޅައިގެ ސާފުކަން ހިފެހެއްޓޭނެބާވައެވެ؟ މިއީ މިއަދު ފުޓްބޯޅަ ކުރިމަތިލާންޖެހިފައިވާ އެންމެ ބޮޑު ނުރައްކަލެވެ.
