ޔޫއޭއީގެ ޝާރްޖާއިން ފުރައިގެން ޕާކިސްތާނުގެ ކަރާޗީއަށް ދަތުރުކުރި، ޕާކިސްތާނުގައި ރަޖިސްޓްރީކޮށްފައިވާ "ކޭ2 އެއާވޭސް"ގެ ބޯއިންގް 737 މަރުކާގެ ކާގޯ ބޯޓެއް، ނެވިގޭޝަން ސިސްޓަމްގެ މައްސަލައެއް ދިމާވިކަން އެންގުމަށްފަހު އެއާ ޓްރެފިކް ކޮންޓްރޯލާ އޮތް ގުޅުން ކެނޑިގެން ގެއްލިއްޖެއެވެ. ބޯޓު ގެއްލުނުއިރު އޭގައި 5 ފަޅުވެރިން ތިއްބެވެ.
ޕާކިސްތާނު އެއާޕޯޓްސް އޮތޯރިޓީން ބުނި ގޮތުގައި، އަންގާރަ ދުވަހުގެ ރޭ ޕާކިސްތާނު ގަޑިން 9:18 ގައި ބޯޓުގެ ނެވިގޭޝަން ސިސްޓަމަށް މައްސަލައެއް ދިމާވެގެން ރިޕޯޓްކުރިއެވެ. އެއާއެކު ކަރާޗީގެ ކޮންޓްރޯލަރުން ބޯޓަށް މަގުދައްކައިދޭން މަސައްކަތް ކުރި ނަމަވެސް، އޭގެ ތިން މިނެޓެއްހާ އިރު ފަހުން ރާޑަރުން ދެއްކި ގޮތުގައި ބޯޓު ވަނީ ވަރަށް ހަލުވިކަމާއެކު ތިރިއަށް ދާން ފަށާފައެވެ. އަދި އޭގެ ފަހުން ބޯޓުގެ އެއްވެސް ޚަބަރެއް ނުވެ ގުޅުން ވަނީ ކެނޑިފައެވެ. ގުޅުން ކެނޑުނުއިރު ބޯޓު އޮތީ ކަރާޗީގެ ހުޅަނގުން 287 ކިލޯމީޓަރު ދުރުގައެވެ.
ކަނޑަށް ވެއްޓުނު ކަމަށް ބެލެވޭ: ހޯދުމުގެ މަސައްކަތް ފަށައިފި
ފްލައިޓްތައް ޓްރެކްކުރާ "ފްލައިޓްރާޑަރު24″ އިން ހާމަކުރި މައުލޫމާތުތަކަށް ބަލާއިރު، ބޯޓުގެ އުސްމިނަށް އައި ކުއްލި ބަދަލުތަކަކަށްފަހު، އެ ބޯޓު ކަރާޗީގެ ހުޅަނގުން އޮންނަ އަރަބި ކަނޑަށް ވެއްޓިފައިވުން ވަރަށް އެކަށީގެންވެއެވެ.
-
ފަހުގެ މައުލޫމާތު: ބޯޓުން އެންމެ ފަހުން ލިބުނު ސިގްނަލްތައް ދެއްކި ގޮތުގައި ބޯޓު އޮތީ ކަނޑުގެ ސަތަހައަށް ވުރެ އެންމެ 1,100 ފޫޓު މަތީގައެވެ. އަދި ބޯޓު ތިރިއަށް ދިޔައީ މިނެޓަކު 22,400 ފޫޓުގެ އާދަޔާ ޚިލާފު ބާރުމިނެއްގައެވެ.
-
ގެއްލުނު ސަރަހައްދު: ޕާކިސްތާނުގެ ޖިއޯ ނިއުސްއިން ރިޕޯޓްކުރި ގޮތުގައި ބޯޓު ގެއްލިފައިވަނީ ބަލޮޗިސްތާން ޕްރޮވިންސްގެ އޮރްމާރާ ކައިރިން އަރަބި ކަނޑުގެ މަތިން އުދުހެމުން ދަނިކޮށެވެ.
ޕާކިސްތާނުގެ ކަމާބެހޭ އިދާރާތަކުން މިހާރު ވަނީ ބޯޓު ހޯދުމަށްޓަކައި ކަނޑުގެ ސަރަހައްދުގައި ސާޗް އެންޑް ރެސްކިއު ބޮޑު އޮޕަރޭޝަނެއް ފަށާފައެވެ.
ގެއްލުނު ބޯއިންގް 737-400 މަރުކާގެ މި ބޯޓަކީ އަމިއްލަ ކާގޯ އެއާލައިން "ކޭ2 އެއާވޭސް" އިން 2024 ވަނަ އަހަރު ބޭނުންކުރަން ފެށި، އެ އެއާލައިންގެ އޮތް ހަމައެކަނި ބޯޓެވެ. ޖުމްލަ 27 އަހަރުވެފައިވާ މި ބޯޓަކީ 1999 ވަނަ އަހަރު ރަޝިޔާގެ އެރޯފްލޮޓް އެއާލައިންގައި ފަސިންޖަރުން އުފުލާ ބޯޓެއްގެ ގޮތުގައި ބޭނުންކުރަން ފެށި، ފަހުން 2012 ގައި ކާގޯ ބޯޓަކަށް ބަދަލުކޮށްފައިވާ ބޯޓެކެވެ.
