އެމެރިކާގެ ކެންޓަކީގެ ފަރުބަދަމަތީ ހިސާބުތަކުގެ ތެރޭގައި، ޓްރަމްޕްލްޝަމް ކްރީކް ކޯރުގެ ހިމޭންކަމުގެ ތެރޭގައި، އެއްވެސް މީހަކަށް ނޭނގޭ ސިއްރެއް އޮތެވެ. އެއީ ހަމައެކަނި ވާހަކައެއް ނޫނެވެ؛ އެއީ ޖީލުތަކަކަށް ދެމިގެން އައި، ލޭގެ ގުޅުންތަކުގެ ތެރޭގައި ބަންދުވެފައި އޮތް 'ނޫ' ކުލައިގެ ހަގީގަތެކެވެ. ފިއުގޭޓް އާއިލާގެ މެމްބަރުންގެ ހަންގަނޑު ހުންނަނީ ނޫކުލައެއްގައެވެ. މިއީ އެއްވެސް ހާލެއްގައި ޖާދޫއެއް ނޫނެވެ. މިއީ ލޭގެ ތެރޭގައި ފޮރުވިފައި އޮތް ޖެނެޓިކް ނުކުޅެދުންތެރިކަމެކެވެ.
1820 ގެ އަހަރުތަކުގައި ފްރާންސުން އެމެރިކާއަށް ހިޖުރަކުރި މާޓިން ފިއުގޭޓް، ކެންޓަކީގެ އެކަހެރި ހިސާބެއްގައި ވަޒަންވެރިވިއެވެ. ބުނެވޭ ގޮތުގައި މާޓިން އުފަންވީ ވެސް ނޫކުލައިގެ ހަންގަނޑަކާއެވެ. އޭނާގެ މައިންބަފައިންނަށް ލިބުނު ބިރުވެރިކަމެއްގެ ސަބަބުން، އެ ކުޑަ ދަރިފުޅު އޭރުގެ ޔަތީމްޚާނާއަކަށް ދޫކޮށްލީއެވެ. ނަމަވެސް މާޓިންގެ ހަޔާތް އެހެން މިސްރާބަކަށް ބަދަލުވިއެވެ. އޭނާ އިލިޒަބަތު ސްމިތާ ކައިވެނިކުރިއެވެ. އިއްތިފާގަކުން، އިލިޒަބަތަކީ ވެސް އެ ނާދިރު ޖެނެޓިކް މައްސަލަ އުފުލާ މީހެކެވެ. އެމީހުންނަށް ލިބުނު ހަތް ދަރިންގެ ތެރެއިން ހަތަރު ކުދިން އުފަންވީ ނޫކުލައިގައިގެ ހަމާއެކުގައެވެ.
އެކަހެރިކަމުގެ ތެރޭގައި ލޭ އެއްވުން
ޓްރަމްޕްލްޝަމް ކްރީކްގައި ދިރިއުޅުނު އެންމެ ފަސް އާއިލާގެ މެދުގައި ކައިވެނިތައް ހިނގަމުން ދިޔައީ، ބޭރު ދުނިޔެއާ އެއްވެސް ގުޅުމެއް ނެތި، ވަރަށް ހަނި ދާއިރާއެއްގައެވެ. ލޫނާ ފިއުގޭޓަކީ މި ޖީލުގެ އެންމެ ފާހަގަކޮށްލެވޭ އެކަކެވެ. އޭނާގެ ތުންފަތް ހުންނަނީ "މުގުރަކުން ޖެހުމުން އަރާފައިވާ ބޮޑު ލަކުނެއްހެން" ގަދަ ނޫކުލައި ގައެވެ. ލޭގެ ގުޅުން އެއްވެ، އާއިލާގެ ތެރޭގައި ކައިވެނިތައް ކުރުމުގެ ސަބަބުން، 'މެތެމޯގްލޮބިނޭމިއާ' ކިޔާ ޖީންގެ މައްސަލަ ޖީލުތަކަށް ދެމިގެން ދިޔައެވެ. މިއީ ލޭގެ ތެރޭގައި ހުންނަ ހިމޮގްލޮބިންގެ މިންވަރު މަތިވެ، ލޭގެ ކުލަ ގަދަ ނޫކުލައަކަށް ބަދަލުވެ، އެކަން ހަންގަނޑުން ފާޅުވާ ބައްޔެކެވެ.
ބަދަލުވި ހަގީގަތް
1960 ގެ އަހަރުތަކާ ހަމައަށް މި ހުރިހާ ކަމެއް އޮތީ ސިއްރަކަށް ވެފައެވެ. ނަމަވެސް ޑރ. މެޑިސަން ކައުއިން މި މައްސަލަ ހޯއްދެވިއެވެ. އޭނާ މި އާއިލާއަށް ދެއްވީ 'މެތައިލީން' ކިޔާ ބޭހެކެވެ. މިއީ އެމީހުންގެ ހަންގަނޑުގެ ކުލަ ވަގުތީ ގޮތުން އާދައިގެ ކުލައަކަށް ބަދަލުކޮށްދިން ކަމެކެވެ.
އެންމެންގެ ސަމާލުކަމަށް މި މައްސަލަ އައީ 1975 ގައި ބެންޖަމިން ސްޓޭސީ އުފަންވި ދުވަހުއެވެ. އޭނާގެ ހަންގަނޑު ހުރީ ވިލު ކުލައިގެ ނުލެއްގައވެ. އޭނާގެ މާމައަކީ ލޫނާ ފިއުގޭޓްކަން އެނގުމުން، ޑޮކްޓަރުންނަށް ކަންކަން ސާފުވިއެވެ.
މިއަދުގެ ފިއުގޭޓް އާއިލާ
އުމުރުން 69 އަހަރުގެ ގެރީ ފިއުގޭޓް ބުނާ ގޮތުގައި، މި ބަލީގެ އަސަރު އަދިވެސް އާއިލާގެ ތެރޭގައި އެބަހުއްޓެވެ. ނަމަވެސް ކުރިއަށްވުރެ ލުއި ގޮތަކަށެވެ. އަލިކަން ކުޑަ ތަންތަނުގައި، އޭނާގެ ހަންގަނޑު "ނޫ ދަނބު" ކުލައަކަށް ހުރެއެވެ. ގެރީގެ ދަރިންނަށް ވެސް އުފަންވީއިރު މިކަން ދިމާވި ނަމަވެސް، އުމުރުން ފަސް އަހަރުވުމުން އެކަން ފިލައިގެން ދިޔައެވެ.
