ކެލިފޯނިއާގެ ޚާއްޞަ އިންތިޚާބު ކާމިޔާބުކުރައްވައި ޢާއިޝާ ވަހާބު އެމެރިކާގެ ކޮންގްރެސްއިން ޖާގަ ހޯއްދަވައިފި އެވެ.
އެމެރިކާގެ ކެލިފޯނިއާގެ 14 ވަނަ ކޮންގްރެޝަނަލް ޑިސްޓްރިކްޓްގެ ޚާއްޞަ އިންތިޚާބު, ޑިމޮކްރެޓިކް ޕާޓީގެ ޕްރޮގްރެސިވް ކެންޑިޑޭޓް އަދި ސްޓޭޓް ސެނެޓަރު ޢާއިޝާ ވަހާބު ކާމިޔާބުކުރައްވައިފިއެވެ. މި އިންތިޚާބަކީ އިސްރާއީލަށް ތާއީދުކުރާ ވަރުގަދަ ލޮބީ ގްރޫޕް އައިޕެކް އިން އެތައް މިލިއަން ډޮލަރެއް ޚަރަދުކޮށްގެން ވަހާބު ބަލިކުރުމަށް ކުރި މަސައްކަތާ ދެކޮޅަށް ހޯއްދެވި ކާމިޔާބީއެކެވެ.
ވޯޓު ގުނައި ނިމުނުއިރު, ވަހާބު ވަނީ ވޯޓުގެ 53.1 އިންސައްތަ ހޯއްދަވާފައެވެ. އޭނާއާ ވާދަކުރެއްވި ޑިމޮކްރެޓިކް ޕާޓީގެ މެންބަރު އަދި ސަން ފްރާންސިސްކޯ ބޭ އޭރިއާގެ ދަތުރުފަތުރާ ބެހޭ އިދާރާގެ މަސްއޫލުވެރިޔާ މިލިސާ ހެރްނާންޑޭޒަށް ލިބިވަޑައިގަތީ 46.9 އިންސައްތަ ވޯޓެވެ. މި ކާމިޔާބީއާއެކު ވަހާބު ވެވަޑައިގެންފައިވަނީ އެމެރިކާގެ ކޮންގްރެސްއަށް އިންތިޚާބުވި އަފްޣާނިސްތާނު ދަރިކޮޅުގެ ފުރަތަމަ މެންބަރަށެވެ.
މި އިންތިޚާބަކީ ކުރީގެ ކޮންގްރެސް މެންބަރު އެރިކް ސުވާލްވެލްގެ މައްޗަށް ޖިންސީ ގޯނާގެ ތުހުމަތުތަކެއް ކުރެވި, އޭނާ މަގާމުން އިސްތިއުފާ ދެއްވުމާ ގުޅިގެން ހުސްވި ގޮނޑިއަށް މެންބަރަކު އިންތިޚާބުކުރުމަށް ބޭއްވި ޚާއްޞަ އިންތިޚާބެކެވެ. ވަހާބު ފުރިހަމަކުރައްވާނީ ސުވާލްވެލްގެ ދައުރުގެ ބާކީބައި ކަމަށްވާ މިއަހަރުގެ ނިޔަލަށެވެ.
އިންތިޚާބުގެ ފަހު މަރުޙަލާގައި އައިޕެކް އަދި އެޖަމާޢަތާ ގުޅުންހުރި ސިޔާސީ ފަންޑުތަކުން ވަނީ ހެރްނާންޑޭޒްގެ ކެމްޕޭނަށް އެހީތެރިވުމަށާއި ވަހާބާ ދެކޮޅަށް އިޝްތިހާރު ކުރުމަށް 3.7 މިލިއަނަށްވުރެ ގިނަ ޑލަރު ޚަރަދުކޮށްފައެވެ. ނަމަވެސް, ދާއިރާގެ ރައްޔިތުން ވަނީ ބޭރުގެ މާލީ ނުފޫޒުތަކަށް ފުރުޞަތު ނުދީ ވަހާބަށް ތާއީދުކޮށްފައެވެ.
ނަތީޖާއަށްފަހު ވާހަކަދައްކަވަމުން ވަހާބު ވިދާޅުވީ, "މި ދާއިރާގެ ރައްޔިތުން ދެއްކެވި ހިއްވަރަށްޓަކައި ފަޚުރުވެރިވާ" ކަމަށާއި, ބޭރުން އޮއްސާލި މިލިއަން ޑޮލަރުގެ މާލީ އެހީތަކާއެކު ފެތުރި ދޮގު ވާހަކަތަކުގެ ހަގީގަތް ރައްޔިތުންނަށް އޮޅުންފިލައި, އޭނާއަށް ވޯޓު ދެއްވިކަމަށްޓަކައި ޝުކުރު އަދާކުރައްވާ ކަމަށެވެ.
މި ދެ ކެންޑިޑޭޓުން ކުރިއަށް އޮތް ނޮވެމްބަރު މަހު ބާއްވާ އާންމު އިންތިޚާބުގައި, ކުރިއަށް އޮތް ދެ އަހަރުގެ ދައުރަށް އަލުން ވާދަކުރައްވާނެއެވެ.
