އެމެރިކާއާއި އިސްރާއީލުގެ އުއްދާނީ ހަމަލާތަކާއި ދެކޮޅަށް، އަމިއްލަ ދިފާއުގައި ބޭނުންކުރާ ސައިންސާއި ޓެކްނޮލޮޖީގެ މަތީ ގާބިލުކަން އިތުރަށް ފުޅާކޮށް، ކުރިން އުފައްދާފައިވާ މިސައިލްތަކަށްވުރެ ބާރުގަދަ އަދި ދުރުރާސްތާއަށް ދަތުރުކުރާ ބެލިސްޓިކް މިސައިލްތައް އުފެއްދުމުގެ އާ މަޝްރޫއެއް އީރާނުގެ ސިފައިން ފަށައިފި އެވެ.
އީރާނުގެ ސިފައިންގެ ތަރުޖަމާނު ހާމަކުރެއްވި ގޮތުގައި، ގައުމީ ސަލާމަތާއި ރައްކާތެރިކަން ކަށަވަރުކުރުމަށްޓަކައި މިސައިލްތަކުގެ ސްޕީޑާއި ދުރަށް ދަތުރުކުރުމުގެ ގާބިލުކަން އިތުރުކުރުމުގެ މަސައްކަތް ސިފައިން ދަނީ ކުރަމުންނެވެ. އީރާނުގެ އައްސޭރިފަށާ އެއްހާސް ކިލޯމީޓަރު ކައިރީގައި އެމެރިކާގެ ސިފައިންގެ ބާރުތައް ހަރަކާތްތެރިވަމުންދާއިރު، އިސްރާއީލުން ދެމުންދާ ނުރައްކާތަކުން ގައުމު ދިފާއު ކުރުމުގައި އީރާނުން ދަނީ އަމިއްލަ އުފެއްދުންތެރިކަމުގެ މައްޗަށް ބިނާކޮށް ކުރިއެރުންތައް ހޯދަމުންނެވެ.
އެމެރިކާގެ އިންޓެލިޖެންސް އިދާރާތަކުން ނެރުނު ރިޕޯޓުތަކުންވެސް އެނގޭ ގޮތުގައި، މުޅި ސަރަހައްދުގައިވެސް އެންމެ ފުޅާ އަދި އެންމެ ކުރިއަރާފައިވާ މިސައިލް ނިޒާމާއި ރޭޑިއޭޝަން ދެނެގަންނާނެ ޑްރޯން ސީދާ އީރާނުން އަމިއްލައަށް އުފައްދައި ބޭނުންކުރެއެވެ. އީރާނުގެ މިސައިލް އުފެއްދުންތަކުގެ ތެރޭގައި ސޮލިޑް-ފިއުލް އަދި ލިކުއިޑް-ފިއުލް ބޭނުންކުރާ 14 އަށްވުރެ ގިނަ ބެލިސްޓިކް މިސައިލް ހިމެނެއެވެ. މީގެ ތެރެއިން 2،000 ކިލޯމީޓަރު ދުރަށް ދަތުރުކުރާ މިސައިލްތަކަކީ އިސްރާއީލުގެ ދިފާއީ ނިޒާމުތައް ފަހަނައަޅައި ގޮސް އަމާޒަށް ހަމަލާދިނުމުގެ ފުރިހަމަ ގާބިލުކަން ލިބިފައިވާ އުފެއްދުންތަކެކެވެ.
އީރާނުން އުފައްދާފައިވާ "ފައްތާހު-1″ އަދި "ފައްތާހު-2″ ސުޕަސޮނިކް މިސައިލްތަކަކީ އަޑަށްވުރެ 13 އިން 15 ގުނަ އަވަހަށް ދަތުރުކުރުމުގެ ގާބިލުކަން ލިބިފައިވާ، އިސްރާއީލުގެ ދިފާއީ ނިޒާމުތަކަށް އަތުލައިގަންނަން ދަތި ޓެކްނޮލޮޖީއެކެވެ. މީގެއިތުރުން "ސިއްޖީލް" އަދި "ޚައިބަރު" ފަދަ މިސައިލްތަކަކީ އީރާނުގެ އަމިއްލަ ސިނާއީ ގާބިލުކަން ދައްކުވައިދޭ މުހިންމު ވަސީލަތްތަކެކެވެ.
ހުޅަނގުގެ މީޑިއާ ބުނާ ގޮތުގައި، އެމެރިކާއާއި އިސްރާއީލުން ދެމުންދާ ހަމަލާތަކާއި ދަތިކުރުމުގެ ފިޔަވަޅުތަކާއެކުވެސް، އީރާނުން ދަނީ ބިމުގެ އަޑީގައިވާ ރައްކާތެރި ސެންޓަރުތަކުގައި މިސައިލް އުފެއްދުމުގެ މަސައްކަތް ހުއްޓުމެއްނެތި ކުރިއަށްގެންދަމުންނެވެ. އީރާނުގެ އަމިއްލަ ޓެކްނޮލޮޖީއާއި ދިފާއީ ސިނާއަތުގެ ވަރުގަދަކަމުގެ ސަބަބުން، އިރުމަތީ ސަރަހައްދުގައި އެމެރިކާގެ އަސްކަރީ ބާރުތަކަށް ވަނީ ބޮޑު ގޮންޖެހުމެއް ކުރިމަތިވެފައެވެ.
އަސްކަރީ މާހިރުން ފާހަގަކުރާ ގޮތުގައި، އީރާނުން އަމިއްލަ ގައުމީ ދިފާއު ވަރުގަދަކުރުމަށް ކުރާ މަސައްކަތަކީ ސަރަހައްދީ ހަމަޖެހުމާއި ގައުމުގެ މިނިވަންކަން ދެމެހެއްޓުމަށް ކުރެވޭ މުހިންމު މަސައްކަތެކެވެ.
