ބަންގްލަދޭޝްގައި އިދިކޮޅު ސިޔާސީ ފަރާތްތަކާއި އާންމު ރައްޔިތުންގެ މަދަނީ އަދި ސިޔާސީ ހައްގުތަކަށް އަރައިގަނެ، ގާނޫނާ ޚިލާފަށް މީހުން ހައްޔަރުކުރުމުގެ އަމަލުތައް މިހާރުގެ ސަރުކާރުން ހިންގަމުންދާ ކަމަށް އެމެރިކާގެ ހިއުމަން ރައިޓްސް ވޮޗް (އެޗްއާރުޑަބްލިއު) އިން ތުހުމަތުކޮށްފި އެވެ.
އިންސާނީ ހައްގުތަކަށް މަސައްކަތްކުރާ ބައިނަލްއަގުވާމީ ޖަމިއްޔާއިން އަންގާރަ ދުވަހު ނެރުނު ބަޔާނެއްގައި ބުނެފައިވަނީ، ސިފައިންނާއި ފުލުހުން ގުޅިގެން އިދިކޮޅު ފަރާތްތަކަށް އަމާޒުކޮށް ބޮޑެތި ފިއްތުންތަކެއް ކުރިމަތި ކޮށް ވެރިކަން ކުރާ ބަންގްލަދޭޝް ނޭޝަނަލިސްޓް ޕާޓީ (ބީއެންޕީ) ގެ ސަޕޯޓްގައި އިދިކޮޅު މީހުން ހައްޔަރު ކުރަމުންދާ ކަމަށެވެ. އެގޮތުން ސެޕްޓެމްބަރު 26 ވަނަ ދުވަހު ވާއަތުފިޔައިގެ ޕާޓީއެއް ކަމަށްވާ ޖާތިޔާ ސަމާޖްތަންތުރިކް ދަލް (ޖޭއެސްޑީ) ގެ އެއްވުމަކުން 290 އަށްވުރެ ގިނަ މީހުން ހައްޔަރުކުރި ހާދިސާއަކީ އިންސާނީ ހައްގުތަކަށް އަރައިގަތުމުގެ އެންމެ ފަހުގެ ނުރައްކާތެރި މިސާލު ކަމަށް އެޗްއާރުޑަބްލިއު އިން ފާހަގަކުރެ އެވެ.
ޑާކާގައި ބޭއްވި މި އެއްވުމުން މީހުން ހައްޔަރުކުރީ ބީއެންޕީގެ ޒުވާނުންގެ ގޮފި ކަމަށްވާ ޖާތިޔާތަބާދީ ޖޫބޯ ދަލްގެ މެންބަރުން، އެއީ މަނާކޮށްފައިވާ ކުރީގެ ބޮޑުވަޒީރު ޝެއިޚް ހަސީނާގެ އަވާމީ ލީގުގެ "ސިއްރު" އެއްވުމެއް ކަމަށް ވާހަކަ ފަތުރައި ތުހުމަތުކުރުމާ ގުޅިގެންނެވެ. މީގެ ތެރެއިން 27 މީހަކު ބަންދުގައި ބަހައްޓަން ކޯޓުން އަމުރުކުރީ، އަވާމީ ލީގުގެ ޝިއާރެއް ކަމަށްވާ "ޖޯއި ބަންގްލާ" ގޮވާފައިވާ ކަމަށް ބުނެ އެވެ.
ޖާތިޔާ ސަމާޖްތަންތުރިކް ދަލްއަކީ 2009 އިން 2024 އަށް ބަންގްލަދޭޝްގައި ވެރިކަން ކުރި އަވާމީ ލީގުގެ 14 ޕާޓީގެ އިއްތިހާދުގައި ހިމެނޭ ޕާޓީއެކެވެ. އެ ސަރުކާރު ވެއްޓުނީ ދަރިވަރުން އިސްނަގައިގެން ހިންގި މުޒާހަރާތަކާ ގުޅިގެންނެވެ.
މިއަހަރުގެ ފެބްރުއަރީ މަހު އިންތިޚާބު ކާމިޔާބުކޮށް ވެރިކަމަށް އައި ބީއެންޕީން، އަވާމީ ލީގުގެ ސަރުކާރުގައި ބޮޑެތި އަނިޔާތަކާ ކުރިމަތިލާންޖެހުނު ނަމަވެސް، މިހާރު އެޕާޓީން ދަނީ ވާދަވެރިންނާ ދެކޮޅަށް އެއްވެސް ދައުވާއަކާ ނުލައި ގާނޫނާ ހިލާފަށް މީހުން ހައްޔަރުކުރަމުން ކަމަށް އެޗްއާރުޑަބްލިއު އިން ބުންޏެވެ.
ސެޕްޓެމްބަރު 26 ގައި ބާރިސާލްއިންވެސް އަވާމީ ލީގުގެ 12 އެކްޓިވިސްޓުން ހައްޔަރުކުރިއިރު، އޭގެ ދެ ދުވަސް ފަހުން އެންޓި-ޓެރަރިޒަމް ގާނޫނުގެ ދަށުން ޑާކާއިން އިތުރު 15 މީހަކު ހައްޔަރުކޮށްފައިވެ އެވެ. ހައްޔަރުކުރެވުނު މީހުން ބުނެފައިވަނީ އެމީހުން އެއްވީ ހަސީނާގެ އުފަންދުވަސް ފާހަގަކުރުމަށް ކަމަށެވެ.
"ހަސީނާގެ އަނިޔާވެރި ވެރިކަމުގައި ޝަރީއަތުން ބޭރުން މީހުން މެރުމާއި، ވަގަށް ނެގުމާއި، އަނިޔާކުރުން ފަދަ އިންސާނީ ހައްގުތަކަށް އަރައިގަތުމުގެ ބޮޑެތި ޖަރީމާތައް ހިންގާފައިވޭ. ބީއެންޕީ ވެރިކަމަށް އައީ އިންސާނީ ހައްގުތަކާއި ގާނޫނީ ސިޔާދަތު އިއާދަކުރާނެ ކަމުގެ ވައުދާއެކު. ނަމަވެސް، އޭގެ ބަދަލުގައި ނުހައްގުން މީހުން ހައްޔަރުކޮށް، ވަގުތީ ސަރުކާރުން ހުށަހެޅި ރައްކާތެރިކަމުގެ ފިޔަވަޅުތައް ދަނީ ފަހަތަށް ޖައްސަމުން،" އެޗްއާރުޑަބްލިއު ގެ ބަޔާނުގައިވެ އެވެ.
ބައިނަލްއަގުވާމީ އިންސާނީ ހައްގުތަކާ ބެހޭ ގާނޫނުން ކޮންމެ މީހަކަށްވެސް ޚިޔާލު ފާޅުކުރުމާއި އެއްވެ އުޅުމުގެ މިނިވަންކަން ކަށަވަރުކޮށްދޭކަން ފާހަގަކޮށް، މާޒީގައި އަވާމީ ލީގުން ހިންގާފައިވާ އިންސާނީ ހައްގުތަކަށް އަރައިގަތުމުގެ އަމަލުތަކަކީ މިހާރު ބީއެންޕީން ހިންގާ ބޭއިންސާފު އަމަލުތަކަށް އޮތް ބަހަނާއެއް ނޫން ކަމަށްވެސް އެޗްއާރުޑަބްލިއު އިން ވަނީ ބުނެފައެވެ.
