ބަންގްލާދޭޝްގެ ވެރިރަށް ޑާކާ ކައިރީގައިވާ ސައުތު ކެރާނީގަންޖުގައި ފުލުހުން ހިންގި ޚާއްސަ ރެއިޑެއްގައި، ބޮން އުފެއްދުމަށް ބޭނުންކުރާ ގިނަ އަދަދެއްގެ މާއްދާތަކާއެކު 9،000 ކަރުދާސް މާސްކު ހޯދައި، އެކަމާ ގުޅުންހުރި މީހަކު ހައްޔަރުކޮށްފިއެވެ.
ފުލުހުންގެ އިދާރާތަކާ ހަވާލާދީ މީޑިއާ ރިޕޯޓުކޮށްފައިވާ ގޮތުގައި، މި ރެއިޑުގައި ހައްޔަރުކޮށްފައިވަނީ އުމުރުން 30 އަހަރުގެ ޒާހިދު ހަސަން އީމޮން ނަމަކަށް ކިޔާ މީހެކެވެ. އޭނާ ހައްޔަރުކޮށްފައިވަނީ ބަގާޕޫރު ސަރަހައްދުންނެވެ. މި ހަރަކާތަކީ ފާއިތުވި ސެޕްޓެމްބަރު މަހުގެ 19 ވަނަ ދުވަހު ޖާތުރާބާރީ ޕޮލިސް ސްޓޭޭޝަން ކުރިމަތީގައި އަތުން ހަދާފައިވާ ބޮމެއް ގޮއްވާލި ހާދިސާއާ ގުޅިގެން ފުލުހުން ފެށި ތަހުގީގުގެ ތެރެއިން ތިލަވި ކަމެކެވެ.
ޖާތުރާބާރީގައި ދިން ހަމަލާގައި އީމޮންގެ ބައިވެރިވުން އޮތްކަމަށް ޝައްކުކުރެވިގެން ހިންގި ތަހުގީގުގައި އޭނާ ހައްޔަރުކުރުމަށްފަހު، އޭނާ ދިން މައުލޫމާތުގެ މައްޗަށް ބިނާކޮށް ފުލުހުން ވަނީ ބޮން ހެދުމަށް ބޭނުންކުރާ ގިނަ އަދަދެއްގެ ތަކެތި އަތުލައިގެންފައެވެ.
އޭގެ ތެރޭގައި އަތުން ހަދާ ބޮން އުފެއްދުމަށް ބޭނުންކުރާ 1.5 ކިލޯގްރާމްގެ ކޯސްޓިކް ސޯޑާ އާއި 1.6 ކިލޯގްރާމްގެ ކައްސަދުވާނި ހިމެނެއެވެ. މީގެ އިތުރުން، ބޮމުގެ އެތެރެއަށް އަޅައިގެން ގެއްލުން ބޮޑުކުރުމަށް ބޭނުންކުރާ 5 ކިލޯގްރާމްގެ މާބަލްއާއި، 2 ކިލޯގްރާމްގެ 1 އިންޗީގެ މޮހޮރާއި، ބޮން ބަންދުކުރުމަށް ބޭނުންކުރާ ޚާއްސަ 20 ރަތް ސެލޯފޭން ޓޭޕާއި 11 ކަޅު ސެލޯފޭން ޓޭޕް ފުލުހުންގެ ބާރުގެ ދަށަށް ވަނީ ގެންގޮސްފައެވެ.
މި ތަކެތީގެ އިތުރުން، ތިން ފޮށީގައި ބަންދުކޮށްފައި ހުރި 9،000 ކަރުދާސް މާސްކާއި، މާސްކު ހަދަން ބޭނުންކުރާ އިލާސްޓިކްގެ 30 ޕެކެޓު އަދި ބޮން ހެދުމަށް ބޭނުންކުރާ މާއްދާތައް މުގުރުމަށް ބޭނުންކުރި ކަމަށް ބެލެވޭ ބްލެންޑަރަކާއި އޭގެ ސާމާނުވެސް ފުލުހުން ވަނީ ހޯދާފައެވެ.
ސެޕްޓެމްބަރު 19 ގައި ދިން ހަމަލާއާއި، މި މައްސަލައިގައި ހައްޔަރުކުރެވުނު އީމޮންގެ ބައިވެރިވުން އޮތް މިންވަރު ދެނެގަތުމަށްޓަކައި ބަންގްލާދޭޝް ފުލުހުން ދަނީ އިތުރަށް ތަހުގީގު ހިންގަމުންނެވެ. މި ސަރަހައްދުގެ އަމަންއާމާނާއި ސަލާމަތީ މަސްރަހު ބެލެހެއްޓުމަށްޓަކައި ސިފައިންނާއި ފުލުހުން ގުޅިގެން އިތުރު ތަހުގީގުތައް ކުރިއަށްގެންދާ ކަމަށް ބުނެފައި ވެއެވެ.
