އެއީ ޢިރާޤުގެ މައިސާން ޕްރޮވިންސްގެ ހިމޭން ރެއެކެވެ. މީގެ 17 އަހަރު ކުރިން، އެ ރޭ ހިނގި ބިރުވެރި ޖަރީމާއެއްގެ ހިޔަނި އެތައް އަހަރެއް ވަންދެން އެ އާއިލާގެ މައްޗަށް އެޅިފައި އޮތެވެ. އަންހެނަކު ރަހީނުކޮށް، އަނިޔާވެރި ގޮތަކަށް މަރާލުމަށްފަހު، އެ ހާދިސާގެ އެއްވެސް ނިޝާނެއް ނެތް ގޮތަށް ގާތިލު ވަނީ ފިލައިގެން ގޮސްފައެވެ. ނަމަވެސް، ޤާނޫނުގެ ދިގު އަތުން އެ ޖަރީމާ ހިންގި މީހާ މިއަދު މިވަނީ ހިފަހައްޓާފައެވެ.
މައިސާންގެ ޕޮލިސް ކޮމާންޑުން ހާމަކުރި ގޮތުގައި، 17 އަހަރުވީ މި ފޮރުވިފައިވާ މައްސަލަ ހައްލުކުރެވުނީ ފުލުހުންގެ އިންޓެލިޖެންސް ޓީމުތަކުން ކުރި ބުރަ މަސައްކަތުންނެވެ. އެތައް އަހަރެއްގެ ހޯދުންތަކަށް ފަހު، އެ ޖަރީމާ ހިންގި މީހާގެ ވަނަވަރު ދެނެގަނެ، އޭނާ ހައްޔަރުކުރުމަށް ފުލުހުންނަށް ކާމިޔާބުވީއެވެ.
ތަހުގީގަށް އެނގިފައިވާ ގޮތުގައި، މި އަނިޔާވެރި ޖަރީމާގެ ފަހަތުގައި އޮތީ މާލީ ދަހިވެތިކަމެވެ. އެ އަންހެން މީހާ ރަހީނުކުރުމަށްފަހު، އޭނާ މިނިވަން ކުރުމުގެ ބަދަލެއްގެ ގޮތުން 20,000 ޑޮލަރު ދިނުމަށް ގާތިލު ވަނީ އާއިލާގައި އެދިފައެވެ. ނަމަވެސް، އާއިލާއިން އެ ފައިސާ ދިނުމަށް އުޒުރުވެރިވުމުން، ގާތިލު ވަނީ އަނިޔާވެރި ގޮތަކަށް އޭނާ މަރާލައި، ހަށިގަނޑު ވަޅުލައި ފޮރުވާފައެވެ.
ފުލުހުންގެ ތަހުގީގުގައި ގާތިލު ވަނީ މި ހުރިހާ ކަމަކަށް އިއުތިރާފުވެފައެވެ. މިހާރު އޭނާ ވަނީ ޢިރާޤުގެ ޤާނޫނުލްޢުޤޫބާތުގެ 406 ވަނަ މާއްދާގެ ދަށުން ޝަރީއަތަށް ހާޒިރުކޮށްފައެވެ. މިއީ ރާވައިގެން މީހުން މެރުމުގެ ކުށަށް މަރުގެ އަދަބު ކަނޑައެޅޭ މާއްދާއެވެ.
މިއީ ޢިރާޤުގައި ހިނގި ފުރަތަމަ މިފަދަ ހާދިސާއެއް ނޫނެވެ. މީގެ ކުރިން މެއި މަހު، ބާބިލް ޕްރޮވިންސްގައި ވެސް 21 އަހަރު ކުރިން ހިންގި މަރުގެ މައްސަލައެއް ފުލުހުން ވަނީ ބޭޒާރުކޮށްލާފައެވެ. އެ މައްސަލައިގައި ވެސް ގާތިލު ވަނީ އަހަރުތަކެއް ވަންދެން ފިލައިގެން އުޅުމަށްފަހު، މަރުގެ ސެޓްފިކެޓް އޮޅުވާލައިގެން ޤާނޫނުގެ ބާރުން ސަލާމަތްވާން މަސައްކަތްކޮށްފައެވެ.
މައިސާންގައި ހިނގި މި ހާދިސާއަކީ ޒަމާންތަކެއް ވަންދެން ނުލިބި އޮތް އިންސާފު، އެ އާއިލާއަށް ލިބުނު ފުރަތަމަ ފިޔަވަޅެވެ.
