އިނގިރޭސިވިލާތުގެ ޕްރިންސެސް ޑަޔާނާ އަވަހާރަވި ހާދިސާއަށް 30 އަހަރު ފުރެން ކައިރިވެފައިވަނިކޮށް، އޭނާގެ ހަގީގީ ހަޔާތްޕުޅާއި މަރުގެ ހާދިސާގެ ތަފްސީލުތައް ހާމަކޮށްދޭ ހާއްސަ ފޮތެއް ނެރުމަށް އޭނާގެ އަޚު އާރލް ޗާލްސް ސްޕެންސަރ ނިންމަވައިފިއެވެ. "ޑަޔާނާ، މައި ސިސްޓަރ" ގެ ނަމުގައި ނެރޭ މި ފޮތް މިއަހަރުގެ ސެޕްޓެމްބަރު 22 ގައި އިނގިރޭސިވިލާތާއި ދުނިޔޭގެ އެކި ކަންކޮޅުތަކުގައި ޝާއިއުކުރުމަށް ވަނީ ހަމަޖެހިފައެވެ.
މި ފޮތް ޝާއިއުކުރާ "ޕެންގުއިން ރެންޑަމް ހައުސް" އިން ބުނެފައިވާ ގޮތުގައި، މިއީ ޑަޔާނާ އަވަހާރަވި ހާމަކަން ބޮޑު ހާދިސާއާއި އެކަމަނާގެ ތަފާތު ސަގާފީ އަދި އިޖުތިމާއީ ހަޔާތްޕުޅާ ގުޅޭގޮތުން އޭނާގެ އަޚު ވާހަކަައްކަވާ ފުރަތަމަ ފަހަރެވެ.
1997 ވަނަ އަހަރުގެ އޮގަސްޓު މަހު ޕެރިސްގައި ދިމާވި ނުރައްކާތެރި ކާރު އެކްސިޑެންޓެއްގައި ޑަޔާނާ އަވަހާރަވި ހާދިސާއާ ގުޅިގެން މީޑިއާއިން ދައްކަމުންދާ ގިނަ ވާހަކަތަކަކީ ހަގީގަތާ ހިލާފު، ދޮގު މައުލޫމާތުތަކެއް ކަމަށާއި، މި ފޮތުގެ މައިގަނޑު ބޭނުމަކީ އެ ހަގީގަތްތައް ސާފުކޮށްދިނުން ކަމަށް ސްޕެންސަރ ފާހަގަކުރެއްވިއެވެ.
އާރލް ސްޕެންސަރ ސިފަކުރެއްވި ގޮތުގައި ޑަޔާނާއަކީ އަމިއްލަ ނަފްސަށް އޮންނަ އިތުބާރު ކުޑަނަމަވެސް، އޯގާތެރިކަމާއި މީހުންގެ ހިތް ދަމައިގަންނަ ލޯބިން ފުރިގެންވި، ދުނިޔެއަށް ބޮޑެތި އެދެވޭ ބަދަލުތަކެއް ގެނެސްދެއްވި އަސަރުގަދަ ޝަހުސިއްޔަތެކެވެ.
12 ބަހަކަށް ތަރުޖަމާކުރުމަށް ހަމަޖެހިފައިވާ މި ފޮތަކީ، 20 ވަނަ ގަރުނުގެ އެންމެ ނުފޫޒުގަދަ އެއް އަންހެން ކަނބަލެއްގެ ހަޔާތުގެ މައްޗަށް އަލިއެޅުވޭ ތާރީހީ މުހިންމު ލިޔުމެއްގެ ގޮތުގައި މުހައްލިލުން ދަނީ ސިފަކުރަމުންނެވެ.
