މާލެ ސިޓީގައި މަސްތުވާތަކެތި ބޭނުންކުރުމުގެ ޚިދުމަތް ފޯރުކޮށްދެމުންދާ ކަމަށް ތުހުމަތުކުރެވޭ ތަނެއް، ކޯޓު އަމުރެއްގެ ދަށުން ތިން މަސް ދުވަހުގެ މުއްދަތަކަށް ބަންދުކޮށްފިއެވެ. މ. ލޭންޑްއޮފްގާރޑްންގެ ނަމަކަށް ކިޔާ އިމާރާތުގެ ބައެއް ބަންދުކުރުމަށް ކޯޓުން އަމުރުކުރީ ހޯމަ ދުވަހުއެވެ. މި އަމުރުގެ ދަށުން އެ ތަން އަންނަ އޮކްޓޯބަރު މަހުގެ 11 ވަނަ ދުވަހުގެ ނިޔަލަށް ބަންދުވާނެއެވެ. މިއީ މާލޭގައި މަސްތުވާތަކެތީގެ ވަބާ ފެތުރުމަށް ބޭނުންކުރާ ތަންތަން ހުއްޓުވުމަށް ދިވެހި ފުލުހުންގެ ޚިދުމަތުން ކުރަމުންދާ މަސައްކަތުގެ ތެރެއިން، މި އަހަރު ތެރޭގައި ބަންދުކުރި 6 ވަނަ ތަނެވެ.
މިއަހަރު ބަންދުކުރެވުނު އިތުރު ތަންތަން:
ފުލުހުންގެ ތަފާސްހިސާބުތަކުން ދައްކާ ގޮތުން، މި އަހަރުގެ މެއި މަހުން ފެށިގެން މިހާތަނަށް 5 ތަންއް ވަނީ ތިން މަސް ދުވަހުގެ މުއްދަތަކަށް ބަންދުކޮށްފައެވެ.
| ތަނުގެ ނަން | ބަންދުކުރި މުއްދަތު |
| ހ. ގުންޒަރު | 6 މެއި – 3 އޮގަސްޓު 2026 |
| މ. ތަރިވިލާގެ | 22 މެއި – 22 އޮގަސްޓު 2026 |
| މ. އަމީރާމަންޒިލް (ބައެއް) | 1 ޖޫން – 1 ސެޕްޓެމްބަރު 2026 |
| މއ. ސެވަން އެންޑް ހައުސް | 11 ޖޫން – 9 ސެޕްޓެމްބަރު 2026 |
| ހ. ކަނޑުފިނިގެ (ކޮޓަރިއެއް ) | 25 ޖޫން – 24 ސެޕްޓެމްބަރު 2026 |
ފުލުހުން އިންޒާރުދޭ ގޮތުގައި، ކޯޓު އަމުރެއްގެ ދަށުން ބަންދުކޮށްފައިވާ ތަންތަނަށް ހުއްދަނެތި ވަދެނުކުމެ ހެދުމަކީ ގާނޫނީ ކުށެކެވެ. މިފަދަ އަމަލުތައް ހިންގާ ފަރާތްތަކާމެދު ގާނޫނީ ފިޔަވަޅު އަޅާނެ ކަމަށް ފުލުހުން ބުނެއެވެ.
މަސްތުވާތަކެއްޗާ ބެހޭ ގާނޫނުގެ ދަށުން ލިބިފައިވާ ބާރުތައް ބޭނުންކޮށް، މާލޭގެ އެކި ހިސާބުތަކުގައި މަސްތުވާތަކެތީގެ ވިޔަފާރިއާއި ބޭނުންކުރުމަށް ހުޅުވާފައިވާ ތަންތަން ހޯދައި، އެ ތަންތަން ބަންދުކުރުމުގެ މަސައްކަތް ހުއްޓުމެއްނެތި ކުރިއަށްގެންދާނެ ކަމުގެ ޔަގީންކަން ފުލުހުން ވަނީ ދީފައެވެ.
