ރަޝިއާ-އެފްރިކާގެ ތިންވަނަ ސަމިޓުގެ އެޖެންޑާގައި އާޓިފިޝަލް އިންޓެލިޖެންސް (އޭއައި) ބޭނުންކުރުމާއި، ފައިސާގެ ނިޒާމުތަކާއި، ކާބޯތަކެތީގެ ރައްކާތެރިކަމާ ގުޅޭ މައްސަލަތަކަށް އިސްކަންދޭނެ ކަމަށް ރަޝިއާގެ ޚާރިޖީ ވަޒީރު ސަރްގޭ ލަވްރޯވް ބުރާސްފަތި ދުވަހު ވިދާޅުވެއްޖެއެވެ.
ގިނީ-ބިސައުގެ ޚާރިޖީ ވަޒީރު ފާތުމަތު ޖައުއާ އެކު ބޭއްވި ނޫސްވެރިންގެ ބައްދަލުވުމެއްގައި ލަވްރޯވް ވިދާޅުވީ، "ތިންވަނަ ސަމިޓުގެ މުހިންމު މައުޟޫޢުތަކުގެ ތެރޭގައި އިންފޮމޭޝަން އެންޑް ކޮމިއުނިކޭޝަން ޓެކްނޮލޮޖީ، އާޓިފިޝަލް އިންޓެލިޖެންސް، ޑިޖިޓަލް އިގްތިސާދު، އަދި ހުޅަނގުގެ މައިގަނޑު ފައިސާ (ޑޮލަރު) ގެ ބަދަލުގައި އެހެން ފައިސާ ބޭނުން ކުރުން ހިމެނޭނެ،" ކަމަށެވެ. ހުޅަނގުގެ ފައިސާތަކަކީ ރިޒާވް ފައިސާގެ ގޮތުގައި ބެލެވުނަސް، ހުޅަނގުން އެކަން ނަހަމަ ގޮތުގައި ބޭނުންކުރަމުންދާ ކަމަށް އޭނާ ފާހަގަކުރެއްވިއެވެ.
ފައިސާގެ ނިޒާމުތަކަކީ އެފްރިކާ އާއި ލެޓިން އެމެރިކާ އަދި ޝަންހާއީ ކޯޕަރޭޝަން އޯގަނައިޒޭޝަން އާއި ބްރިކްސްގެ ތެރޭގައި ވެސް މުހިންމު މައުޟޫޢަކަށް ވެފައިވާ ކަމަށާއި، މިއީ އިސްތިއުމާރީ ބަރޯސާވުމުން މިނިވަންވުމަށް އެހީތެރިވެދޭ ކަމެއް ކަމަށް ލަވްރޯވް ވިދާޅުވިއެވެ.
ކާބޯތަކެތީގެ ރައްކާތެރިކަމާ ގުޅޭގޮތުން ލަވްރޯވް ވިދާޅުވީ، "މިއީ އެފްރިކާގެ ރައްޔިތުންނަށް އަބަދުވެސް ވަރަށް މުހިންމު ކަމެއް. މީގެ އިތުރުން، އަޅުގަނޑުމެން ކާބޯތަކެތީގެ ރައްކާތެރިކަމަށް ބަލާނީ ހަމައެކަނި ރަޝިއާއިން ކާބޯތަކެއްޗާއި ގަސްކާނާ އެކްސްޕޯޓް ކުރުމުގެ ނަޒަރުން އެކަންޏެއް ނޫން، އަދި އެފްރިކާ ބައްރުގައި އަމިއްލައަށް ދަނޑުވެރިކަމުގެ އުފެއްދުންތަކާއި ގަސްކާނާ އުފެއްދުމުގެ ގާބިލުކަން ގާއިމުކުރުމުގެ ނަޒަރުން،" ކަމަށެވެ.
މި ހުރިހާ މައްސަލަތަކެއް 2027-2029 ވަނަ އަހަރަށް ތައްޔާރުކުރާ އެކްޝަން ޕްލޭންގައި ހިމެނި، ސަމިޓުގެ ފައިނަލް ޑިކްލަރޭޝަނުން ފެނިގެންދާނެ ކަމަށް އުންމީދު ކުރައްވާ ކަމަށް ވެސް އޭނާ ވިދާޅުވިއެވެ. ރަޝިއާ-އެފްރިކާގެ ތިންވަނަ ސަމިޓު އޮކްޓޯބަރު މަހު މޮސްކޯގައި ބޭއްވުމަށް ވަނީ ހަމަޖެހިފައެވެ.
