އީރާނުގެ ކުރީގެ އެންމެ މަތީ ވެރިޔާ އިމާމް އާޔަތުﷲ އަލީ ޚާމަނާއީ އަވަހާރަކޮށްލުމަށް އިސްރާއީލަށް މަގުފަހިވި ޖާސޫސީ މައުލޫމާތު ލީކުވި މައްސަލަ އަދިވެސް ހައްލުނުވެ އޮވެދާނެ ކަމަށް އީރާނުގެ ޚާރިޖީ ވަޒީރު އައްބާސް އަރާގްޗީ ވިދާޅުވެއްޖެއެވެ.
ފާރިސީ ބަހުން ދެއްވި އިންޓަވިއުއެއްގައި އަރާގްޗީ ވިދާޅުވީ، ޚާމަނާއީ އަވަހާރަކޮށްލި ދުވަހު އީރާނުގެ ސަރުކާރުގެ އެންމެ މަތީ ފަންތީގެ ބައްދަލުވުންތައް ބޭއްވުނު ވަގުތުތައް "ދުޝްމަނުންނަށް" އެނގިފައިވާ ގޮތަށް ބަލާއިރު، އެ ގައުމުގެ ސިއްހީ އަދި ސަލާމަތީ ނިޒާމުގެ ތެރޭގައި ހުރި ބޮޑެތި ބޮލު ރިހުންތައް އަދިވެސް މުޅިން ނައްތާލެވިފައިވާ ކަމަށް ގަބޫލެއް ނުކުރެއްވޭ ކަމަށެވެ. މިއީ އީރާނުގެ ދާޚިލީ ސަލާމަތާ މެދު އުފެދިފައިވާ ކަންބޮޑުވުންތައް އިތުރަށް ބޮޑުވެގެންދިޔަ ހާމަކުރުމެކެވެ.
"ދުޝްމަނުންނަށް އަހަރެމެންގެ ރޭވުންތައް އެނގޭ"
ޚާރިޖީ ވަޒީރު ހާމަކުރެއްވި ގޮތުގައި، ފެބްރުއަރީ 28 ވީ ދުވަހުގެ ހެނދުނު އޭނާ ވަނީ ގައުމު އޮތީ ހަނގުރާމައެއްގެ ހާލަތުގައި ކަމަށް ވިދާޅުވެ ރައީސް މަސްއޫދު ޕެޒެޝްކިއަންއަށް އިންޒާރު ދެއްވާފައެވެ. އަދި އޭގެ ކުޑަވަގުތުކޮޅެއް ފަހުން، ޚާމަނާއީގެ އިސް މުޝީރަކާ ބައްދަލުކުރެއްވިތާ މާގިނައިރެއް ނުވަނީސް އިސްރާއީލުން ވަނީ ޚާމަނާއީ ހުންނެވި ތެހެރާންގެ ކޮމްޕައުންޑަށް ވަރުގަދަ ހަމަލާއެއްދީފައެވެ.
އެ ހަމަލާ ދިން ވަގުތަކީ ޚާމަނާއީ އޮފީހުގައި އިންނެވި ވަގުތުގެ އިތުރުން، އީރާނުގެ ފޮރިން ރިލޭޝަންސް ކައުންސިލާއި ޑިފެންސް ކައުންސިލްގެ މުހިންމު ބައްދަލުވުންތަކެއްވެސް އެއްވަގުތެއްގައި ހިނގަމުންދިޔަ ވަގުތެކެވެ. އަރާގްޗީ ވިދާޅުވީ މިފަދަ މަތީ ފަންތީގެ ބައްދަލުވުންތައް އެއްވަގުތެއްގައި ބޭއްވުމަކީ އާންމު ކަމެއް ނަމަވެސް، އިސްރާއީލަށް އެ ވަގުތުތައް އެހާ ސީދާކޮށް އެނގުމަކީ ޖާސޫސީ ނިޒާމު މުޅިން ފޭލިވެފައި އޮތުމުގެ ހެކިތަކެއް ކަމަށެވެ.
މި އިންޓަވިއުގައި އަރާގްޗީ ވަނީ އީރާނުގެ އާ ލީޑަރު މުޖްތަބާ ޚާމަނާއީ އަލީ ޚާމަނާއީގެ ދަރިކަލުން އެ މަގާމާ ހަވާލުވެވަޑައިގަތް ފަހުން އަދި ސީދާ ބައްދަލުވެވަޑައިނުގަންނަވާ ކަންވެސް ހާމަކުރައްވާފައެވެ. އޭނާ ވިދާޅުވި ގޮތުގައި އާ ވެރިޔާއާ ބައްދަލުކުރުމުގެ ފުރުސަތު މިހާތަނަށް ލިބިފައިވަނީ ވަރަށް މަދު ބަޔަކަށެވެ.
މި ވާހަކަތަކުން ހާމަވަނީ އާލީ ޚާމަނާއީ އަވަހާރަކޮށްލުމާ ގުޅިގެން އީރާނުގެ ސަރުކާރުގެ އެތެރޭގައި އުފެދިފައިވާ ބިރުވެރިކަމާއި، ޖާސޫސީ ވަސީލަތްތަކުގެ ބަލިކަށިކަމުގެ ސަބަބުން ގައުމުގެ ސަލާމަތީ ބާރުތަކަށް ނުތަނަވަސްކަން ކުރިމަތިވެފައިވާ މިންވަރެވެ.
