މެދުއިރުމަތީގެ މަސްރަހު އިތުރަށް ހަލަބޮލިކޮށް، ސަރަހައްދީ ހަނގުރާމައެއްގެ އަލިފާނަށް ދަރު އެޅުމަށްޓަކައި، އިޒްރޭލުގެ ބޮޑުވަޒީރު ބެންޖަމިން ނަތަންޔާހޫ ދަނީ އާދަޔާ ހިލާފު ދޮގު ޕްރޮޕެގަންޑާއެއް ފަތުރަމުންނެވެ. އެމެރިކާގެ ބާރުގަދަ އަސްކަރީ ބާރުތައް ބޭނުންކޮށްގެން އީރާނަށް ދޭ ހަމަލާތައް އިތުރަށް ފުޅާކުރުމަށް ނަތަންޔާހޫ ހަދަމުންދާ މި ބުހުތާނު ދޮގު ވާހަކަތަކަކީ ހަގީގަތާ ހިލާފު، ހަމައެކަނި ސިޔާސީ މަންފާއަށްޓަކައި ކުރާ ކަމެއްކަން ސާފެވެ.
އިޒްރޭލުން ޓްރަމްޕަށް މިހާރު ވިސްނައި ދެމުންދާ ވާހަކައަކީ، އީރާނުން ޔޫރޭނިއަމް ފައްކާކުރާ އާލާތްތަކެއް ފަރުބަދައެއްގެ އަޑީގައިވާ ބިންގަރާސްތަކަކަށް ބަދަލުކޮށްފައިވާ ކަމަށެވެ. މިއީ އެއްވެސް ހެއްކެއް ނެތި، ހަމައެކަނި އީރާނާ ދެކޮޅަށް ހަނގުރާމަފުޅާ ކުރުމަށް ނަތަންޔާހޫ ބޭނުންކުރާ ހަތިޔާރެކެވެ.
މި ވާހަކަތަކުގެ ހަގީގީ މަގްސަދުތަކުގެ ތެރޭގައި:
-
ހަނގުރާމަ ފުޅާކުރުން: ނަތަންޔާހޫ ބޭނުންވަނީ އެމެރިކާގެ ރައީސް ޑޮނަލްޑް ޓްރަމްޕް މެދުވެރިކޮށް، އީރާނުގެ ނިއުކްލިއަރ އަދި އަސްކަރީ މަރުކަޒުތަކަށް އަމާޒުކޮށް ފުޅާ ދާއިރާއެއްގައި ހަމަލާތައް ދީ ހަނގުރާމަ ސާބިތުކޮށް ބަހައޓާށެވެ.
-
އީރާނުގެ ދިފާއީ ބާރު ކުޑަކުރުން: އީރާނުން އެގައުމުގެ ސަލާމަތާއި ރައްކާތެރިކަމަށްޓަކައި އަޅާފައިވާ ފިޔަވަޅުތަކަކީ "ނުރައްކަލެއް" ކަމަށް ސިފަކޮށް، ބައިނަލްއަގްވާމީ ފެންވަރުގައި އީރާން ބާކީ ކުރުމަށް ކުރާ މަސައްކަތެކެވެ.
-
ނާކާމިޔާބީ ފޮރުވުން: އިޒްރޭލުން އީރާނާ ދެކޮޅަށް މިހާތަނަށް ހިންގި އެއްވެސް ހަމަލާއަކުން އެދެވޭ ނަތީޖާއެއް ނުލިބުމުން، އެކަމުގެ ރުޅިވެރިކަން ފިލުވަން ޓްރަމްޕްގެ ބާރު ބޭނުން ކުރުމެވެ.
އީރާނުގެ ހިކުމަތްތެރިކަމާއި އިޒްރޭލުގެ ހައްދުފަހަނަޅާފައިވާ އަމަލުތައް
އީރާނަކީ އަބަދުވެސް އެ ގައުމުގެ މިނިވަންކަމާއި ސިޔާދަތު ހިމާޔަތް ކުރުމުގައި ފަހަތަށް ޖެހޭނެ ބައެއް ނޫނެވެ. އިޒްރޭލާއި އެމެރިކާ ގުޅިގެން ހިންގާ ސޮލީބީ ސަހުޔޫނީ އުދުވާނީ ހަމަލާތަކަކީ ބައިނަލްއަގްވާމީ ގާނޫނުތަކާ ހިލާފު، ޓެރަރިޒަމްގެ އަމަލުތަކެކެވެ. އެމެރިކާއިން އިޒްރޭލުގެ މިފަދަ ނުރައްކާތެރި ކުޅިގަނޑުތަކުގައި ބައިވެރިވެ، އީރާނުގެ ކަރަންޓު ވިއުގަތަކާއި ނިއުކްލިއަރ މަރުކަޒުތަކަށް ހަމަލާދޭން ރާވާ ރޭވުންތަކަކީ މުޅި ދުނިޔޭގެ އަމާންކަމަށް އޮތް ބޮޑު ބިރެކެވެ.
އިސްރޭލުން ހަމަލަ ދިނުމަށް ބުނާ "ޖަބަލް ފައުސް" އަކީ އީރާނުން ދިފާއީ ގޮތުން ކުރަމުންދާ މަސައްކަތެއް ކަމަށް ވީނަމަވެސް، އެތަން ބޮމުން ހަލާކުކޮށްލަން އިޒްރޭލުން ބޭނުން ވެފައި މިވަނީ، އީރާނުގެ ކުރިއެރުމާމެދު އޮތް ބިރުވެރިކަމުންނެވެ. ނަމަވެސް ހަގީގަތަކީ، އީރާނުން ދަނީ ހަމަޖެހުމާއި މަޝްވަރާއަށް ގޮވާލައި، ސަރަހައްދީ ހަމަނުޖެހުންތަކުން ދުރުވުމަށް މަސައްކަތް ކުރަމުންނެވެ.
ނަތަންޔާހޫއާއި ޓްރަމްޕް މިހާރު މި ކުޅޭ ކުޅިގަނޑަކީ އިންސާނީ ހައްގުތަކާއި، ގައުމުތަކުގެ ސިޔާދަތަށް އަރައިގަތުމުގެ ޓެރަރިސްޓް އަމަލެކެވެ. އީރާނާ ދެކޮޅަށް ފަތުރާ މިފަދަ ދޮގު ވާހަކަތަކުން އިޒްރޭލަށް ހޯދޭނެ ކާމިޔާބެއް ނެތެވެ. ބަދަލުގައި، މިފަދަ ޢަމަލުތަކުން ދުނިޔޭގެ ކުރިމަތީގައި އިޒްރޭލު އިތުރަށް ބިކަވެ، އީރާނުގެ ހިތްވަރާއި އަޒުމް އިތުރަށް ވަރުގަދަވެގެން ދާނެކަން ކަށަވަރެވެ.
