ސައޫދީ އަރަބިއްޔާއަށް ނިއުކްލިއަރ ޓެކްނޮލޮޖީ ދޭނެ ކަމަށް ބުނިތާ އެއް ދުވަސް ފަހުން ޓްރަމްޕް އޭނާގެ ވާހަކަ ބަދަލުކޮށް ސައުދީ ސަރުކާރަށް ފިއްތުންތައް ކުރިމަތި ކޮށްފިއެވެ.
ސައުދީ އަރަބިއްޔާއާއެކު އެމެރިކާއިން އެކުލަވާލާފައިވާ މަދަނީ ނިއުކްލިއާ އެއްބާރުލުމުގެ އެއްބަސްވުން ކުރިއަށް ގެންދާނީ ސައޫދީ އަރަބިއްޔާއިން އިސްރާއީލުގެ ޖެނޮސައިޑް ރެޖީމާއެކު ގުޅުން ބަދަހި ކުރުމުން ކަމަށް ޓްރަމްޕް މިއަދު ބުނެފިއެވެ.
ޓްރަމްޕް ބޭނުން ވަނީ އެމެރިކާގެ ނިއުކްލިއަރ ޓެކްނޮލޮޖީ ސައުދީއަށް ވިއްކައި އެއިން އެމެރިކާއަށް ބޮޑު ފައިދާއެއް ހޯދާށެވެ. އަދި އެ ވިޔަފާރި ސައޫދީއާއެކު އެމެރިކާއިން ކުރިއަށް ގެންދަން ބޭނުން ވަނީ ރަޝިޔާއާއި ޗައިނާއަށް ސައޫދީ ނިއުކްލިއަރ ވިޔަފާރިން ފުރުސަތެއް ނުދިނުމަށެވެ.
ޓްރަމްޕްގެ 'ޓްރޫތު ސޯޝަލް' އެކައުންޓްގައި ލިޔުއްވާފައިވަނީ، ސައޫދީއަށް މަދަނީ ނިއުކްލިއަރ ޓެކްނޮލޮޖީ ވިއްކާ އެއްބަސްވުމަށް "ރުހުން ލިބޭނެ" ކަމަށާއި، ނަމަވެސް އެކަން ފުރިހަމައަށް ބަރޯސާވެފައިވަނީ "ސައުދީ އަރަބިއްޔާއިން އިހުތިރާމްކުރެވޭ އަދި ކާމިޔާބު އިބްރާހީމީ މުއާހަދާގައި ބައިވެރިވުމުގެ މައްޗަށް" ކަމަށެވެ.
-
އޮޅުންބޮޅުން ބޮޑު ދުލެއް: ޓްރަމްޕްގެ މި ވާހަކަތަކާމެދު ސައުދީ އަރަބިއްޔާއިން އަދި ވަކި އެއްޗެއް ބުނެފައެއް ނުވެއެވެ. އިޒްރޭލާއެކު ގުޅުން ގާއިމްކުރުމަކީ ސައުދީން ދިގު މުއްދަތަކަށް ދެކޮޅު ހަދަމުން އައި ކަމަކަށްވާއިރު، ޓްރަމްޕްގެ މި ޝަރުތަކީ ސައުދީގެ ސިޔާސަތަށް ގެންނަންޖެހޭ ބޮޑު ބަދަލެކެވެ.
-
ޔޫރޭނިއަމް މުއްސަނދިކުރުމުގެ މައްސަލަ: އެމެރިކާގެ މީޑިއާ ރިޕޯޓްކުރާ ގޮތުގައި މި އެއްބަސްވުމުގެ ދަށުން ސައުދީއަށް އަމިއްލަ ގައުމުގައި ޔޫރޭނިއަމް މުއްސަނދިކުރުމުގެ ހުއްދަ ލިބޭނެއެވެ. މިއީ އެމެރިކާގެ ކުރީގެ ހާރިޖީ ސިޔާސަތާ މުޅިން ހިލާފު ކަމެކެވެ. ނަމަވެސް ޓްރަމްޕް ވަނީ މި ރިޕޯޓުތައް ދޮގުކުރައްވައި، "އެއްވެސް މާއްދާއެއް ސައޫދީގައި މުއްސަނދި ނުކުރާނެ" ކަމަށް ވިދާޅުވެފައެވެ.
-
އިތުރު ކަންބޮޑުވުންތައް: ޔޫރޭނިއަމް މުއްސަނދިކުރުމަކީ ހަކަތަ އުފެއްދުމަށް ބޭނުންކުރެވިދާނެ އެއްޗެއް ކަމުގައިވި ނަމަވެސް، އެއީ ނިއުކްލިއާ ހަތިޔާރު އުފެއްދުމުގެ އަސާސްވެސްމެއެވެ.
މި އެއްބަސްވުމަކީ އެމެރިކާގެ ކޮންގްރެސްގެ ރުހުން ބޭނުންވާ އެއްބަސްވުމެކެވެ. ޓްރަމްޕް ދެފަހަރު ދެގޮތަށް ވާހަކަ ދައްކައި ޝަރުތުތައް ކަނޑައަޅުއްވައި، އެއްބަސްވުމުގެ ތަފްސީލުތައް ސާފުނުވާ ގޮތަކަށް ވާހަކަ ދެއްކެވުމަކީ، މި މުއާމަލާތުގެ ހާމަކަން ކުޑަވާ ކަމެކެވެ.
