މިނިވަން 61ގެ ތަޤްރީރު: ރައީސަށް ދައްކަވަން ކެރިވަޑައި ނުގަތް ވާހަކަތައް

މިނިވަން 61ގެ މުނާސަބާގައި ރައީސުލްޖުމްހޫރިއްޔާ ޑރ. މުޢިއްޒު ދެއްވި ތަޤްރީރަކީ، ކުރިއަށް މިއޮތް 2 އަހަރާއި 2 މަސް ދުވަސް ތެރޭގައި ގައުމު ރިއާސީ އިންތިޚާބަށް ފައްކާ ވަމުންދާ މުއްދަތުގައި ޕީއެންސީގެ ސަރުކާރުން އުންތިޚާބަށް ތައްޔާރުވުމުގެ އައު މެނިފެސްޓޯއެކެވެ.

މިއީ ލޯކަލް ކައުންސިލްގެ އިންތިޚާބުގައި ސިޓީތަކުން ޕީއެންސީއަށް ބޮޑު ނާކާމިޔާބީއެއް ލިބުނުތާ 3 މަހާ 22 ދުވަސް ފަހުން ދެއްވާފައިވާ ތަގްރީރެކެވެ.

1. މޯލްޑިވްސް ފަސްޓް އަދި ސަރަޙައްދީ ބާރުތައް

ތަގުރީރުގެ އެންމެ ބޮޑު ބައެއް ހޭދަކުރައްވާފައިވަނީ ޚާރިޖީ ސިޔާސަތަށެވެ. ގައުމުގެ ހަލާތާ ޚިލާފަށް ރައްޔިތުންގެ ސަމާލުކަން ދާޚިލީ މައްސަލަތަކުން ދުރުކޮށް، ޤައުމީ ސިޔާދަތާއި މިނިވަންކަމުގެ ޖަޒުބާތަށް ބަރޯސާވުމަށް ރައީސް ވަނީ މުހިންމު މަސައްކަތްތަކެއް ކުރައްވާފައެވެ.

• "ގޮނޑިކޮއްކޮ" ޚާރިޖީ ސިޔާސަތުގެ ފާޑުކިޔުން: އެމް.ޑީ.ޕީގެ ދުވަސްވަރު ގެންގުޅުނު ސިޔާސަތުތަކަށް ފާޑުވިދާޅުވަމުން، އެއީ ބޭރު ބައެއްގެ ދަށުގައި އޮތް "ގޮނޑިކޮއްކޮ ޚާރިޖީ ސިޔާސަތެއް" ކަމަށާއި އަދި އެއީ ޕްރޯ އިޒްރޭލް ސިޔާސަތެއް ކަމަށް ސިފަކުރެއްވިއެވެ.
  އިޒްރޭލުގެ ޕާސްޕޯޓް މަނާކުރުމާއި ފަލަސްޠީނުގެ މައްސަލާގައި މި ސަރުކާރުން ހިފަހައްޓާފައިވާ މިންގަނޑު ދަމަހައްޓާނެކަން ތަކުރާރުކޮށް ވިދާޅުވުމަކީ، ދިވެހި އާންމުންގެ ދީނީ އަދި އިޖުތިމާޢީ ވިންދާ ސީދާ ގުޅިގެންވާ ޕޮޕިއުލިސްޓް ސްޓްރެޓަޖީއެއް ކަމަށް ފެނެއެވެ. ރައީސް މިހެން ވިދާޅުވާއިރު ރާއްޖެއަށް އިޒްރޭލު ރައްޔިތުން އެމީހުންގެ ޑުއަލް ޕާސްޕޯޓްގައި އެތެރެ ވެއެވެ. އަދި ހޯދައި ބަލައި ފިނަމަ އިޒްރޭލު މީހުންގެ ވިޔަފާރިތައް ރިސޯޓްތަކުންވެސް ފެންނާނެއެވެ. މިއީ އެދްރެސް ނުކުރެވޭ މަތިމަތިން ދުއްވާލެވޭ މައްސަލައެކެވެ.

• އިންޑިޔާ ސިފައިންނާއި ޤާނޫނުއަސާސީގެ އާ އިންތައް: އިންޑިޔާ ސިފައިން ބޭރުކުރުމަކީ ކާމިޔާބީ ފާހަގަކުރައްވައި، ރައީސް ވަނީ މުސްތަޤުބަލުގައި އެފަދަ ކަމެއް ތަކުރާރުވިޔަ ނުދިނުމަށް ޤާނޫނުއަސާސީއަށް ގެނައި އިޞްލާޙުތަކަށް އަލިއޅުވާލައްވާފައެވެ. ރާއްޖޭގެ ކަނޑުގެ ސަރަޙައްދަށް ބަދަލެއް ގެނައުމަށާއި، ބޭރުގެ އަސްކަރީ ހަރަކާތްތަކަށް ރައްޔިތުންގެ މަޖިލީހުގެ 3/4 (ހަތަރުބައިކޮށްފައި ތިންބައި) ގެ ބޮޑު އަޣުލަބިއްޔަތެއް ހޯދަންޖެހޭ ގޮތަށް ގެންނެވި ބަދަލު ދިފާޢުކުރައްވަމުން، އިދިކޮޅު ފަރާތްތަކުން މިކަމާ ދެކޮޅު ހަދަނީ ކީއްވެތޯ ސުވާލު އުފެއްދެވިއެވެ.
  އިންޑިއާ ސިފައިން ހަގީގަތުގައި ފޭބީތޯ ނުވަތަ ޔުނިފޯމްގެ ބަދަލުގައި ގަންޖިފަރާހަށް ބަދަލު ކުރީތޯއާ މެދު ސުއާލު ކުރުމަކީ ޖާއިޒު ކަމެކެވެ!

• ޗާގޯސް މައްސަލައާއި ސާރކް ދިރުވުން: ކުރީ ސަރުކާރުން ކަނޑުން ބައެއް "ފިނޑިގޮތަކަށް ސިއްރުސިއްރުން ދޫކޮށްލާފައިވާ" ކަމަށް ތުހުމަތުކުރައްވައި، އެކަން އަނބުރާ ހޯދުމުގެ މަސައްކަތް ފަށާފައިވާކަން ހާމަކުރެއްވިއެވެ. ހަމައެއާއެކު، ޗާގޯސްގެ މިލްކުވެރިކަމުގެ މައްސަލައިގައި 9 ވަނަ ޙަސަން ރަސްގެފާނުގެ ލިޔުންކޮޅުތަކަށް ރިޢާޔަތްކޮށް، ރައިޓްފުލް އޯނަރާ ހަވާލުކުރަންޖެހޭނެ ކަމަށް ވިދާޅުވިއެވެ.
  ރައީސް ތަގްރީރުތަކުގައި މި ވާހަކަތައް ވިދާޅުވެއެވެ. ނަމަވެސް އެއް ތަގްރީރުން އަނެއް ތަގްރީރާ ދޭތެރޭ މިކަމުގައި ސަރުކާރުން ހޯދާ ކާމިޔާބީތައް ރައިސް ރައްޔިތުންނަށް ސާފުކޮށް ނުދެއްވާ މައްސަލައަކީ މި ކަމުގައި އެދެވޭ ނަތީޖާއެއް ފެންނަމުން ނުދާކަމުގެ ހެއްކެކެވެ.

• މަސައްކަތްނުކޮށް އޮތް "ސާރކް" ޖަމާޢަތް އަލުން އޮޕަރޭޝަނަލް ކުރުމަށް ރާއްޖެއިން މެދުވެރިއެއްގެ ދައުރު އަދާކުރަން ތައްޔާރަށް އޮތްކަން އިއުލާނުކުރެއްވިއެވެ.
  މިދުވަސްވަގު މެދުވެރިން ކަންކަން ކުރުމަށް އިސްނަގައިގެން އުޅޭ ބައިނަލްއަގްވާމީ މާހައުލުގައި ރާއްޖެވެސް މި ވަނީ މެދުވެރިއެއްގެ ދައުރަށް ފައިނަގާފައެވެ. ނަމަވެސް މައްސަލަ ބޮޑު ދެކުނު އޭޝިއާގައި މެދުވެރިއެއްގެ ދައުރު އަދާކުރުމަށް ރާއްޖެއަށް ލިބޭ ލެވޭރަޖަކީ ކޮބައިތޮއާއި އަދި އެފަދަ ކަމެއް ފަށައި ނޭދެވޭ މިސްރާބަކަށް ދިއުމުން އޭގެ ނަތީޖާ ތަހައްމަލު ކުރާނެ ގޮތާމެދު ވިސްނާލަން ޖެހެއެވެ.

2. ދާޚިލީ ސިޔާސަތާއި ޑިމޮކްރަސީ

އިންތިޚާބުން ލިބުނު ނާކާމިޔާބީގެ ފަހަތުގައި އޮތް ރައްޔިތުންގެ ނުތަނަވަސްކަމަށް ރައްދުދެއްވަމުން، ރައީސް މުޢިއްޒު ވަނީ ދާޚިލީ މިނިވަންކަމާއި ޑިމޮކްރަސީގެ މިންގަނޑުތައް މި ސަރުކާރުގައި ކުރިއަށްވުރެ މާ ބޮޑަށް ފުޅާވެފައިވާކަން ދައްކަވަން ބޮޑެތި ވަޢުދުތަކެއްވެ ވަޑައިގެންފައެވެ.

• ސިޔާސީ ބަދަލުހިފުމުގެ ނިމުން: ކުރީގެ ސަރުކާރުތަކުގައި ވެރިކަމަށް އަންނަ ބަޔަކު އެންމެ ފުރަތަމަ ކުރާކަމަކީ ކުރީގެ ވެރިޔާ ޖަލަށްލުން ކަމަށާއި، ނަމަވެސް މި ސަރުކާރުން އެ "ވިހަގަދަ ބަދަލުހިފުމުގެ ރޫޙު" ނައްތާލާފައިވާ ކަމަށް ވިދާޅުވިއެވެ. އިދިކޮޅު ފަރާތްތަކަށް ހަރަކާތްތެރިވުމަށާއި އެތެރޭގެ އިންތިޚާބުތައް ބޭއްވުމަށް ސްކޫލް ހޯލުތަކާއި ސަރުކާރުގެ ވަސީލަތްތައް ދޫކުރަމުންދާކަން ފާހަގަކުރެއްވިއެވެ.

• މީޑީއާ އާއި ނޫސްވެރިކަމަށް މާލީ މިނިވަންކަން: ނޫސްވެރިން ސަލާންޖެހުން ނައްތާލުމަށް ދައުލަތުގެ ބަޖެޓުން ފައިސާ ދޭން ފަށާފައިވާ ކަމަށާއި، އަދި ނޫސްވެރިންނަށް ރަމްޒީ ކުއްޔެއްގައި މަސައްކަތްކުރެވޭނެ "މީޑިއާ ވިލެޖެއް" ޤާއިމުކޮށް ނިމިފައިވާކަން ހާމަކުރެއްވިއެވެ.
  ދެފުށްފެންނަ ގޮތަށް ދައުލަތުންދޭ ފައިސާ މެނޭޖު ނުކުރުމަކީ މައްސަލައެކެވެ. އެންމެ ފުރަތަމަ މީޑިއާއަށް ދިން ފައިސާއަކީ ބުރާސްފަތި ދުވަހު ކުރި އިއުލާނަކަށް ވަގުތު ކުދަތަން ކޮށް އިޖާބަ ދޭ ގޮތަށް ކުރިއަށް ގެންދިޔަ މަސައްކަތެކެވެ. ދުވާލަކު އެންމެ ޚަބަރެއް އަޕްޑޭޓްވާ ނޫސްތަކާއި ރެގިއުލާކޮށް އަޕްޑޭޓްވާ ނޫސްތަކާއި ދެމެދު ތަފާތު ކުރުމެއް ނެތް ފއިސާ ދިނުމަކީ މަންޒެއް ދެއްކުން ބާވައެވެ؟ ނޫނީ މީޑިއާ ދިރުވުމުގެ މާނަ ނޭގި ކުރެވޭ މަސައްކަތެއް ބާވައެވެ؟
  މިސަރުކާރުގެ މީޑިއާއަށް މައުލޫމާތު ދެވެނީ ރައީސް އޮފީހުގައި ބާއްވާ ބައްދަލުވުންތަކުން ދެވޭ ސްޓޭޓްމެންޓްތަކުންނެވެ. ކޮްނމެ ދުވަހަކު ދިމާވާ މައްސަލަތަކަށް ސުއާލެއް ކޮށްލުމުން ޖަވާބެއް ލިބޭ ގޮތެއް ނުވެއެވެ. ތިރިން މައްޗަށް ފޯނު ނުނެގުމަކީ މިސަރުކާރުގެ ޕީއާރްގެ މައްސަލައެެކެވެ،

• އިންފޮމޭޝަން ކޮމިޝަނަރަށް ހަމަލާ: ތަގުރީރުގެ ތެރެއިން ރައިސް މުޢިއްޒު ވަނީ، ސަރުކާރުގެ ވުޒާރާތަކުން މަޢުލޫމާތު ހާމަކުރުމުގެ ޤާނޫނުގެ (އާރު.ޓީ.އައި) ދަށުން ސަތޭކަ އިންސައްތަ ފުރިހަމަކޮށްފައިވާ ކަމަށް އިންފޮމޭޝަން ކޮމިޝަނަރު ދާދި ފަހުން އިއުލާންކުރެއްވި އިއުލާނަށް އަލިއޅުވާލައްވާފައެވެ. މިއީ އާދައިގެ ބިއުރޮކްރެޓިކް ރިޕޯޓެއްގެ ގޮތުގައި ހުށަހެޅުއްވުމުގެ ބަދަލުގައި، މުޢިއްޒު މި ފުރުސަތު ބޭނުންކުރެއްވީ އެ މަޤާމުގައި ހުންނެވި ބޭފުޅާ ސިޔާސީ ގޮތުން އިދިކޮޅު ފަރާތްތަކާ ގުޅިފައިވާ، އަދި އިދިކޮޅުގެ އޯޑަރަށް މަސައްކަތް ކުރާ ފަރާތެއްކަން ކަށަވަރުކޮށްދެމުން، އެ މުއައްސަސާގެ ސިޔާސީ ހަޤީޤަތަށް ފާޑު ވިދާޅުވުމަށެވެ. މިގޮތަށް ވާހަކަ ބައްޓަން ކުރައްވަމުން ރައީސް ނުސީދާކޮށް ވިދާޅުވީ، ސިޔާސީ ވާދަވެރިންގެ ނުފޫޒު އޮތް ނުވަތަ އެފަރާތްތަކާ އެއްކޮޅަށް މަސައްކަތްކުރާ ކޮމިޝަނަރަކު ކަމުގައިވީ ނަމަވެސް، މި ސަރުކާރުގެ ދެފުށް ފެންނަ ސިޔާސަތު އިންތިހާއަށް ފުރިހަމަކަމުން، އެއްވެސް މީހަކަށް އެ ހަޤީޤަތް ފޮރުވާލައި ނުވަތަ ޑޭޓާ އޮޅުނުލެވުނު ކަމަށެވެ. މިކަމުގެ ސަބަބުން، މުޢިއްޒު ވަނީ މުސްތަގިއްލު މުއައްސަސާއެއްގެ ރިޕޯޓެއް ހަތިޔާރަކަށް ހައްދަވައި، ސަރުކާރުގެ ހިންގުން ދިފާޢުކުރައްވާފައެވެ. ހަމައެއާއެކު މިނިވަންކަމާއެކު މަސައްކަތް ކުރާ މުއައްސަސާއެއްގެ މަސައްކަތާ މެދު އާންމުންގެ ހިތްތަކުގައި ބޮޑު ޝައްކެއްގެ ހިޔަންޏެއް އަޅުއްވާފައެވެ.
  އިންފޮމޭޝަން ކޮމިޝަނަރަކީ އެމްޑީޕީ ސަރުކާރުން އައްޔަން ކުރެއްވި ބޭފުޅެކެވެ، އަދި މިއީ މުސްތަގިއްލު ކަމާއެކު މި ގައުމުގައި ހިނގަމުންދާ މަދު މިނިވަން މުއައްސަސާތަކުގެ ތެރޭން ފާހަގަ ކުރެވޭ މުއައްސަސާއެކެވެ.

3. ކޮރަޕްޝަނާ ދެކޮޅަށް އަޅާ ފިޔަވަޅުތަކާއި "މޯލްޑިވްސް 2.0″

ރައްޔިތުންގެ ކަންބޮޑުވުންތައް އަމާޒުވެފައިވާ އިޖުތިމާޢީ މައްސަލަތަކާއި ކޮރަޕްޝަން ހުއްޓުވުމަށް ސަރުކާރުން ގެންގުޅޭ އާ ވިސްނުންތައް ތަގުރީރުގައި ހާމަކުރެއްވިއެވެ.

• ޑިޖިޓަލައިޒޭޝަން (މޯލްޑިވްސް 2.0): ދައުލަތުގެ ނިޒާމުތަކުން އިންސާނީ ނުފޫޒު ކުޑަކޮށް، ކިއު ޖަމްޕްކުރުމާއި ވަކިމީހަކަށްވީތީ ފަސޭހަކޮށްދިނުން ހުއްޓުވުމަށްޓަކައި، މުޅި ދައުލަތުގެ ޚިދުމަތްތައް ޑިޖިޓަލްކުރުމުގެ މަޝްރޫޢު މޯލްޑިވްސް 2.0 ކުރިއަށް އޮތް ދެ އަހަރާ ބައިގެ ތެރޭގައި ނިންމާނެ ކަމަށް ވިދާޅުވިއެވެ.

• އެސެޓް ރިކަވަރީ ބިލު: މާޒީގައި ރައްޔިތުންގެ ފައިސާއަށް ޚިޔާނާތްތެރިވެފައިވާ ފަރާތްތަކުގެ އަތުން އެ މުދަލާއި ފައިސާ އަނބުރާ ހޯދުމަށްޓަކައި، "އެސެޓް ރިކަވަރީ ބިލެއް" އަދި ޖިނާއީ އިޖުރާތުގެ ޤާނޫނަށް ގެންނަ އިޞްލާޙުތައް އަވަހަށް މަޖިލީހަށް ހުށަހަޅާނެ ކަމަށް ވިދާޅުވިއެވެ.

• ޑްރަގާއި ގޭންގު ކުށްތައް: ޑްރަގް ޓްރެފިކިންއަށް ބޮޑެތި އަދަބުތައް ކަނޑައެޅުމާއި، ބިދޭސީންގެ މައްސަލަތައް ހައްލުކުރުމަށް ފަށާފައިވާ މަސައްކަތްތަކުން ދާއިމީ ނަތީޖާ ނުކުންނާނެ ކަމުގެ ޔަޤީންކަން ދެއްވިއެވެ.

ރައީސް ނުދައްކަވާ ވާހަކަތައް

ރައީސް ޑރ. މުޙައްމަދު މުޢިއްޒުގެ މި މިނިވަން ދުވަހުގެ ތަގުރީރަކީ، ލޯކަލް ކައުންސިލް އިންތިޚާބު ވެރިކަން ކުރާ ޕީއެންސީއަށް ނާކާމިޔާބު ވުމަށް ފަހު ބޭއްވި ފުރަތަމަ މުހިންމު ގައުމީ ތަގްރީރެކެވެ. މިއީ ސިޔާސީ ޒަޚަމްތައް ފޫބެއްދުމަށް، ޤައުމީއްޔަތާއި މިނިވަންކަމުގެ ޖަޒުބާތު ކުރިއަށް ނެރުއްވައިގެން ރައްޔިތުންގެ ސަމާލުކަން ހޯއްދެވުމަށް ކުރެއްވި ކުޅަދާނަ ސިޔާސީ މަސައްކަތެކެވެ. ޚާރިޖީ ސިޔާސަތުގެ ކާމިޔާބީތަކާއި، ޑިމޮކްރަސީގެ މިނިވަންކަން ފުޅާކޮށްފައިވާ މިންވަރު ތަފްޞީލުކޮށްދެއްވި ނަމަވެސް، ދާޚިލީ މައިދާނުގައި ރައްޔިތުން އެދޭ އިޤްތިޞާދީ ބަދަލުތަކެއް ނުފެނެއެވެ. އަދި އެކަމަށް އިޝަރާތް ކުރެވިފައެއް ނުވެއެވެ. ވިޔަފާރި ވެރުިންގެ ޝަކުވާތަކަށްވެސް އެޑްރެސް ކުރެވިފައެއް ނުވެއެވެ. وَمَا تَوْفِيقِي إِلَّا بِاللَّهِ 

ފޮޓޯ: ރައީސް އޮފީސް