ދުނިޔޭގެ ރެކޯޑުތަކެއް މުގުރާލުމަށް ތައްޔާރުކުރަމުންދާ އޭ350 މަރުކާގެ އެއާބަސް ކުންފުނީގެ އުދުހޭ ބޯޓެއް، އޮސްޓްރޭލިއާގެ މެލްބަންއިން ފުރައިގެން 24 ގަޑިއިރަށް ވުރެ ދިގު މުއްދަތެއްގެ ޓެސްޓް ފްލައިޓަކަށްފަހު ފްރާންސަށް ޖައްސައިފިއެވެ. މި ދަތުރަށް އޮންލައިން ފްލައިޓް ޓްރެކަރުންގެ ބޮޑު ސަމާލުކަމެއް ލިބިފައިވެއެވެ.
މި ޓެސްޓް ފްލައިޓަކީ ކުއަންޓާސް އެއާލައިންގެ "ޕްރޮޖެކްޓް ސަންރައިޒް" ގެ ދަށުން ކުރިއަށް ގެންދާ މުހިންމު މަސައްކަތެކެވެ. މި މަޝްރޫއުގެ އަމާޒަކީ އޮސްޓްރޭލިއާއިން ޔޫރަޕަށް ކުރާ ދަތުރުތަކުގައި ދެ ގައުމުގެ ދެމެދު ހުއްޓުމެއް ނެތި، ދުނިޔޭގެ އެންމެ ދިގު ކޮމާޝަލް ފަސިންޖަރުން އުފުލާ ޚިދުމަތް ފެށުމެވެ.
ޚާއްސަ ގޮތަކަށް ފަރުމާކޮށްފައިވާ އޭ350-1000ޔޫއެލްއާރު މަރުކާގެ މި ބޯޓު، ސިޑްނީއާއި ލަންޑަނާ ދެމެދު ސީދާ ދަތުރުތައް ކުރުމަށް ފަށާނީ 2027 ވަނަ އަހަރުއެވެ. އެއާބަސް ކުންފުނިން މި ބޯޓުގެ ޓެސްޓްތައް ފަށާފައިވަނީ ޖޫން މަހުއެވެ.
އެއާބަސްއިން ބުނި ގޮތުގައި، އިތުރު ތެޔޮ ރައްކާކުރެވޭ ގޮތަށް ފަރުމާކޮށްފައިވާ މި ބޯޓު 24 ގަޑިއިރާއި 24 މިނެޓު ވަންދެން ވައިގެ ތެރޭގައި ހަރަކާތްތެރިވެފައި ވެއެވެ. އަދި 23,075 ކިލޯމީޓަރުގެ ދުރުމިން އެއްވެސް ހުއްޓުމެއް ނެތި ކަޑައްތުކޮށް، ފްރާންސްގެ ޓޫލޫސްގައި ހުންނަ އެ ކުންފުނީގެ ފެކްޓްރީ އެއާޕޯޓަށް ޖައްސާފައިވެއެވެ.
ފްލައިޓް-ޓްރެކިންގް ޚިދުމަތް ދޭ ފްލައިޓްރޭޑާ24 އިން ބުނީ، މިއީ އެ ޗެނަލްތަކުން މިހާތަނަށް އެންމެ ގިނަ ބަޔަކު ބެލި ދެވަނަ ފްލައިޓް ކަމަށެވެ. އެންމެ ގިނަ ބަޔަކު ބެލި ފްލައިޓަކީ 2024 ވަނަ އަހަރު ރާނީ އެލިޒަބަތު II ގެ ސަންދޯއް އުފުލި ފްލައިޓެވެ. މި ދަތުރު ކެނެޑާ މަގުން އުތުރަށް ދަތުރު ކުރިއިރު 3.6 މިލިއަނަށް ވުރެ ގިނަ މީހުން އޭގެ ހަރަކާތްތައް ބަލާފައިވެއެވެ.
ކުއަންޓާސްއިން ވަނީ މިފަދަ 12 ބޯޓަކަށް އޯޑަރުކޮށްފައެވެ. މި ބޯޓުތައް ފަރުމާކޮށްފައިވަނީ އޮސްޓްރޭލިއާގެ އިރުމަތީ އައްސޭރިން ލަންޑަނަށާއި ނިއުޔޯކަށް ގާތްގަނޑަކަށް 20 ގަޑިއިރުގެ ތެރޭގައި ދަތުރުކުރެވޭ ގޮތަށެވެ. މީގެ ސަބަބުން ކުރިން ފަސް ދުވަސް ނެގި ދަތުރު، 19 އާއި 21 ގަޑިއިރާ ދެމެދުގެ ވަގުތަކަށް ކުރުކުރެވޭނެއެވެ.
މި ފުރަތަމަ ބޯޓުގައި 20,000 ލީޓަރުގެ ތެޔޮ އަޅައިގެން ދަތުރުކުރެވޭއިރު، 238 ފަސިންޖަރުންނަށް މި ބޯޓުގައި އިށީނދެވޭނެއެވެ. މި ބޯޓު އެއާލައިނާ ހަވާލުކުރަން ހަމަޖެހިފައިވަނީ 2027 ވަނަ އަހަރުގެ އޭޕްރީލް މަހުއެވެ. އަދި 2027 ވަނަ އަހަރުގެ އޮކްޓޯބަރު މަހުން ފެށިގެން ސިޑްނީއާއި ލަންޑަނާ ދެމެދު ކޮންމެ ދުވަހަކު ސީދާ ދަތުރުތައް ފެށުމަށް ކުއަންޓާސް އަންނަނީ ތައްޔާރުވަމުންނެވެ.
