ތުރުކީގެ އަންހެނުން ވިހާ ނިސްބަތް ދަށަށް ދިއުމުގެ ސަބަބުން އެ ގައުމުގެ މުސްތަގުބަލުގެ އާބާދީގެ އޮނިގަނޑާ މެދު ބޮޑެތި ކަންބޮޑުވުންތަކެއް ވަނީ އުފެދިފައެވެ. ތުރުކްސްޓެޓްގެ ތަފާސްހިސާބުތައް ދައްކާގޮތުން، އާބާދީ އެއްވަރެއްގައި ހިފެހެއްޓުމަށް ބޭނުންވާ ކޮންމެ އަންހެނަކަށް ދަރިން ޖެހޭ 2.10 ގެ ނިސްބަތަށްވުރެ ދަށަށް ވިހެއުން މަދުވެ، ވިހާ ނިސްބަތް ވަނީ 2001 ވަނަ އަހަރު ހުރި 2.38 އިން 2025 ވަނަ އަހަރު 1.42 އަށް ވުރެން ދަށަށް ގޮސްފައެވެ.
މި މައްސަލައަކީ ހަމައެކަނި އިގްތިސާދީ ދަތިތަކަކާ ގުޅިފައިވާ ކަމެއް ނޫން ކަމަށާއި، މިއީ އިޖުތިމާއީ ގިނަ ބަދަލުތަކެއްގެ ނަތީޖާ ކަމަށް މަރްމަރާ ޔުނިވަސިޓީގެ ޕްރޮފެސަރު މުހައްމަދު ފާތިހު އައިސާން ވިދާޅުވެއެވެ.
ސިޓީތަކަށް މީހުން ބަދަލުވުމާއި، ތައުލީމާއި ވަޒީފާގެ މައިދާނުގައި އަންހެނުންގެ ބައިވެރިވުން އިތުރުވުމުން، ކުދިން ބެލެހެއްޓުމުގައި ހަމަހަމަކަމެއް ނެތް ބުރަ އުފުލަންޖެހުމަކީ ވެސް މިކަމަށް މެދުވެރިވަމުންދާ ސަބަބުތަކެވެ.
ރައީސް ރަޖަބް ތައްޔިބް އެރުދުޣާން ވެސް ވަނީ ކުދިން ބޮޑެތިކުރުމުގައި އަންހެނުންނަށް އެމީހުންގެ ބައިވެރިންގެ ފަރާތުން އެކަށީގެންވާ އެހީތެރިކަން ނުލިބޭކަން ފާހަގަކުރައްވާފައެވެ.
ތުރުކީގެ މި ކާރިސާއާ މެދު އިންޒާރުދެއްވަމުން ރައީސް އެރުދުޣާން ވިދާޅުވީ މިއީ ޤައުމުގެ މުސްތަގުބަލަށް އޮތް ބޮޑު ނުރައްކަލެއް ކަމަށާއި، އާއިލީ އޮނިގަނޑު ވަރުގަދަކުރުމުގެ މަސައްކަތްތައް އަވަސްކުރަން ޖެހޭ ކަމަށް ވިދާޅުވެފައެވެ.
އެގޮތުން މާލީ އެހީތެރިކަމާއި، އެލަވަންސްތައް އިތުރުކުރުމާއި، ބެލެނިވެރިންގެ ޗުއްޓީ ފުޅާކުރުމުގެ ސިޔާސަތުތައް ތައާރަފްކޮށްފައި ވީނަމަވެސް، މާހިރުން ދެކޭގޮތުގައި ހަމައެކަނި ފައިސާގެ އިނާޔަތްތަކުން ދާއިމީ ހައްލެއް ނުލިބޭނެއެވެ.
ދާއިމީ ހައްލެއް ހޯދޭނީ މަސައްކަތާއި އަމިއްލަ ދިރިއުޅުން ހަމަހަމަކުރެވޭނެ ވަށާ ޖެހެ ހަމަ ނިޒާމެއް ޤާއިމުކޮށްގެން ކަމަށް މާހިރުން ލަފާދެއެވެ.
