މާލީ ނިޒާމަށް ޑޮލަރު ވަންނަ މިންވަރު އިތުރުކުރުމުގެ ގޮތުން، ރިސޯޓުތަކުން ކޮންމެ ފަތުރުވެރިޔެއްގެ ބޮލަކަށް 500 ޑޮލަރު މާރުކުރަން އޮންނަ އިޚުތިޔާރު އުވާލައި، މަހުން މަހަށް ލިބޭ ޖުމްލަ އާމްދަނީގެ 20 ޕަސެންޓް ބޭންކުތަކަށް މާރުކުރަން މަޖުބޫރުވާ ގޮތަށް ގާނޫނަށް އިސްލާހު ގެނައުމަށް މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން އެޓާނީ ޖެނެރަލްގެ އޮފީހަށް ފޮނުވައިފިއެވެ. އެމްއެމްއޭއިން މަޢުލޫމާތު ދޭ ގޮތުގައި، މި އިސްލާހުތައް ވަރަށް އަވަހަށް ރައްޔިތުންގެ މަޖިލީހަށް ހުށަހެޅޭނެއެވެ.
މަރުކަޒީ ބޭންކުން މި ބަދަލުތައް ގެންނަން މި ނިންމީ، ކަޅު ބާޒާރުގައި ޑޮލަރުގެ އަގު ތާރީޚީ ގޮތުން ނުއުފުލޭ މިންވަރަށް، މައްޗަށް ގޮސްފައިވާ ދަނޑިވަޅެއްގައެވެ. ރާއްޖެއަކީ އަސާސީ މުދަލާއި ޚިދުމަތްތަކަށް މުޅިންހެން އިމްޕޯޓަށް ބަރޯސާވާ ގައުމަކަށްވުމާއެކު، ނުރަސްމީ މާކެޓުގައި ޑޮލަރުގެ އަގު އުފުލުމުގެ ސަބަބުން ތަކެތީގެ އަގުތައް އިތުރަށް އުފުލި، އިންފްލޭޝަނަށް ބޮޑު ބާރެއް ކުރިމަތިވަމުންދެއެވެ.
މި ބަދަލުގެ މައިގަނޑު ބޭނުމަކީ މަތީ ފަންތީގެ ރިސޯޓުތަކާއި އާދައިގެ ރިސޯޓުތަކުގެ މެދުގައި ޑޮލަރު މާރުކުރުމުގައި އޮތް ފަރަގު ކުޑަކޮށް، ހަމަހަމަ އުސޫލެއް ގާއިމުކުރުމެވެ. އެމްއެމްއޭއިން ފާހަގަކުރި ގޮތުގައި، އެކޮމޮޑޭޝަން އަގުތައް އިންތިހާއަށް މަތީގައި އުޅޭ ލަކްޒަރީ ރިސޯޓުތަކުން ބޮލަކަށް 500 ޑޮލަރު މާރުކުރުމުން، އެ ތަންތަނުގެ ޖުމްލަ އާމްދަނީއާ އަޅާބަލާއިރު ބޭންކިން ނިޒާމަށް ވަންނަނީ ނިސްބަތުން ވަރަށް ކުޑަ އަދަދެކެވެ. މި އިސްލާހާއެކު އަހަރެއްގެ މައްޗަށް ގާތްގަނޑަކަށް 100 މިލިއަން ޑޮލަރު އިތުރަށް ރާއްޖޭގެ ބޭންކުތަކަށް މާރުކުރެވޭނެ ކަމަށް އެމްއެމްއޭއިން އަންދާސާކުރެއެވެ.
މި އިސްލާހުގެ ތެރެއިން "ކެޓެގަރީ ބީ" ގައި ހިމެނޭ ގެސްޓްހައުސްތަކަށް އަމަލުކުރާ އުސޫލަށް ބަދަލެއް ގެނެސްފައެއް ނުވެއެވެ. އެފަރާތްތަކަށް ކުރިއެކޭވެސް އެއްގޮތަށް ބޮލަކަށް 25 ޑޮލަރު ނުވަތަ އާމްދަނީގެ 20 ޕަސެންޓް މާރުކުރުމުގެ އިޚުތިޔާރު ލިބިގެންވެއެވެ.
ފަތުރުވެރިކަމުގެ ދާއިރާއިން ބޭރުން ޑޮލަރުން އާމްދަނީ ލިބޭ ވިޔަފާރިތަކަށް ("ކެޓެގަރީ ސީ") ޑޮލަރު މާރުކުރުން މަޖުބޫރުވާ އާމްދަނީގެ ތްރެޝްހޯލްޑް ވަނީ 15 މިލިއަން ޑޮލަރުން 25 މިލިއަން ޑޮލަރަށް އުފުލައި، އެފަދަ ވިޔަފާރިތަކަށް ބޮޑު ލުޔެއް ދީފައެވެ.
