ރާއްޖޭގައި މަރުގެ ހުކުމް ތަންފީޒުކުރުމަކީ މި ސަރުކާރުގެ ސަރީހަ ސިޔާސަތެއް ކަމަށާއި، އެކަން އަމަލީ ގޮތުން ތަންފީޒުކުރުމަށްޓަކައި ގާނޫނީ ގޮތުން ފުރިހަމަކުރަންޖެހޭ މަރުހަލާތައް ފުރިހަމަކުރުމުގެ މަސައްކަތް ކުރައްވަމުންދާ ކަމަށް މިނިސްޓަރ އޮފް ހޯމްލޭންޑް ސެކިއުރިޓީ، ލޭބަރ އެންޑް ޓެކްނޯލޮޖީ އަލީ އިހްސާން މިއަދު ރައްޔިތުންގެ މަޖިލީހުގައި ވިދާޅުވެއްޖެއެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި، ތޮއްޑޫ ދާއިރާގެ އެމްޑީޕީ މެންބަރު ހުސެއިން ސަމީލު ކުރެއްވި ސުވާލަކަށް ޖަވާބު ދެއްވަމުން މިނިސްޓަރު އިހްސާން ވިދާޅުވީ، މަރުގެ ހުކުމް ތަންފީޒުކުރުމަކީ ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ރިޔާސީ ވައުދުފުޅެއް ކަމަށާއި، ސަރުކާރުން އެ ސިޔާސަތުގައި ސާބިތުވެ އޮތް ކަމަށެވެ.
ނަމަވެސް، އެކަން ތަންފީޒީ މަރުހަލާއަށް ގެނައުމުގެ ކުރިން ގާނޫނީ ގޮތުންނާއި އިދާރީ ގޮތުން ފުރިހަމަކުރަންޖެހޭ މުހިންމު އިޖުރާއާތުތަކެއް ހުރިކަން އިހްސާން ފާހަގަކުރެއްވިއެވެ.
"މަރުގެ ހުކުމް ތަންފީޒުކުރުމަކީ މި ސަރުކާރުގެ ސިޔާސަތެއް. އަޅުގަނޑުމެން އެކަން ކުރާނެ،" މިނިސްޓަރު ވިދާޅުވިއެވެ. "އެހެންވެ، އެއަށް ބޭނުންވާ ގާނޫނެއް ފަރުމާކޮށް، މި އިއްޒަތްތެރި މަޖިލީހަށް ފޮނުވުމުގެ މަސައްކަތް މިވަގުތު އަޅުގަނޑުމެން މިދަނީ ކުރަމުން." މިނިސްޓަރ ވިދާޅުވިއެވެ.
މިނިސްޓަރު އިތުރަށް ވިދާޅުވި ގޮތުގައި، ގާނޫނީ އިޖުރާއާތުތައް ތަރުތީބުކުރުމުގެ އިތުރުން، ތަންފީޒީ މަރުހަލާގައި އިދާރީ ގޮތުންނާއި ލޮޖިސްޓިކްސްގެ ގޮތުން ތައްޔާރުވާންޖެހޭ އެންމެހައި ކަންކަމަށް ވެސް ސަރުކާރުން ދަނީ ތައްޔާރުވަމުންނެވެ.
ރާއްޖޭގައި މަރުގެ ހުކުމް ތަންފީޒުކުރާނެ ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު މީގެ ކުރިންވެސް ވަނީ އެކި ފަހަރު މަތިން ރަސްމީކޮށް އިއުލާނު ކުރައްވާފައެވެ.
