އެމެރިކާގެ ރައީސް ޑޮނަލްޑް ޓްރަމްޕްގެ އިދާރާއިން ބިދޭސި މާބަނޑު މީހުންނާ މެދު އަޅާ ހަރުކަށި ފިޔަވަޅުގެ ދަށުން، އެމެރިކާގައި ދަރިން ވިހެއުމަށް ކުރާ ދަތުރުތައް ހުއްޓުވުމަށް އަޅަމުންދާ ފިޔަވަޅުތައް ހަރުކަށިކޮށްފިއެވެ. އެމެރިކާގެ ޚާރިޖީ ވުޒާރާއިން ހާމަކޮށްފައިވާ ގޮތުގައި، މިދިޔަ ދުވަސްތަކުގެ ތެރޭގައި ދުނިޔޭގެ އެކި ކަންކޮޅުތަކުން ވިސާ ނަގައިގެން އެމެރިކާއަށް ވިހަން އަންނަން އުޅުނު 600 އަށްވުރެ ގިނަ މީހުންގެ ވިސާ ވަނީ ބާޠިލުކޮށްފައެވެ.
މި ކަމާ ގުޅިގެން ޚާރިޖީ ވުޒާރާއިން ނެރުނު ރަސްމީ ބަޔާނެއްގައި ބުނެފައިވަނީ، އެމެރިކާގެ ރައްޔިތުކަމުގެ ޤާނޫނީ ހައްގު ރައްކާތެރިކުރުމަށްޓަކައި ލިބިފައި ހުރި ހުރިހާ ވަސީލަތްތަކެއް ސަރުކާރުން ބޭނުންކުރަމުންދާނެ ކަމަށެވެ. އަދި ހިޖުރަ ކުރުންފިޔަވައި އެހެން ބޭނުންތަކަށް ދޫކުރާ ވިސާތަކަކީ ހަމައެކަނި ޤާނޫނީ ގޮތުން ހުއްދަވެގެންވާ ބޭނުންތަކަށް އެކަނި ބޭނުންކުރާ އެއްޗެއްކަން ކަށަވަރުކުރުމަށްޓަކައި ޚާއްޞަ ޓާސްކް ފޯހެއް އެކުލަވައިލައިފައިވާ ކަމަށެވެ. އަދި އެމެރިކާގެ ވިސާ ދޫކުރުމުގެ ނިޒާމު އޮޅުވާލައިގެން، ވިޔަފާރިއެއްގެ ގޮތުގައި ބޭނުން ކޮށް މިފަދަ ކަންކަން ފުޅާކުރަމުންދާ ފަރާތްތައް ދެނެގަނެ، އެ މީހުންގެ މައްސަލަތައް ސީރިއަސް މައްސަލައެއްގެ ގޮތުގައި ބަލަމުންދާ ކަމަށް ވެސް ބުނެފައިވެއެވެ.
ޓްރަމްޕް ގެންދަވަނީ ޤާނޫނުއަސާސީން ލިބިދޭ ބާރުގެ ދަށުން، ވިސާ ދޫކުރުމާއި ރައްޔިތުކަން ދިނުމުގެ އުޞޫލުތައް ހަރުކަށިކުރުމަށް މުހިންމު އަމުރުތަކެއް ތަންފީޒުކުރައްވަމުންނެވެ. އެގޮތުން، ޤައުމުން ބޭރުން އަންނަ ފަރާތްތަކުން ދަތުރުކުރާ މަޤުޞަދު ވަންހަނާކޮށް، ދޮގު މަޢުލޫމާތު ހުށަހަޅައިގެން އެމެރިކާއަށް އެތެރެވުމަށް މަސައްކަތްކުރާ ފަރާތްތަކަށް އަބަދުގެ އަބަދަށް އެ ޤައުމަށް ވަނުން މަނާކުރުމުގެ ފިޔަވަޅުތައް އަޅާނެ ކަމުގެ އިންޒާރު ވެސް ޚާރިޖީ ވުޒާރާއިން ދީފައިވެއެވެ. މީގެ ކުރިންވެސް ބައެއް އަންހެނުން ފަތުރުވެރިންގެ ގޮތުގައި ނުވަތަ ރަސްމީ ދަތުރުތަކުގައި ގޮސް، އެމެރިކާގައި ކުދިން ވިހާފައިވާކަން ތަޙުޤީޤުތަކަށް ސާބިތުވެފައިވާކަން ވެސް ހާމަކޮށްފައިވެއެވެ.
މި ސިޔާސަތުގެ ދަށުން، އެމެރިކާގެ ޚާރިޖީ ވަޒީރު މާކޯ ރޫބިއޯއަށް ލިބިދޭ ބާރުގެ ދަށުން ވިސާ ބާޠިލުކުރުމުގެ ބާރު ފުޅާކޮށްފައިވާއިރު، ރައީސް ޓްރަމްޕް ވިދާޅުވަނީ ރައްޔިތުކަމަކީ ގަސްތުގައި ނަހަމަ ގޮތުގައި ބޭނުންކޮށްގެން ފަސޭހައިން ހޯދޭނެ އެއްޗެއް ނޫންކަމަށެވެ.
މި މައްސަލައާ ގުޅިގެން އެމެރިކާގެ ސުޕްރީމް ކޯޓުގައިވެސް ޤާނޫނީ ބޮޑެތި ބަޙުޘްތަކެއް ކުރިއަށްދާއިރު، އިދާރާތަކުން ބުނަނީ މިއީ އެމެރިކާގެ ރައްޔިތުންގެ ރައްކަލަށް އަޅާ މުހިންމު ފިޔަވަޅެއް ކަމަށެވެ.
