އެމްޑީޕީގެ ރިއާސީ ޕްރައިމަރީގައި އަބްދުﷲ ޝާހިދު

މައި އިދިކޮޅު ޕާޓީ، އެމްޑީޕީގެ 2028 ވަނަ އަހަރުގެ ރިޔާސީ ޓިކެޓު ހޯއްދެވުމަށްޓަކައި ބާއްވާ އެތެރޭގެ ޕްރައިމަރީގައި ވާދަކުރައްވާނެކަން ކުރީގެ ފޮރިން މިނިސްޓަރު އަދި އދ. ގެ އާންމު މަޖިލީހުގެ ކުރީގެ ރައީސް އަބްދުﷲ ޝާހިދު އިއުލާނު ކުރައްވައިފިއެވެ. އަދި އިންތިހާބީ ފުރުސަތުތަކުގެ ހަމަހަމަކަމާއި އިންސާފުވެރިކަން ދެމެހެއްޓެވުމުގެ ގޮތުން، އެމްޑީޕީގެ ރައީސްކަމުގެ މަގާމުން ޝާހިދު ވަނީ ވަގުތުން އިސްތިއުފާ ދެއްވާފައެވެ.

އައްޑޫ ސިޓީ ހިތަދޫގައި ބޭއްވި ޚާއްސަ ސިޔާސީ އެއްވުމެއްގައި ވާހަކަފުޅު ދައްކަވަމުން ޝާހިދު ވިދާޅުވީ، ގައުމު މިހާރު ތަހައްމަލު ކުރަމުންދާ އިގުތިސާދީ އަދި އިޖުތިމާއީ ގޮންޖެހުންތަކުން ރައްޔިތުން ސަލާމަތްކޮށް، ގައުމުގެ މިސްރާބު ރަނގަޅު މަގަށް އަނބުރާ ގެންދެވޭނެ ހަމައެކަނި ސިޔާސީ ފިކުރަކީ އެމްޑީޕީ ކަމަށެވެ. ރާއްޖެއަށް އައި އިސްލާހީ އަދި ޑިމޮކްރެޓިކް ބަދަލުތަކުގެ މޭސްތިރިންނަކީ އެމްޑީޕީގެ އާންމު މެންބަރުންކަން ފާހަގަކުރައްވަމުން، ކުރިއަށް އޮތް ރިޔާސީ އިންތިހާބު ކާމިޔާބުކޮށްދެއްވުމުގެ ސާބިތު އަޒުމުގައި މަސައްކަތް ކުރައްވާނެ ކަމަށް އޭނާ ވިދާޅުވިއެވެ.

އެމްޑީޕީގެ ރައީސްކަމުން އިސްތިއުފާ ދެއްވި ސަބަބާ ބެހޭގޮތުން އަބްދުﷲ ޝާހިދު ވިދާޅުވީ، އެމްޑީޕީއަކީ ސިޔާސީ މައިދާނުގައި ޑިމޮކްރަސީގެ މިންގަނޑުތަކާއި އުސޫލުތައް ސާބިތުކޮށްދިން ޕާޓީ ކަމަށެވެ. ޕާޓީގެ އިސް މަގާމެއްގައި ހުންނަވައިގެން އެތެރޭގެ އިންތިހާބެއްގައި ވާދަކުރެއްވުމަކީ އިންސާފުވެރި އިންތިޚާބީ މާހައުލަކަށް ހުރަސްއެޅިދާނެ ކަމެއް ކަމަށް ގަބޫލުކުރައްވާތީ، ޕާޓީގެ ރައީސްގެ ހައިސިއްޔަތުން ލިބިވަޑައިގަންނަވާ ނުފޫޒުން އެއްކިބާވެވަޑައިގަތުމަށް މަގާމުން ވަކިވެވަޑައިގަތީ ކަމަށް އޭނާ ވިދާޅުވިއެވެ.

"އެމްޑީޕީގެ ރިޔާސީ ޕްރައިމަރީގައި ވާދަކުރާނެކަން އިއުލާނުކުރުމާއެކު، ޕާޓީގެ އިންސާފުވެރިކަމާއި ހަމަހަމަ ފުރުސަތުތައް ދެމެހެއްޓުމުގެ މާތް މަގުސަދުގައި، ޕާޓީގެ ރައީސްކަމުން އަޅުގަނޑު އިސްތިއުފާދީފިން،" ޝާހިދު ވިދާޅުވިއެވެ.

ޝާހިދު އިތުރަށް ފާހަގަކުރެއްވި ގޮތުގައި، ޕާޓީގެ ތެރޭގައި ތަފާތު ފިކުރުތަކާއި ޚިޔާލުތައް ހުރި ނަމަވެސް، އެންމެން ގުޅިގެން އެކުގައި މަސައްކަތް ކުރުމުގެ ގާބިލުކަން އޭނާގެ ކިބައިގައި ހުންނާނެއެވެ. އަދި އަމާޒަކީ ރައްޔިތުންނަށް އިންސާފުވެރި، ހާމަކަންބޮޑު އަދި ނަތީޖާ ނެރެދެވޭނެ ހެޔޮވެރިކަމެއް ގާއިމުކޮށްދެއްވުން ކަމަށް ވިދާޅުވިއެވެ.

އަބްދުﷲ ޝާހިދަކީ ދިވެހިރާއްޖޭގެ ސިޔާސީ އަދި ޚާރިޖީ މައިދާނުގައި ދިގު މުއްދަތެއްގެ ތަޖުރިބާ ލިބިވަޑައިގެންފައިވާ ބޭފުޅެކެވެ. ކުރީގެ ރައީސް މައުމޫން އަބްދުލްގައްޔޫމްގެ ވެރިކަމުގައި ސިޔާސީ ހިދުމަތް ފެއްޓެވި ޝާހިދު ވަނީ، އެ މަނިކުފާނުގެ ސަރުކާރުގެ ފޮރިން މިނިސްޓަރުކަމުގެ އިތުރުން ދިވެހި ރައްޔިތުންގެ ޕާޓީ (ޑީއާރުޕީ) ގެ އިސް ސަފުގައި މަސައްކަތް ކުރައްވާފައެވެ. އަދި 2009 އިން 2014 އަށް ރައްޔިތުންގެ މަޖިލީހުގެ ރައީސްކަން ކުރެއްވިއެވެ.

އޭގެ ފަހުން އެމްޑީޕީއާ ގުޅިވަޑައިގެން، ކުރީގެ ރައީސް އިބްރާހީމް މުހައްމަދު ސޯލިހުގެ ވެރިކަމުގައި ފޮރިން މިނިސްޓަރުކަން ކުރެއްވިއެވެ. އެ މުއްދަތުގެ ތެރޭގައި، ބައިނަލްއަގުވާމީ މައިދާނުގައި ރާއްޖެއަށް ރީތިނަމެއް ހޯއްދަވައިދެއްވައި، އދ. ގެ 76 ވަނަ އާންމު މަޖިލީހުގެ ރައީސްކަމުގެ މަގާމު ފުރަތަމަ ފަހަރަށް ރާއްޖެއަށް ކާމިޔާބުކޮށްދެއްވިއެވެ.